Leshnica, fshati që e ka marrë emrin nga lajthitë-Story nga Artin Halili

Leshnica është vetëm 10 km larg nga Pogradeci, një fshat i bukur, të cilit hijeshinë ja shton edhe tokat e punuara që ngjasojnë si qilimat e punuar me dorë nga gratë artizane. Është pjesë e njësisë administrative Çerravë dhe një nga fshatrat me popullsinë më të lartë të saj. Fshati ka një shtrirje gjeografike të realizuar si me dorë, gjatë gjithë ditës ai rrihet nga dielli, ka toka fushë me bollëk, ka një lumë të vogël dhe një pyll me gështenja, pa harruar këtu hektarë të tërë kodrash me rrush. Banorët këtu karakterizohen si njerëz të qetë, besnikë, e puntorë të cilët nuk ja përtojnë punës me tokën. Më së shumti njihen për prodhimet në fruti kulturë, si mollë, qershi dhe varietetet e ndryshme të rrushit. Rezulton i banuar rreth 300 vite më parë dhe mendohet se fiset e para të kenë qenë të krishtera, por pak dihet për to, kjo faktohet edhe nga emërtimi që ka pjesa e sipërme e fshatit, pranë lumit dhe rrëzë pyllit me gështenja, zonë e cila njihet nga banorët me toponimin tek Kisha, çfarë nënkupton se vite më parë në zonë ka qenë e ngritur një kishë, por që sot nuk ka asnjë gjurmë rreth saj. Një karakteristikë tjetër mjaft e veçantë e Leshnicës është pylli me gështenja dhe lajthi që ka ekzistuar në në zonë, banorët të tregojnë se gështenjat shelullore kishin drurë aq të mëdhenj saqë do të duheshin 3 burra për ta rrethuar. Ndërkohë prania e një pylli me lajthi lidhet drejtpërdrejt me emrin e fshatit. Leshnicë është emrë sllav i vendosur në kohën e pushtimit bullgar, të cilët vendosjen e emrave në sllavisht e lidhnin gjithmonë me një veçanti të zonës, Leshnicë në shqip merr kuptimin zonë me shumë lajthi dhe këtë e konfirmojnë edhe tregimet e më të moshuarve.
#lake #travel #story #dokumentar #pogradec #podcast #roads #construction #village #villagelife #viralvideo #viralshorts #villagevlog