تفاصيل عملية الانزلاق الغضروفي القطني - الدكتور علي يسري القاضي - استئصال الغضروف بالميكروسكوب

لو انت بتشوف الفيديو ده, فدا معناه انك عندك انزلاق غضروفي قطني, وان انا قلتلك انك انت محتاج عملية.
و خلينا نعرف اي هي العملية وترتيباتها ونسب نجاحها والمضاعفات
✅اولا : معني ان عندك انزلاق غضروفي قطني محتاج العملية, ده معناه انك مشيت على علاج دوائي وعلاج طبيعي وما نجحوش معاك،
او بعد الشر عليك انت عندك سقوط في القدم سواء جزئي او كلي او بدايات عدم تحكم في البول او البراز.
و دلوقتي انت محتار, لاني قلتلك ممكن تعمل عملية انزلاق الغضروف القطني عن طريق الميكروسكوب الجراحي او عن طريق التثبيت,
طب ايه الفرق ما بينهم وامتى نعمل ده وامتى نعمل ده؟
عادة انا بفضل استئصال الغضروف بالميكروسكوب في الناس 👇:
1️⃣اللي عضلاتها كويسة
2️⃣اللي سنها صغير.
3️⃣ اللي مش مطالب منها انها تعمل مجهود عضلي كبير, زي معظم ستات البيوت اللي بتشتغل في البيت وبتشيل وبتحط , بفضل جدا ان انا اعملها تثبيت للفقرات عشان بعد العملية لما ترجع لحياتها الطبيعية ما تشيلش وتحط فالغضروف يرجع تاني.

طيب ايه نسبة رجوع الغضروف الحقيقية ‼️
10%, بس مع المجهود العضلي الجامد النسبة دي ممكن تعلى.

✅النقطة التانية ان الستات بخلق ربنا عضلاتهم اضعف من الرجالة, و مع المجهود العضلي اللي بيتعمل, نسب ارتجاع الغضروف بتبقى اعلى بشوية.
عشان كده ممكن تلاقيني بقترح ان احنا نعمل تثبيت للفقرات واستئصال للغضروف بدل استئصال الغضروف بالميكروسكوب.
طيب ايه مميزات وعيوب استئصال الغضروف بالميكروسكوب‼️
وايه مميزات وعيوب استئصال الغضروف وتثبيت الفقرات‼️
مميزات استئصال الغضروف بالميكروسكوب :
1️⃣انه جرح صغير .
2️⃣فترة التعافي اسرع .
3️⃣العضلة نفسها اللي بتتوسع اقل .
4️⃣العضم اللي بيتشال اقل بكتير .

طيب ايه المشكلة الرئيسية اللي في استئصال الغضروف بالميكروسكوب‼️ واللي هي الفرق ما بينها وبين التثبيت‼️
الفرق ان فيه نسبة ارتجاع للغضروف في حالات استئصال الغضروف بالميكروسكوب, طيب المقابل فى تثبيت الفقرات ؟ ,
✅تثبيت الفقرات الفتحة بتكون اكبر شوية 7 سم
✅ توسيع العضلات بيبقى ازيد شوية بس دا مش بيزود فترة النقاهة ولا بنفضل قاعدين في السرير مانتحركش, ولكن انت تقدر ترجع وتشيل وتحط اسرع, ليه‼️
لان لما بتستأصل غضروف بالميكروسكوب, انا بمنعك تمام انك تشيل حاجة اول 6 شهور,
فترة الجلوس بيبقى ليها وقت معين ,
بنرفض ان احنا نخش في امساك - كحة شديدة , الحاجات دي بتساعد ان الغضروف بيرجع.

اما التثبيت , انت من الاول بتقدر تقعد - بتقدر تشيل حتى لو اوزان خفيفة وبعد كده بتقدر تشيل اوزان ثقيلة, فكل حاجة في دول ليها مميزات ولها عيوب .

و بالنسبة للناس اللي بتقول انا مش عايز شرايح ومسامير, لا هو انت ما بتحسش بالشرايح والمسامير اصلا وبتقدر تعيش حياتك عادي خالص وما بتحسش بآلام شديدة زي ما الناس بتتخيل.

طيب ايه مشكلة تثبيت الفقرات‼️
✅الفقرة نفسها بتبقى ثابتة, مش معنى كده ان ما فيش حركة ما اقدرش اركع ولا اسجد، لا, الحركة نفسها في الفقرة حاجة Micro , يعني الفقرة نفسها ما بتتحركش بسهولة،
لكن ده مش معناه, انك مش هتقدر توطي او تسجد, انت هتقدر تعمل اي حاجة حتى لو ثبت اكتر من فقرة.

المشكلة هنا انك انت لو ما حافظتش على نفسك سواء في استئصال الغضروف بالميكروسكوب او التثبيت، بيحصل حاجة اسمها تزحزح في الفقرة اللي فوق التثبيت زي ارتجاع الغضروف في الميكروسكوب , في تزحزح في الفقرة اللي فوق التثبيت ,
اه نسبها اقل من ارتجاع الغضروف ولكن واردة , فده معناه ان احنا لازم نحافظ على نفسنا في جميع الاحوال سواء عملنا غضروف بالميكروسكوب او عملنا تثبيت, لازم نحافظ على ضهرنا , ليه‼️
لان اللي خلى يجيلك غضروف اول مرة يجيب لك غضروف تاني, سواء في الفقرة اللي فوقيها او اللي تحتيها او في مكان تاني خالص, انت عندك استعداد ان يجي لك غضاريف تانية فلازم تحافظ على نفسك وتمشي Lifestyle, احنا بنرتبه معاك بعد العملية.

طيب ليه ممكن يحصل ارتجاع للغضروف بما انك انت شلته ؟
الاجابة ان الغضروف اللي احنا بنشيله مش كل الشفاف اللي قدامي ده, ده الغضروف من اوله لاخره , الحتة اللي بنشيلها هي الحتة الحمراء اللي خارجة من مكانها وضاغطة على العصب،
فانا مجرد بشيل الحتة اللي خارجة من مكانها دي وبسلك العصب وبسيب بقية الشفاف ده جوة , فاللي يخلي الغضروف ده يطلع ان القشرة او القماشة اللي حواليه دي اتقطعت فخرج منها النواة , ده يرجعه تاني , فاحنا لازم نمشي بتعليمات معينة زى
♦️ ان احنا ما يبقاش في حزق جامد .
♦️ ما يبقاش في عطس جامد .
♦️ ما يبقاش في شيل حاجة تقيلة , عشان النواة دي ما تطلعش تاني ببساطة .
واخر حاجة حابب اقولها لك لازم تفكر بالعقل، اي نسب المضاعفات اللي ممكن تحصلي لو ماعملتش العملية‼️ وايه نسب المضاعفات لو عملت العملية‼️
ولو فكرت فيها بالعقل وسألت الدكاترة كلها هتعرف انك لو ماعملتش العملية هتضر نفسك اكتر , بالذات لو انت في مرحلة انك انت محتاج العملية فعلا ،
يعني لازم تروح لدكتور انت واثق فيه واثق في امانته انه يقول لك انك انت محتاج عملية لما تحتاجها فعلا , مش مجرد انك انت عندك غضروف او عندك ضيق يقول لك عملية على طول لما توصل للمرحلة دي تأكد تماما انك انت لو استنيت على نفسك هتبقى اسوأ من انك انت تعمل العملية ،
ففكر واستخير وشوف الدكتور اللي انت مرتاح له , اللي يعرف يتابعك بطريقة كويسة وتوكل على الله.

الدكتور / علي يسري القاضي
✔️ إستشاري جراحة المخ و الأعصاب و العمود الفقري بجامعه القاهره
✔️ عضو الجمعيه الاوروبيه لجراحات العمود الفقري

و لو عندكم اى استفسار بخصوص عملية الانزلاق الغضروفي القطني بالميكروسكوب تقدروا تتواصلوا معانا على رقم 👇
📱: 01000120118

و كمان تقدروا توصلوا للواتساب عن طريق اللينك دا 👇
https://wa.me/201000120

فروعنا :📌 الدقي 📌 مدينة نصر