شيلة الهايله لأهل الفعول الهايله كلمات/محمد الحويماني اداء/شبل الدواسر

بمناسبة حفل زفاف نايف فيصل ابوعجاريد العتيبي

‎وش أبرك من اليوم هذا ياجميل
‎.. . . اللي ثمان سنين وأنا أخايله
‎الله يقدرني على رد الجميل
‎. . . . للي ملكني طيبه وجمايله
‎البارحه ليلي على صدري ثقيل
‎. . . . ماغير اداري خاطره واحايله
‎وأقول في نفسي وانا بالي طويل
‎. . . . الهايله لأهل الفعول الهايله
‎لين امتلى صدري صهيل ودبك خيل
‎. . . .وعواي ذيب أدناي لين اقصاي له
‎لايحسبون الشعر في ربعي بخيل
‎. . . .أهل النوايا والظنون المايله
‎انا لربعي فالرخاء ظلٍ ظليل
‎. . . . وانا السحاب اللي نثر همايله
‎وان ثارت الهيجاء فأنا السيف الصقيل
‎. . . . اللي يعدون العرب فعايله
‎وان قدموني لابتي لو ربع ميل
‎. . . . عديتهم فوق النجوم الطايله
‎سلام يافيصل سلامٍ مايميل
‎. . . . الطيب وجهه والثناء دلايله
‎من وين أبابدأ فيك وانت المستحيل
‎. . . . فالناس من زوله ليا خصايله
‎الله خلقك ولا خلق غيرك مثيل
‎. . . . انت (اربعينك)(وسم )و (إسم) وطايله
‎عن مثلك الايام يافيصل تحيل
‎. . . . اقولها والناس قبلي قايله
‎كل ( ونعم ) مادورت لأسمك بديل
‎. . . . ياقاصي حدود ( الكفو) واوايله
‎ياشامخ الوقفات يالظلع المهيل
‎. . . . قبل العرب ، روس العرب تهايله
‎اذا رضى ( ودان) صبح وسلسبيل
‎. . . . وروضٍ تخالط عشبه وخمايله
‎واذا زعل يبطش واذا عالوا يعيل
‎. . . . ويوري الدنيا نجوم القايله
‎واذا عطى لاعاد يطري لك قليل
‎. . . . تغيّر احوال البشر قلايله
‎كفٍ ( تمد ) و كف لا مدت (تسيل )
‎. . . . دايم وابو نايف كفوفه سايله
‎جزايله فالناس ماتبغى دليل
‎. . . . جزايله جزايله جزايله
‎كنه على حاجات خلق الله وكيل
‎. . . . تكبر على غيره وعنده زايله
‎فضايله جمه وانا شعري سبيل
‎. . . . عساه ياصل لو بعض فضايله
‎عسى سفر في جنة المأوى نزيل
‎. . . . اللي هذا ذخره وذي سلايله
‎سلم على نايف وقله ياجميل
‎. . . . واخذ الكلام اللي ينومس قايله
‎فيصل تجمل بي وذا رد الجميل
‎. . . جيته من الحد السعودي شايله
‎ماللجزيل الا اطيب الشعر الجزيل
‎. . . . والهايله لأهل الفعول الهايله