Алқабилер сотының қызметіне деген сұраныс артып келеді

Биыл еліміздегі алқабилер сотында қаралған істің қатары күрт көбейіпті. Оған түрткі болған түрлі себеп бар екен.

Астанада өткен халықаралық сарапшылар конференциясында осы жағдай жан-жақты талқыланды.

Алқабилер сотының қызметіне деген сұраныс неліктен артқан? Бұл нені білдіреді?

Халық ішінен шыққан кәсіби заңгер емес адамдарды қатыстырып сот әділдігін атқару, үкім кесу - ол демократиялық, құқықтық мемлекеттің бір белгісі. Осы белгінің бедері айқындала түсті.

Алқабилердің қатысуымен шығарылған үкім көбейген сайын елдің сотқа деген сенімі артты. Бұл өте маңызды мәселе. Қарап көріңіз, алқабилер шығарған жалпы үкімнің 8,5 пайызы сот залындағы күдікітіні ақтап алыпты.

Кәсіби судьяларда бұл көрсеткіш әлдеқайда төмен.

Әділ Құрықбаев, ҚР Жоғарғы сотының судьясы

-Сотқа дейінгі тергеп-тексеру органдарының жинаған дәлелдеріне халық өкілдерінің сенбеуі салдарынан, олар халық өкілдерінің сеніміне кіре алмағандықтан, болмаса соны жеткізе алмағандықтан, дәлелдердің аздығынан ақтау үкімдерінің шығып жатқаны сол.

Демек алқабилер соты тергеу органдары мен айыптаушы прокурордың жұмыс сапасының қаншалықты деңгейде екенін көрсетіп отыр ғой. Осыдан кейін олар да ойланатын болар?

Ал күдіктіні қорғаушы дәлелінің далада қалмайтынына сенімді болды. Десе де бұл жүйенің жетілдіре түсетін тұсы көп. Сарапшылар шетелдің озық үлгілерін салыстыра отырып, өз еліміздің өмір сүру қалпына, түсінігіне лайықтап ендіру керектігін айтады.

Николай Ковалев, құқықтық саясатты зерттеу орталығының аға ғылыми қызметкері

-«100 нақты қадам» керемет жоспар. Бұл мемлекет тарапынан сот әділдігін атқарудың алдағы уақыттағы жолын көрсетіп отыр. Тек соны тездетіп жүзеге асыру керек.

Әбдез Рахманұлы, тілші

-Алқабилер қатарында болған азамат соттың қалай, қандай шешім қабылдағанына куә. Өз еркімен, ешкімнің қысымынсыз қабылдады. Демек сот шығаратын шешімдегі әділдік артты деген сөз.

Әзірге Қазақстанда алқабилер ауыр қылмыс түрлеріне ғана үкім шығара алады. Осы уақытқа дейінгі жиналған тәжірибе екшелген соң, өзге қылмыс түрлеріне де үкім айтады деген үміт бар.