Ինչպես Կանգնեցնել Թշնամուն և Երբ Կգա Հզոր Տղամարդը

Աստուծո Խոսքն ասում է, որ երբ որ ազգը որոշակի հանգամանքների մեջ է հայտնվում Զորությունների Տերը այդ ազգի միջից «պիտի վերացնի հզօր տղամարդուն եւ զօրաւոր կնոջը, հացի զօրութիւնը եւ ջրի զօրութիւնը, հսկային, զօրեղին եւ քաջամարտիկին, դատաւորին, մարգարէին, քննիչին եւ ծերին, յիսնապետին եւ սքանչելի խորհրդականին, իմաստուն ճարտարապետին եւ խելամիտ ատենակալին: Նրանց վրայ իշխան պիտի կարգեմ մանուկներին, խաբեբաները պիտի տիրեն նրանց։ Ժողովուրդն իրար պիտի անցնի, տղամարդը տղամարդու դէմ պիտի ելնի, ընկերն՝ ընկերոջ դէմ, մանուկը ծերի հետ պիտի ընդհարուի, անարժանն՝ արժանաւորի հետ» (Ես 3:1-5):

Սիրելի Քրիստոնյաներ, ձեզանից նրանք, ովքեր հետևում են Քրիստոսին և ջանք թափում հնազանդվել նրա խոսքին: Մենք քիչ ենք, բայց Զորությունների Տերն օգնում է նրանց, ովքեր հավատարմորեն հետևում են Իրեն: Դրա համար խնդրում եմ ձեզ, ուր էլ լսեք այս ձայանագրությունները, օգնեք տարածել ավելի շատ մարդկանց: Մեր ազգն այս վիճակից դուրս կգա, եթե ավելի շատ մարդիկ լսեն Աստծո Խոսքն ու փոխեն իրենց կյանքերը, փոխեն իրենց սրտերը: Եվ դրա համար ամեն մեկս պիտի հիշենք, որ մեր Տեր Հիսուս Քրիստոսի կողմից կոչված ենք աղ լինել այս երկրի վրա ու համ տալ այս կյանքին: Դրա համար խնդրում եմ ձեզ, մի հուսահատվեք մեր այս դժվար օրերից և Աստծո պատվիրանները պահելով իր խոսքը տարածեք մարդկանց մեջ ու աճեք եկեղեցում:

Տեսնու՞մ էք: Մեր ժողովրդի մեջ այսօր հեղինակություններ չեն մնացել: Ինչպես Տավուշի թեմից Տեր Աբել Քարտաշյանն էր անցյալ օրն ասում, մենք հատիկ-հատիկ ջարդել ու վերացրել ենք բոլոր հեղինակություններին: Չկա մի հեղինակություն, որին ամբողջ ազգով լսենք և ուշադրություն դարձնենք: Մեր մեջ այնքան չարություն կա, որ մեր միջից վերացվել է հզոր տղամարդը, հզոր հեղինակությունը՝ հաղթող ու առաջնորդող տեսակը: Եվ ասում է, նրանց վրա իշխան պիտի կարգեմ մանուկներին, և նրանց պիտի իշխեն խաբեբաները: Մանուկը ծերի հետ պիտի ընդհարուի, անարժանն՝ արժանաւորի հետ:

Ահա տեսնու՞մ էք ինչպես է լինում ազգի անկման ու գլորման պրոցելը: Եվ այս ամենի վերջում էլ Տերն ասում է «երբ աղօթքի համար դէպի վեր բարձրացնէք ձեր ձեռքերը, երես եմ դարձնելու ձեզանից, եւ եթէ բազմապատկէք ձեր աղօթքները, չեմ լսելու ձեզ, որովհետեւ ձեր ձեռքերը լի են արիւնով» (Ես. 1:15): Այսինքն, չար ու մեղավոր ազգից Աստված հեռացնում է իր աջակցությունը: Ազգը մնում է իր չարության հետ մեն-մենակ:

Հիմա, ինչքա՞ն կշարունակվի այս ամենը: Ղևտացոց գրքի մեջ Աստված ասում է, մինչև որ դուք խոստովանեք որ մեղք էք գործել, ձեր սիրտը հոգոց հանի ու ձեր հեթանոս սիրտն ամաչի: Եվ նույն Եսայի մարգարեի բերանով Տերն ասում է «լուացուեցէ՛ք, մաքրուեցէ՛ք, իմ աչքի առաջ ձեր չար արարքները թօթափեցէ՛ք ձեզնից, վե՛րջ տուէք ձեր չարագործութիւններին։ Սովորեցէք բարի՛ք գործել, արդարութի՛ւն փնտռեցէք, փրկեցէ՛ք զրկուածի՛ն, արդարադա՛տ եղէք որբի հանդէպ, իրաւո՛ւնք տուէք այրուն։ Եկէ՛ք խօսենք իրար հետ, ասում է Տէրը. եթէ ձեր մեղքերը արեան պէս կարմիր են, ապա ես ձեան պէս ճերմակ կը դարձնեմ, եթէ որդան կարմիր լինեն, կը սպիտակեցնեմ ինչպէս բուրդ։ Եւ եթէ յօժար լինէք ու լսէք ինձ, դուք կը ճաշակէք երկրի բարիքները. իսկ եթէ չկամենաք ինձ լսել, սո՛ւրը պիտի ուտի ձեզ, քանզի Տիրոջ շուրթերն ասացին այս» (Ես. 1:16-20):

Տեսա՞ք: Տերն մեզանից ամեն մեկին երկխոսւթյան է հրավիրում: Ասում է եկեք խոսենք իրար հետ. «եթէ յօժար լինէք ու լսէք ինձ, դուք կը ճաշակէք երկրի բարիքները. իսկ եթէ չկամենաք ինձ լսել, սո՛ւրը պիտի ուտի ձեզ, քանզի Տիրոջ շուրթերն ասացին այս»:

Սիրելի բարեկամներ, մենք պետք է իմանանք մեր անկման պատճառը, որպեսզի իմանանք որտեղ փնտրել բարձրացման ճանապարհը: Մենք պետք է իմանանք որտեղից ենք ընկել, որպեսզի իմանանք թէ ուր պիտի բարձրանանք: Մենք ընկել ենք սրբության բարձրունքից ու պիտի բարձրանանք Աստծո լեռը, այսինքն հրաժարվենք ամեն չար բանից ու ջան անենք սովորենք մեր Աստծո Խոսքը և հետևենք իր պատվիրաններին:

Խնդրում եմ, եթե եկեղեցի գնացող չէք, ամեն օր աղոթելու սովորություն չունեք, կամ էլ Աստուծո Խոսքը ջան չէք անում կարդալ ու սովորել ու չգիտեք որտեղից սկսել, ապա պարզ բառերով սկսեք խոսել Աստծո հետ: Երբ ես վերջանցեմ այս խոսքս, ամեն մեկս մտեք ձեր սրտի մի անկյուն ու խոսեք Աստծո հետ: Ասեք Տեր Աստված, ինչն եմ սխալ անում, չեմ տեսնում իմ մեղքերը, ողորմյա ինձ մեղավորիս, օգնիր շտկվել, օգնի փոխվել, նոր սիրտ տուր ինձ: