სტიქია გურიაში და გარესამყაროს მოწყვეტილი სოფლები

„69 წლის ვხდები ახლა და ასეთი თოვლი აქ არ მახსოვს“, - გურიაში მე-5 დღეა სტიქიაა. დღის ბოლოსთვისაც კი, ოზურგეთის სოფელ კონჭკათამდე და კიდევ რამდენიმე დასახლებამდე სამანქანო გზა გაუვალია. კონჭკათში მცხოვრები ახალგაზრდა, დიალიზდამოკიდებული კაცი, საავადმყოფოში მაშველებმა გადაიყვანეს. მას უკვე ერთი კვირაა სავალდებულო სამედიცინო პროცედურა უცდებოდა. მაშველების მანქანაც თოვლში ორჯერ ჩავარდა და ტრაქტორმა გამოიყვანა. სტიქიას შუახნის მამაკაცი ამ სოფელში ემსხვერპლა. ის მეზობელს სახლის სახურავის გადათოვლაში ეხმარებოდა, რა დროსაც მეორე სართული ჩამოინგრა და მამაკაცი ნანგრევებში მოჰყვა.