နန်းသိင်္ဂီမြိုင်ထ - မန္တလေးသိန်းဇော် + ခိုင်သဇင်သင်း | Nan Theingi Myaing Hta - Mandalay Thein Zaw

အဘ အမယ်ကြီးအို(ဦး)အောင်စိန် ပြောဖူးသည် -

“နောင်ဆိုရင် ဇာတ်ကြည့်ရဖို့ မလွယ်တော့ဘူး၊ ပွဲ ဘဲကြည့်ကြရလိမ့်မယ်” တဲ့

#ဇာတ်ပွဲ ဟူ၍ တွဲဖက်သုံးနူံးကြသော်လည်း ဇာတ်နှင့် ပွဲ၌ ထပ်မံကွဲပြားသော အနက်အဓိပ္ပါယ်တို့ ရှိချေသည်။ တချို့ကား ဇာတ်နှင့်ပွဲကို မဆိုထားနှင့် အငြိမ့်နှင့်ဇာတ်၊ အငြိမ့်ခန်းနှင့် နှစ်ပါးသွားခန်းကိုပင် ကွဲပြားစွာ မခွဲခြားနိုင်ကြတော့။ ခေတ်အပြောင်းနှင့် အသစ်အဟောင်းတို့၏ နိယာမကို မလွန်ဆန်နိုင်သော လူနှင့် လူ့ပတ်ဝန်းကျင်တွင် ရိုးရာယဉ်ကျေးမှုအနုပညာအမွေအနှစ်တို့သည် တချို့မှုန်ဝါးခဲ့၏။ တချို့ကားတိမ်မြုပ်၍ တချို့မူ အပြီးတိုင် ပျောက်ကွယ်ကုန်သည်။

၎င်းအနုပညာအမွေအနှစ်တို့အား တန်ဘိုးထားသူ၊ နှမျောတသသူ၊ ထိန်းသိမ်းလိုသူ၏ ရင်ထဲမှ မေးခွန်းတချို့အား မြတ်နိုးသောစိတ်အစဉ်ဖြင့် ကျိုးနွံစွာဖော်ပြလိုပါ၏။

သင် #မြန်မာ့ဇာတ်သဘင် ကို သိပါသလား?

မြိုင်ထဆိုတဲ့ ရိုးရိုးတေးလည်းမဟုတ်၊ မဟာဂီတသီချင်းလည်းမဟုတ်(တေးသီချင်းလည်းမည်၏၊ မဟာဂီတလည်းမည်၏) လို့ပြောရမယ့် #မြိုင်ထ ခေါ်တွင် သဘင်ပညာခန်းကိုရော သိပါသလား၊ မြန်မာ့ဆိုင်းပညာရှင် မြန်မာ့ဇာတ်သဘင်မြိုင်ထတို့၏ဂုရု တေးပြုစာဆို ဆရာ (#ရွာစားကြီးစိန်လှမြိုင်) ဆိုတာကိုရော သိပါသလား၊ ဇာတ်မင်းသားလေးသိန်းဇော် (ခေါ် ) #မန္တလေးသိန်းဇော် ကို သိပါသလား၊ ယဉ်ကျေးမှုတက္ကသိုလ်ဆရာမ အဆိုအကသဘင်ပညာရှင် #ခိုင်သဇင်သင်း ကို သိပါသလား၊ #မဟာရန်ကုန်စံပြမြစည်သူ ဆိုတဲ့ ရွာစားကျော်ကိုရော သိပါသလား?

ဤမျှ များပြားလှစွာသော မေးခွန်းတို့၏ တစ်ခုတည်းသောအဖြေမှာကား …#နန်းသိင်္ဂီမြိုင်ထ ပင် ဖြစ်ပါသည်။ တေးပြုစာဆို ရွာစားကြီးစိန်လှမြိုင် ပြုစုရေးဖွဲ့ (ယခင် ဇာတ်မင်းသားကြီးတိုင်းချစ်သန်းစိန်သီဆိုဓာတ်ပြားသွင်းခဲ့)၊ ယခု မန္တလေးသိန်းဇော်နှင့် ခိုင်သဇင်သင်း တွဲဖက်သီဆို၍ ရွာစားကျော်မြစည်သူနှင့် မြန်မာ့ဆိုင်းဂီတပညာရှင်များပေါင်းစုတီးမှုတ်သည့် နန်းသိင်္ဂီပင် ဖြစ်ပါသည်။ အရုပ်မှတ်တမ်းအဖြစ် မိမိ လေးစားစိတ်၊ ချစ်ခင်စိတ်ဖြင့် ဂါရဝပြု ပါဝင်ကူညီ ကပြခဲ့သည့် ဇာတ်မင်းသားကြီး အလင်္ကာကျော်စွာရွှေမန်းတင်မောင်နှစ်(၈၀)ပြည့် ဂုဏ်ပြုကပွဲမှ ကပြမှုများအား မှတ်တမ်းတင်အမှတ်တရ ထည့်သွင်းဖော်ပြပေးသည့် ကိုတင့်လွင်မိုး (တည်းဖြတ်)နှင့် အသံဖမ်း EMS စတူဒီယို၊ အသံပေါင်းစပ်မှု ဦးစိုးမိုး၊ ဂူဂူးတို့ကိုလည်း ကျေးဇူးအထူးတင်ရှိပါသည်။

မိမိ၏ AZADA Art Myanmar မှ သဘင့်ဂန္ထဝင်ဖြစ်သော နန်းသိင်္ဂီမြိုင်ထ ဖော်ထုတ်တင်ဆက်ခြင်းဖြင့် မြန်မာ့ဆိုင်းပညာရှင် ရွာစားကြီးဦးစိန်လှမြိုင်နှင့်တကွသော ခေတ်အဆက်ဆက် သဘင်ဂီတ ဖန်တီးမှုပညာရှင်များအား ဇာတ်သဘင်ပညာချစ်မြတ်နိုးသူများနှင့်အတူ ဂုဏ်ယူမြတ်နိုးစွာ ဦးညွတ်ဂါရဝပြုအပ်ပါသည်။

#များမကြာမီ Mandalay Thein Zaw YouTube Channel မှ တင်ဆက်ပြသပါမည်…

မန္တလေးသိန်းဇော်
AZADA Art Myanmar