МҚҰ-лардың жауапкершілігін арттыру туралы

Банктік емес ұйымдарды реттеу департаментінің бас маманы Назар Қалибек МҚҰ-лардың жауапкершілігін арттыру туралы жайлы айтып берді:

"Қазақстан Республикасының Қаржы нарығын реттеу және дамыту агенттігі қаржылық қызметтерді тұтынушылардың құқықтарын қорғау мақсатында микроқаржылық қызметті жүзеге асыратын ұйымдардың әкімшілік жауапкершілігін күшейту үшін бірқатар шаралар қабылдады.Тиісті өзгерістер 2025 жылғы 10 қаңтарда Әкімшілік құқық бұзушылық туралы кодекске енгізілді. Осылайша, Кодекстің 211-бабына жарнаманы тарату және орналастыру кезінде жылдық тиімді сыйақы мөлшерлемесін көрсетпегені немесе дұрыс көрсетпегені үшін әкімшілік жауапкершілікті көздейтін түзетулер енгізілді, 50 АЕК (айлық есептік көрсеткіш) мөлшерінде айыппұл көзделген. Бұдан басқа, Агенттікті микроқаржы ұйымы, кредиттік серіктестік немесе ломбард ретінде тіркеу туралы хабарламағаны не уақтылы хабарламағаны үшін жауапкершілік енгізілді, 20-дан 40 АЕК-ке дейінгі мөлшерде айыппұл белгіленді.

Агенттіктің және Қазақстан Республикасы Ұлттық Банкінің 2024 жылғы 19 тамыздағы бірлескен қаулысымен жылдық тиімді сыйақы мөлшерлемесінің шекті мөлшері айқындалды. Мәселен, микроқаржылық қызметті жүзеге асыратын ұйымдар ұсынатын микрокредиттер бойынша – 46 (қырық алты) пайыз;
Күнтізбелік қырық бес күнге дейінгі мерзімге берілетін микрокредиттер бойынша АЕК мөлшерінің қырық бес еселенген мөлшерінен аспайтын мөлшерде – күніне 0,3 (нөл бүтін оннан үш) пайыздан кем, бірақ 179 (жүз жетпіс тоғыз) пайыздан аспайтын мөлшерде.

Агенттік бақылау және қадағалау органы ретінде микроқаржы ұйымдарының қызметіне заңнаманың сақталуына, оның ішінде субъектілердің әрекеттеріне азаматтардың шағымдары мен өтініштері не бұзушылықтардың бар екендігін көрсететін өзге де ақпарат келіп түскен жағдайда тексерулер жүргізуге құқылы. Бұзушылықтар анықталған жағдайда микроқаржы ұйымдарына тексеру нәтижелері бойынша шаралар қолданылады, оның ішінде айыппұлдар салынады."

#ҚНРДА #МҚҰ