WAJASIRIAMALI WAASWA KUJISAJILI NA KUJIUNGA KWENYE VIKUNDI ILI KUNUFAIKA NA MIKOPO YA SERIKALI.

Afisa Maendeleo ya Jamii Mkoa wa Shinyanga, Bi. Rehema Edson, ametoa rai kwa wajasiriamali wote wa Manispaa ya Shinyanga kuhakikisha wanajisajili rasmi na kujiunga kwenye vikundi ili kufungua milango ya kunufaika na mikopo inayotolewa na Serikali pamoja na taasisi mbalimbali za kifedha.

Bi. Rehema alitoa wito huo Novemba 15, 2025 katika hafla ya kufunga mafunzo ya siku sita kwa wajasiriamali wa Manispaa ya Shinyanga yaliyofanyika katika Ukumbi wa Vijana Centre Ngokolo, yakiwa yameandaliwa na Kampuni ya Star Entrepreneur General. Mafunzo hayo yalihusisha washiriki 245, wakiwemo wanawake 196 na wanaume 49.

Alisisitiza kuwa hatua ya wajasiriamali hao kujipanga na kujiunga katika vikundi vya watu kuanzia watano na kuendelea siyo tu inawawezesha kufikia huduma za kifedha kwa urahisi, bali pia ni njia ya kuaminika zaidi kwa taasisi za fedha na serikali katika kuwafikia kwa ajili ya misaada, mafunzo na mikopo.

"Ninawasihi mjisajili rasmi, mpate vitambulisho na kujiunga katika vikundi ili muweze kufikiwa na mikopo inayotolewa na Serikali pamoja na mashirika ya benki. Pia changamkieni fursa za kushiriki katika maonesho ya bidhaa kwa kuwa ndiyo njia bora ya kujitangaza na kupata masoko mapya," amesema Bi. Rehema.

Kwa upande wake, Mkurugenzi Mtendaji wa Kampuni ya Star Entrepreneur General ameishukuru Serikali ya Mkoa wa Shinyanga kwa ushirikiano mkubwa walioupata katika utekelezaji wa mafunzo hayo, huku akiomba washiriki wapatiwe nafasi ya kushiriki matukio na maonesho mbalimbali ili kuendelea kuonyesha bidhaa na ujuzi walioupata.

Mafunzo hayo yaliyodumu kuanzia Novemba 9 hadi 15, 2025, yalihusisha mada muhimu kama usimamizi wa biashara, mbinu za masoko, ufungashaji na uwekeaji wa lebo, ufugaji wa kuku, usindikaji wa bidhaa za chakula, pamoja na utengenezaji wa sabuni na batiki.