Galegos no mundo - Programa 37: Newark

Emitido o 11/7/12 na TVG. Historias dos que cambian de rumbo por distintas cuestións da vida vólvense cruzar na axenda de traballo de "Galegos no Mundo", que presentará esta vez seis galegos residentes en Newark, unha cidade situada no estado norteamericano de Nova Jersey, importante centro industrial, comercial e de transporte. Amais de ser unha das localizacións principais da famosa serie "Os Soprano" e de estar preto da Universidade de Princeton, un dos máis afamados centros de estudo do mundo, a cidade ten algo especial, pois está chea de galegos que a mediados do século pasado marcharon buscando unha saída profesional na industria ou no porto.

Coñecerase a actualidade da colonia galega, aínda moi ampla, que co tempo e o traballo acabou ocupando importantes postos en empresas e sectores estratéxicos. Desde a popularmente chamada "cidade dos ladrillos", o programa achégase á vida de seis galegos que falarán das posibilidades desta cidade, como María José, natural de Seixo (Marín), que desde hai cinco anos imparte clases de español na Universidade de Princeton e amosará a vila do mesmo nome; Sergio Seijas, orixinal de Celanova (Ourense), que leva 28 anos aquí e preferiu abrir o seu restaurante, "Spain 92", e Miguel González, de Ourense, xubilado despois de 40 anos, con quen se visitará un dos desfiles máis multitudinarios que se fan nos EUA no especial Día de Acción de Grazas.

Con Elvira Iglesias, de Gomesende (Ourense), falarase algo máis da vida desta empresaria, unha das poucas mulleres á fronte dunha empresa de construción en Newark, promovendo e construíndo xunto á súa socia vivendas de protección oficial para a xente máis necesitada; Raúl Gil, de Betanzos, que despois de retirarse na vila de Montclair se gaña a vida rehabilitando casas, é fotógrafo e restaurador de guitarras, e Adelino Benavente, natural de Vilaboa (Pontevedra), que acaba de retirarse do seu traballo de policía en Newark, quen conducirá aos espectadores á vida do porto e gozarase das vistas do "skyline" de Nova York.