SUAL DOUGAL || Sylvia Nem

Music Track
   • SUAL DOUGAL || SOUND TRACK  

Hiai La a hong piankhiak theihna ding a ngaihtuah theihna hon pia Pathian tung ah kipahthu i gen masa ahi.
Nikhat lawmte khat in hon call a ka kihouna uah lawm zan a veng kikhopna ah kava tel leh lawite khat in ka tapa School kaitop innlam zuan a hong paina ah khamtheih zuakte khat in nau hiai hihlechin nang nuam sak a sa ding na hi honchi a, ka utkei lehle hon piaktum teitei a kei hongtai honchi a ka lungkham lotel ahi chih hon gen hi. Lungkham huai in dahhuai kasa mahmah hi. Summuhna ding a hihnak photleh poisakna himhim neilou, naupang tampi khem a khamtheih hihzong sangsak ding in ei hauhsak ding chihkia lunggulh a neite ziak a sia leh pha theinai lou naupang tampite hinkhua mulkimhuai tak a pikawitute ki-awi uh kasa mah² mai hi. I ngaihtuah sauchiang in hiai khamtheih in mihing tampite hinna ana lata a, tamtakte hinkhua hon suse lai ding a hihdante tuh haihvuallouh ahi. Nu leh pate kinepna tate a hi ua, a hong khang letding kal uh ngaklah in lam etna lianpitak toh anuam ahaksa chiteng thuak in pang uhi. Hiai sual dougal in innkuan tampitak susia in Gam leh Nam a ding in leng minsiatna a tutban ah thuakkhatu innsung mite a ding in lungkhamna leh zan ihmutmohna tun in haksa petmah ding hi. Kinepna teng kithalkhup a hihman a lungngai vung² a sun leh zan khitui naptui toh hinkhua zang a sihna hanmual zuanmai ding nu leh pate dinmun ding i ngaihtuah leh hehpihhuai petmah uh a hihdante i ngaihtuahna lel in le gelbun lou a puaknat pihhuai mah² uhi.
Khamtheih guihtheih i chih i pianma sotpek a kipan a na omthamta hitamahle, tulai i vangkhopi Lamka leh a sehvel a niteng simthu a tuangzou gige tuailaite khamtheih sal a ataanna thute uh puaknat huai i sathei mah² hi. Puaknat luatman a lungtang a hong suakkhia mikhat leh nih in phattuamna a ana neihtheih khak uhleh chih lam etna lianpitak toh la hong kibawl khia ahi. Huan kuamah koktuam nei a kibawl hilou ahichih leng ka hon taklang nuam hi.
Pathian in La hon vualzawlsak henla, hiai khamtheih guihtheih sual a salbang taangkha teng² i Toupa Jesu Christ sianglam zuan a hong kinung heikik ding un i chialngut² a, ngaikhetu teng² tung ahleng kipahthu kon gen hi.
Huan Lakaih sak hak mah² hinapi siam takmai a hon sakkhiak sak Sylvia Nem tung ah kipahthu ka gen hi. Maban ahleng La tamsem satheizel ding in Pathian in amapi tontung leh chih ka deihsakthu leng ka khakngal hi.
Huan hiai Sual Dougal team a pangkhakna neiteng² tung ah nakpitak in kipahthu kon gen hi. Huan phattuam ngaihna hon suahsak a limchiin kilawm takmai hon chiinsaktute: Mumung, Biakkim, Nancy Ngaihte, Andrew Vualnam leh Remboih na phattuam ngaihnate uh thupi kasa petmah a Toupan a leh tampin hon din hen aw.

SUAL DOUGAL
Singer: Sylvia Nem
Lyric: Elcy Neihsial
Tune: Siam Valte
Music Recording: Green Studio Videography & Editing: Lanka Video

I gam simthu’n lunglai a naa sak ngei,
Sinlai lungguk ziinbang liingsak e;
Tuun zua zatam lung kinepna vondeih,
Tuaidawng momnou tha-hatlaite;
Khamtheih guihtheih sal ah taang uh,
Henkol khaubang suutding omlou i hiam?

Aw tuailai thou inla halh in,
Na henkol bulh setan kulhpi sungpan;
Henchip hilou nahi zaitha thalbang khauh in,
Annbang hon it Toupa siang ah;
Sulkik simthu hong leelnawn in tuai aw,
I zua Sianmang siang lambang zon hunta e.

Sesum paallun tembang deihte vang a,
Kilbang khangpan momnou tuaideihte;
Henta bang in sual ah salbang taang uh,
Sungkuan gibang khentu na hi;
Gam leh nam sakmin siatna bul,
Sesum paal aw selung na awi nam aw?

Tuun zua’n anglai vondeih hon tawini’n aw,
Kilbang hong khanglian mengmeng in Bawi;
Nutha Patha kheek aw chi’n naubang hon awi,
Mualzatam mitmei suan a ma zaam;
Na tuunnu khamkhanu’n vei a,
Kulsiin a zaalma’n vabang pilve aw.

Aw Toupa ka gam uh siatna’n kidim,
Naubang nuihna siangsung khimbang ziing;
Hiai sual dougal zaitha hiambang hat e,
Albang mangding laizawm henkol;
Suutdi’n banzaal khut kileenni,
Suahtaakna kong hon bawlsak in Toupa.

Note: Re-Upload Is Strictly Prohibited