Айдын Айымбетов ғарышта Арал мен Каспийді қарайды

Қазақстандық ғарышкер Айдын Айымбетовтің аспанға сапары 2-ші қыркүйекте басталып, 10 күнге созылады. Осы аралықта ол халықаралық ғарыш станциясында болып, онға жуық ғылыми сынақ жұмыстарымен айналысады.

Атап айтқанда, ғарыштық мониторинг пен биотехнология және биомедицина, физикалық сынамалар, еліміздегі экология жағдайы, әсіресе Арал мен Каспийдің қазіргі тағдыры зерттеледі.

«Бұл отандық ғалымдардың ісіне үлкен көмек болар еді», - дейді әуе ғарышы комитеті төрағасының орынбасары Еркін Шаймағамбетов.

Айымбетов ғарышқа ет, ірімшік, айранды да ала кетеді. Қазақтың ұлттық асы аспан әлемінде Айдынға қуат беріп, жұмысын жандандыруға сеп болуы мүмкін.

Халықаралық ғарыш станциясында отандасымыз қазақ хандығының 550 жылдығы мен ЭКСПО-2017 секілді атаулы іс-шаралар жөнінде жаһанға жар салады.

Екінші бортинженер болып ұшатын Айымбетовтың сапарына Ресей тарапы 20 миллион доллар бөледі. Қазақстан бұл шығынды келер жылы қайтаруды жоспарлап отыр.