بعد از ایران تاجیکستان هم مهاجران افغان را اخراج میکند

در اقدامی بحث‌برانگیز، دولت تاجیکستان به هزاران مهاجر افغان مقیم این کشور تنها ۱۵ روز فرصت داده تا خاک این کشور را ترک کنند. این تصمیم که به‌طور ناگهانی و بدون اطلاع‌رسانی قبلی اعلام شده، موجی از نگرانی را در میان مهاجران افغان، حتی آن‌هایی که اسناد اقامت قانونی دارند، به‌وجود آورده است.
این اقدام در ادامه سیاست‌های مشابه کشورهای همسایه مانند ایران و پاکستان صورت می‌گیرد که طی ماه‌های اخیر، هزاران مهاجر افغان را به‌صورت روزانه و اغلب اجباری به افغانستان بازگردانده‌اند. با این حال، شرایط در تاجیکستان ابعاد خاص‌تری به خود گرفته، چرا که بسیاری از مهاجران در این کشور از اقشار آسیب‌پذیر هستند و دلیل پناه آوردن‌شان به این کشور، تهدیدات جدی از سوی طالبان پس از سقوط دولت جمهوری افغانستان در سال ۲۰۲۱ بوده است.