「2mins 系列」做 Location Base Service (LBS) 功能有咩要注意？要洗幾多錢？「工人智能Consultant」

你好我係RedSo嘅工人智能consultant，今日我哋用兩分鐘嚟講吓做Location Base Service功能有咩要注意同埋要洗幾多錢。
首先你要清楚自己係想做室外定係室內定位，因為呢兩個技術係完全唔同，室外定位主要就係靠手機上面嘅GPS及AGPS功能。而室內定位則有好多唔同既技術，例如用藍牙訊號既定位技術又或者有啲技術會用Wi-Fi signal作定位，亦有其他唔同既定位方法。 呢條片主要會講室外定位功能， 亦即係GPS資訊。
智能電話除咗提供GPS嘅座標之外，佢亦可以提供，例如高度，準確度，方向等資料。 你需要知道你嘅 應用程式將會點樣用呢一啲資料，咁先至可以決定一個重要嘅設定，就係你需要呢啲位置資訊既準確度係幾多。 好多時客戶都會覺得當然係攞越準確既資料越好啦，但係當要得到準確嘅資料，用戶嘅電話就需要使用越多嘅電池及時間去獲取呢啲資料， 所以其實夠用就好啦。
另外位置偵測嘅頻率都係會影響用戶手機嘅電池消耗， 你要根據自己嘅應用去設定，偵測頻率除咗可以用時間去決定之外，亦都可以用用戶嘅位置改變幅度去決定需唔需要更新偵測。
通常用得位置資訊，好多時都會使用背景工作功能，即係當隻App唔喺屏幕嘅時候，例如Lock Screen，去左第二個App等等，都會仍然接收到位置資訊。 要運用呢個功能其實唔難，但就有好多唔同嘅情況要處理，例如電話唔夠資源，或者隻App俾人殺咗等等。 所以若果要用背景工作功能，就一定要預足夠嘅時間去做測試。
另外雜訊處理都係一個非常影響價錢嘅功能，好多時客戶會要求做到好似某一啲app一樣，但其實嗰啲app用咗幾多時間去處理雜訊，用咩方法去處理，都係一個謎。 每一個做過定位功能既開發商都會有一定嘅方法去處理呢啲雜訊，但每一個所使用嘅方法都唔同，所以最好你搵開發商嘅時候，都要求佢哋比一啲Demo你睇，俾你去試，再去決定用邊一個開發商。但若果你點都要做到同某一隻App一樣，咁可能你就要準備足夠嘅金錢同時間去做科研啦，嘻嘻。
之後就係地圖選擇，如果你嘅應用程式需要將位置嘅資訊顯示喺地圖上面，你就要選擇一個合適既地圖。市面上比較熟悉嘅就有Google Maps，Apple Map等等，但係要留意番有一啲Android手機係用唔到Google Maps，所以如果你要支援呢啲手機，你就要選擇另一啲地圖啦。
唔同廠商出嘅電話其實可以有好多行為上嘅分別，就算都係Android嘅手機都有機會出現一啲唔常見嘅行為。 等我簡單分享一啲我哋之前見過嘅經歷，例如 iOS上如果用戶主動殺咗你個app， 咁你就唔可以攞到最準確嘅位置資訊。我哋又見過一啲Android手機佢會喺背景無啦啦殺咗你個程式，亦會有另一啲手機會將一啲舊嘅定位資訊俾去你個app等等。 所以當你想開一個使用位置資訊嘅project嘅時候，最好就係有一個清晰嘅手機支援清單，咁就可以避免不必要嘅爭拗。
一般黎講我哋都會同客戶分析清楚佢需要嘅位置資訊將會有咩用途，從而幫佢選擇一個啱啱好夠用嘅Solution，因為呢個範疇如果要做，真係可以不停improve無限做。而根據應用既功能唔同，所涉及既資金亦都可以有好大差異，例如如果只係想用GPS去搜尋一啲資料，所需嘅金額可能只係幾萬蚊，但若果係想做一啲用GPS去記錄行蹤， 甚至乎係做導航功能，咁所涉及嘅金額就可能要20萬元左右， 到最後都係視乎需要幾多功能及深度。
賣下廣告先，呢一啲就係我哋做過嘅一啲定位資訊相關手機應用程式，有興趣就睇吓啦。
今日講既係咁多，多謝你既時間，歡迎你收睇我哋其他影片，了解更多開發唔同功能要注意既事情。拜拜。