نشف شط الكصص ونشطب رب الهم قصيدة بقافية متميزة للشاعر ناصر البدري

الكلمات










نشف شط الكصص ونشطب رب الهم
والا عثرة هوة تحرك سراكي الدم


أحس روحي . .
ضوه مصلـوب . .

شـما جاستـه زلـوف الريح 
يتـكسر بحضن الماي 

وبهـداي أحترگ بهـداي 
گـضه عمره الشمع من يحترگ سكته 

وين الـگه اليـهيسني 
درفعني الحزن حـد ماصرت كاروك 

وصـواني الـحيف . .
تتبـده بتجاعيـدي . . 
من تلـچمني الـمرايات 

خذتـني الحسبه لآخر نجمه بــ تاريخ 

وصوتي 
يكسر المحراب ،،

چا يمتـه الـذمم تنـجاس 
ساعه الـكأس بيه يـدير 
وساعه أنـدار فوك الـكأس 

وتـوبن ليش . .

مهي التوبـه 
عـروس الكيف 
مو فصليـه للـقران 

أنـه أنسان . .
شايـل من زليخـه هواي 
لـچن مامـش صنـم يسوه 

عساهـا بـكل وحي 
ماقدس المعبـد ،،

سبحـانك 
يـفيض الـغوث ،،

شني ذنبـه ويـطيح الغيـم 
من يطوطـح الـدخان 

وشنـي ذنـبي . .

عـايشـلي بحلم تايـه 
لا لاگـيلي عين تنـام 
ولا لاگـي الـيفسرني 

واضحك . .
من تـگلي الناس هـنيالك

هـنيالي عليمن 
عـلـ حزن عـلـ غربـه هـنيالي 

بـنادم . .
ضال طـرگ الطـين 

لـو عندي 
بخت ممـلوح 
چـا طحت بـوجه موسى 
روج الشيب واصـل كسرة الـحاجب

وكـل تابوت . .
يخـزرني خزر عاهـر 
لـو مشطت عشريـني 

ومدري أشـچم كمر ماشيت 
ولا واحد تـرس عيني 

أشوف الناس . .
تتبـده شليل أوجـوه
من يثـگل حجي الغربيل 

وعفيـه أوجـوه . .
تغـفه بـنية أسليمان 
وتغـني بحلم بلقـيس

چا عدمن أضم روحي 
الـيضم حلمه بـحضن فانوس 
ينباگ بشبر هندس 

ولو أدري . .
بـعيوني أتـوب 
چا ماصـلي للـقمصان 

بس مجبور . .
السچـه التنـثلم تكسر ضهر لــ ريل 

شـينفع حضن الـولايات 
الـماعنده عرف بلــ آخ 
وكت اليل ويـن يبـات 

تعبت هواي . .

رسايلـهم ملح صبخـه 
وأنـه بـكل مطر ساعي

وهـذا أنـه . .

من فزن نثـايـه اليل 
شـلت حـرزي 
نـوبات الرسالـه أتصيـر علـويـه 

عزيز النخل وكت العـوز 
يـحلفـون بــ تراچيـه 

بـيش أنـعاك . .
ياتفاح كـل جبريل 

أوين الـگاك . .
ياسلطان كل گمره 

ويــ الـحضنك دفو السبعين 
تعال وخـل ترد روحي 
وخـل نـختمر طين بــ طين 

وحـگ الـيوجعني . .
بـكل هـلا متانيـك . .

أنـه بدونـك 
مضيف أذنـوب 
وجـواز السفر لــ توبـه تـتن يلـهث 
طاح بشفـة المنـهوب 

أنـه بدونـك . .
حجل فصليـه !
زفوهـا أعله كـل داود 

وتـانيتـك . .

تـانيتـك خرايب وهـگ بيـها الخوف 

وأنتـه ولا ضعن منـك 

شـبشرنـك . .
يخفگـني السبي شراعـين 

لو مرن هـوادج شايـلات أسمك 

وشهـگك شهگـة الـمروح . .
من تـگرم ضلوعـه الگاع . .

شمـالك ياعطيت الله 
چم يعـگوب شگـگني 
ولا مـريت 
ولا چنـك بـزر حضني 

ربـيتك غصن مبيـوع لــ دخان 
چي شافـوك محراب الـعصافيري

ماتلـگه وطن مثـلي 
تعال وسافر بروحي 
أنـه وياك واحد وطن لــ ثاني . . 

ناصر البدري