СУРХОНДАРЁДАН ПРЕЗИДЕНТИМИЗГА МУРОЖААТ! МУРҒАК ГЎДАКЛАР КЎЧАДА ҚОЛМАСИН.

Денов шаҳри "А.Жомий" маҳалласи Жомий кўчаси 39-уйда яшовчи фуқаролар номидан Президентимизга мурожаат!

Сурхондарё вилояти Денов шаҳридаги Жомий кўчаси 39-уйда яшовчи оила аъзолари қишнинг қаҳратон палласида мажбурий чиқариб юборилиш остонасида қолгани ҳақида Президентимизга мурожаат йўллашмоқда.

Уларнинг айтишича, Мажбурий ижро бюроси ходимлари хонадонда яшовчи фуқароларни уйдан чиқариш бўйича ижро ҳаракатларини бошлаган, аммо оила мурғак гўдаклар билан қаерга боришини билмай сарсон.

Мурожаатда таъкидланишича, ушбу уй марҳум оила бошлиғи томонидан 2019 йилларда гаровга қўйилиб, Саноат қурилиш банкининг Сариосиё филиалидан тахминан 300 млн сўм кредит олинган. Карантин даврида қарздорлик юзага келган бўлсада, мурожаатчиларнинг айтишларича, карантин вақтидаги 6 ойлик имтиёзли давр инобатга олинмаган ва уй аукционга қўйилган.

Бироқ энг қизиқ жиҳат шундаки, мурожаатчиларнинг айтишига кўра, аукцион ҳақида ҳеч қандай эълон берилмаган, онлайн платформада ҳам, ОАВда ҳам маълумот чоп этилмаган. Айтишларича, бино аукционсиз, Сариосиё туман Саноат қурилиш банк ходимига қариндошлик алоқалари бўлган яъни ҳам ҳолабачча ҳам божаси бўлган шахс Тошкент шаҳрида яшовчи асли Олтинсойлик С.Маматрахимовга 384 млн сўмга, 5 йилда бўлиб тўлаш шарти билан сотилган. Уйнинг бозор баҳоси эса 70–80 минг доллар экани айтилмоқда.

Оила Маматрахимов С. билан учрашганини, аммо у уйни 1,5 млрд сўмдан камига қайтариб сотмаслигини билдирганини айтишмоқда.

Мурожаатда қуйидаги саволлар очиқ қолмоқда:

Нега аукцион ҳақида онлайн эълон берилмаган?

Нега хонадон эгалари хабардор қилинмаган?

Нега уй айнан банк ходимига қариндош бўлган шахсга сотилган?

Банк ходимининг Тошкентда ҳам ишлаб ҳам яшовчи қариндоши эълон берилмаган, газета ва журналларда чоп этилмаган, ижтимоий тармоқда айтилмаган аукцион савдо ҳақида қандай хабар топган?

Аукционсиз мулк сотилиши, айниқса Президент қарори билан жорий қилинган онлайн савдо талабларига зид эмасми?

Мазкур ҳолатлар юзасидан банк ходимига нисбатан хизмат текшируви ўтказиш, ноқонуний бўлиши мумкин бўлган ҳаракатларга ҳуқуқий баҳо бериш ва хонадон эгаларига амалий кўмак кўрсатиш бўйича хонадонда яшовчи фуқаролар илтимос қилишмоқда.

Изоҳ: Мақолада баён этилган маълумотлар мурожаатчилар сўзларига асосланади. Муаллиф ҳеч бир иддаони тасдиқламайди ва ҳуқуқий баҳони ваколатли органлар ихтиёрига қолдиради.