What is Six Sigma? ما هي الستة سيجما

ايه هى ال 6 سيجما (6 Sigma)
تخيل انك مدير انتاج احد مصانع السجاد و مطلوب منك انتاج سجادة عرضها 1 متر عشان تتفرش بين القاهرة و اسوان, يعنى طولها 1000 كيلو متر, و مطلوب انك تنتجها صح من اول مرة و العميل مش هيقبل عيوب الا فى حدود مساحة 3 متر و 40 سم من المليون متر اللى انت هتصنعهم, الحقيقة انك مش هتقدر تحقق المتطلبات دى إلا اذا كان مصنعك بيشتغل بمنهجية 6 سيجما
فى بداية تمانينات القرن العشرين كان احد اهداف شركة موتورولا(Motorola, Inc) هو خفض عيوب التصنيع ل 10% فى خلال 5 سنوات, بيل سميث (Bill Smith) نائب الرئيس التنفيذى لموتورولا فى الوقت ده اطلق ال 6 سيجما لأول مرة بالاعتماد على ادوات احصائية و مبادىء ادارة الجودة زى مبادىء ديمينج ال 14 و خطوات جوران ال 10 و غيرها, بعد كده جاك ويلش (Jack Welch) رئيس جنيرال الكتريك (General Electric) تبنى الفكرة مع بعض التعديلات و التطورات و طبقها فى شركته و بكده اصبحت ال 6 سيجما قابلة للتطبيق فى اى مكان, موتورولا و جنيرال الكتريك اعلنو انهم وفرو عشرات الملايين بعد تطبيق ال 6 سيجما,
الهدف الرئيسى لل 6 Sigma هو التعامل مع الانحرافات (Variations) و بالتالى تقليل العيوب (defects) بالاعتماد على خمس خطوات اساسية (DMAIC)
تعريف (Define), قياس (Measure), تحليل (Analyze), تحسين (Improve), تحكم (Control)
اثناء تطبيقك لل 6 سيجما هتتعرض بالتفصيل لمفاهيم كتير زى
ضروريات الجودة (Critical to Quality), العيوب (defects), قدرة العملية (Process Capability), الانحرافات (Variations), ثبات العمليات (Stable Operations), التصميم لغرضال 6 سيجما (Design for Six Sigma)
افتكر دايماً ان تطبيق ال 6 سيجما هيساعدك على تحسين العمليات, و تقليل الانحرافات و العيوب, خفض التكاليف, زيادة رضا العملاء, زيادة الارباح
افتكر كمان ان ال 6 سيجما ممكن تطبيقها على كل الانشطة بما فيها التصميم مش بس فى الانتاج زى ما بعض الناس بتتخيل, و ان 6 سيجما مش معادلات احصائية صعبة او مستحيلة, و لا هى مجرد تدريب نظرى, و الاهم انك تفتكر انك مش لازم تكون بتشتغل فى وكالة ناسا أو مطار طوكيو او فى التكنولوجيا النووية عشان تستفيد من منهجية 6 سيجما, و مش بالضرورة كمان ان هدفك يكون الوصول ل مستوى جودة 99.9997% , مؤسسات كتير مش بتحتاج للمستوى العالى ده لكن بتستفيد من منهجية 6 سيجمالتحقيق المستوى المناسب لطبيعة عملها
البوست ده كان مجرد فتح شهية لأعضاء الصفحة عشان يشاركونا بتجارهم و ارائهم و المشاكل اللى قابلتهم اثناء تطبيق ال 6 Sigma