უძველესი ისტორიული ნივთების ონლაინ გაყიდვა

„მოამბის“ მიერ მოპოვებული ინფორმაციით, შესაძლოა, სამართალდამცველები დაინტერესდნენ. კულტურული მემკვიდრეობის დაცვის სააგენტო შინაგან საქმეთა სამინისტროსთვის მიმართვას გეგმავს.

საუბარია არტეფაქტებზე, რომელთა რეალიზაცია ერთ-ერთ ქართულ ინტერნეტმაღაზიაში ხდება.

საიტზე, რომლის მისამართს შეგნებულად არ ვასახელებთ, ანტიკვარული კოლექციის ჩამონათვალში ჩვენს წელთაღრიცხვამდე პერიოდით დათარიღებული რამდენიმე ნივთიც გვხვდება. მათ შორისაა ბრინჯაოსა და ძველი ქვის ხანის იარაღები, უძველესი სამკაულები და ანტიკური პერიოდის ჭურჭელი. თითოეული მათგანის ფასი საკმაოდ მაღალია.

სპეციალისტები მითითებული ნივთების წარმომავლობის დადგენას მოითხოვენ. არქეოლოგები შავი არქეოლოგიის გახშირებულ ფაქტებზე საუბრობენ და არ გამორიცხავენ, რომ გასაყიდად გატანილი არტეფაქტები არქეოლოგიური გათხრების შედეგად არის მოპოვებული და უნიკალური მნიშვნელობისაა.

ინფორმაციას უკვე იკვლევენ კულტურული მემკვიდრეობის დაცვის სააგენტოში, სადაც ინტერნეტმაღაზიაში წარმოდგენილი ექსპონატების შესახებ „მოამბის“ გადამღები ჯგუფის მეშვეობით შეიტყვეს.

ქეთი ბერაია არკვევდა დეტალებს.