عندما قال محمد نجيب للملك فاروق ظلمناك وضيعنا مصر سامحني

في يوم؛ الرئيس محمد نجيب كان راكب العربية، وجنبه جمال عبد الناصر، ورايحين نادي الظباط في الزمالك، فاتفاجىء بعبد الناصر بيقوله: في موضوع ناقشته مع بعض الزملاء وعايز أعرضه عليك..
نجيب سأله: خير؟
عبد الناصر رد: أنا شايف إننا لازم نفكر في مستقبلنا ومستقبل الثورة وإحنا متحاوطين بالأعداء ومش عارف مصيرنا إيه..
الرئيس سأله: تقصد إيه بالظبط؟
عبد الناصر قال:
إحنا خدنا قرار أرجو إنك توافق عليه.. كل عضو من أعضاء مجلس قيادة الثورة ياخد مبلغ 10 آلاف جنيه وانت تاخد 14 ألف.. يعني حوالي 134 ألف جنيه.. وأنا طلبت من زكريا محي الدين يحجزهم من الفلوس الجديدة..
محمد نجيب وشه اتقلب وصرخ فيه:
اسكت.. اسكت.. إزاي تستبيح فلوس الشعب بالشكل ده وتحط فلوس الناس في جيبونا؟
وبيقول في مذكراته إنه لما شخط في عبد الناصر لقاه بيضحك ضحكة خبيثة وبيقوله: أنا كنت متأكد إنك هترد بالشكل ده.. صدقني أنا كنت بمتنحك..
لكن الحقيقة إنه مكنش بيمتحنه ولا حاجة، واللي أكد ده تصرفاته وتصرفات زمايله اللي كانت فضايح كاملة!
واحد منهم خسر مئات الجنيهات على ترابيزة القمار، وعشان كدا محمد نجيب طلع قرار بتحريم الميسر في المحلات العامة والخاصة..
وواحد تاني ساب شقته المتواضعة واستولى على قصر من قصور الأمراء في جاردن سيتي عشان يبقى قريب من أميرة عجباه عايشة في قصر هناك..
ووصل بيه الحال إنه كان بيتهجم على القصر وهو سكران في نص الليل..
وواحد تالت كان بيجري ورا ناهد رشاد مرات يوسف رشاد طبيب الملك فاروق الخاص..
وبيحكي الرئيس محمد نجيب إنه في يوم راح يزور واحد من أعضاء مجلس القيادة فلقى عنده فنان بيعمله تمثال تكلفته متين جنيه، رغم إن ظروفه المادية ماتسمحش يكون معاه مبلغ أد ده..
فساله: جبت الفلوس دي منين؟.. وبعدين ساب البيت ومشي وأقسم ميدخلوش تاني..
وبيقول إنهم في مرة بيتعشوا في مجلس القيادة فلاحظ إن الشوك والسكاكين مصنوعة من الفضة ومنقوش عليها عبارة القصور الملكية فرفض ياكل لحد ما يرجعوا الحاجات لمكانها..
ولما شاف كل التصرفات دي ندم إنه اتصدر حركة 23 يوليو ووفر ليها الغطاء..
وصدمته زادت لما لقى كل ظابط من ظباط الثورة عايز يبقى ملك أو رئيس حكومة على أقل تقدير..
وقال لنفسه ساعتها: طردنا ملك وجبنا 13 ملك..
وبسبب خلافاته مع جمال عبد الناصر وزمايله في ملفات كتير ابتدوا يتآمروا عليه لحد ما خلصوا منه وفضلوا حاطينه في المعتقل سنين طويلة..
رحم الله الجميع وغفر لهم..