Зираттағы тылсым дүние! Шымкентте бейіттер аршылып, топырағы үңірейіп ойылып қалған

Шымкенттің Қайтпас елді мекеніндегі мазаратта бейіттер аршылып, үйілген топырағы үңірейіп ойылып жатыр. Мұны байқаған кейбіреулер "бұл әдейі істелген әрекет" деп әлеуметтік желіні шулатқан. Бірақ ауыл ақсақалдары мен дін өкілдері мүрделердің топырағын толассыз жауын ойып жіберген дейді.
МАҚСАТ ЖАҚСЫБАЙҰЛЫ, тілші:
– Бір айға жуық уақыт бойы күнделікті толассыз жауған жауынның салдарынан бейіттердің басы аршылып кетіп жатыр. Қайтпас елді мекеніндегі 50-ге жуық мүрденің жайы осындай. Мәйіттерге су өтіп кетпес үшін жұртшылық мынадай клеенкалармен жауып қойған.
Көр қазушылар мен жергілікті жұртшылық мазар басында бейіттердің басын қайта жабуға кіріскен. Оған бүгінгі ауа райы да қолайлы. Шеттен топырақ тасымалдап, тағы да жауынға қалмастан, мүрделердің бетін жабуға үлгеріп қалмақ. Әу баста, бұл жағдайды байқаған бәз біреулер әлдебір қаскөйлер әдейі істеген деп, әлеуметтік желіде жұрттан көмек сұраған еді. Байбына бармағандар қалың қауымның үрейін ұшырған дейді мұндағы жұмысшылар.
АТАБЕК ДАВЛАТОВ, көр қазушы:
– Мүрденің төбесі құлаған. Ал қыштары тұр жанында. Түсінбейтін адамдар көп, сөйтіп айтыпты кеше естідік. Мына қарасаңыздар өздеріңіз, еш денесі көрініп жатқан жоқ. Сосын кейбіреулер айтыпты, қазып, органдарын алыпты. Алла сақтасын, ондай болмаған.
Мидай тегіс бұл жазық жер кезінде бидай алқабы болған екен. Көр қазушылар бейіттердің бұлай аршылуына бұл маңдағы құнарлы топырақ та себеп болуы мүмкін дейді. Ылғал түссе бірден лайға айналатын аумақты адам жерлеуге келмейді деп, күні кеше ғана кейбіреулер мәйіттерді қайта қаздырып алуға ұмтылыпты. Тек имамдар бұған дер кезінде тосқауыл қойған.
ДАСТАН ЖЕЛЕУОВ, Қаратау ауданының бас имамы:
– Бұл жерден қайтадан қазып алу керек, тағы басқадай жағдайлар жасап, қайтып ішін дұрыстаймыз деген ниетпен жүрген азаматтар болды. Ол негізі шариғатымызда құпталмайтын, Қазақстан Мұсылмандары Діни басқармасының бұл жөнінде пәтуада да, бұны тек топырақпен қайтып көміледі. Әруақтарды, жатқан мәйіттің денесін қорлап, оны мазалауға рұқсат етілмейді.
Бас имам жерлеу кезінде көр қазушылардың кейбір тұстарды ескермей қалуы мүмкін екенін де жасырмайды. Ал әкімдік енді өзге жердің топырағын алдырып, бейіттің басын сонымен бекітіп көрмек. Демеушілер есебінен ашық қалған мүрделерді осылай жаппаса, қазынадан оған қаражат қаралмаған.
НҰРЖАН ДҮЙСЕНОВ, Қаратау ауданы әкімдігінің бөлім басшысы:
– Ауданда 25 осындай мазараттар бар. Соларға 29 млн теңге ақша бөлінген. Күтіп ұстау, мазараттардың шөбін ору, мусорын тазалау, талын кесу, қоршаудағы сынған жерлерін жөндеу сияқты жұмыстарға арналған ақша.
Ауыл жұрты мен дін өкілдері бұның бәрі табиғаттің ісі дейді. Күн райы қолайлы болса, бірер күнде бейіттер түгелдей қалыпқа келтіріледі деп отыр.
Мақсат жақсыбайұлы, Алексей Мавнуков



Бізді әлеуметтік желіде оқыңыздар:
Youtube -   / @informburo31kanal  
Facebook -   / informburo31  
Instagram -   / informburo31  
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#бейіт #зираттағы_тылсым #Ислам #қабір