Bamubeshyeye ko yaroze Umwami RWOGERA || Insigamigani Amazimwe yashiriye i Gishike

AMAZIMWE YASHIRIYE GISHIKE: Uyu mugani bawuca bawerekeje aho inteko y'inkeke ihangukiye; ni ho bitirira Gishike, bakavuga, ngo: «Amazimwe yashiriye Gishike!» Wakomotse kuri Rugereka w'umwega, wari utuye mu Nkobwa za Gishike; ahasaga umwaka w'i 1800, mu gihe Rwabugiri yimaga ingoma.
Mbere y'urwo rwimo uwo mwega Rugereka yari umutoni wa Rwogera se Rwabugiri akaba batoni bakadasohoka, agatura ku Rwesero mu Busanza bwa Nyabisindu, ubu ni karere ka Nyanza, akagira n'urundi rugo mu Nkobwa za Gishike.

Aho Rwogera atangiye kuko umwami ntapfa aratanga, hahise hima umuhungu we Rwabugiri. Ubwo Rwogera akimara gutanga, Rubanda bahimbiye Rugereka wa mutoni we, ubugome bunyuranye; bamwe, bati: «Niwe waroze Rwogera, na Nkusi na Rubega, abao ni abandi bamugerekagaho, abandi, bati: Ni we wishe imvura mu Rwanda; kuko muri icyo gihe hari harateye amapfa, inzara isaganya u Rwanda; ni ko kuyitirira uwo mugabo, bati: «Iyi nzara ni Rwarugereka, ibyo byose bakabivuga kugirango ubugome buhame, kandi bugire uburemere.
Kuva ubwo batangira kumwanga, ariko babura inzira yo kumutanga. Rugereka amaze kubimenya yigumira iwe, agumya gushyamirana na Murorunkwere nyina wa Rwabugiri; muribuka inkuru y’uko ngo baba bararyamanye, kuko icyo gihe n’ubundi Rwabugiri bamwimitse akiri ikibondo( muto cyane), ndetse yari akitwa Sezisoni: iryo niryo ryari izina rye bwite yiswe na se Nkoronko ya Gahindiro, warongoye Murorunkwere; irya Rwabugiri ni we waryiyise ubwe, amaze kugimbuka aryambuye uwari nyiraryo amwita Rwakageyo.
Amazimwe rero ya Rugereka ahererekanwa ibwami no kwa Rugereka: ibwami bagakeka ko Rugereka azatwarana akabatera, na we agakeka ko ibwami bazamutera; bituma yigumira iwe. Nuko ibwami bagahora bashaka kumutera, ariko bakamutinya, kuko yari afite ingabo z'intwari; amazimwe aba ari yo akomeza kwiyongera.

Bimaze gushayisha, ibwami bagera ingabo zo kumutera. Rugereka arabimenya, na we araza inkera yo kuzarwana n'ingabo z'ibwami. Mu gitondo iz'ibwami ziratera, ubwo ingamba zombi zirambikana bararwana rubura gica.
Rugikubita, Abagereka bakubita inshuro ingabo z'ibwami, bazigeza mu Rukari rwa Mwima na Mushirarungu; ubu ni mukarere ka Nyanza, ni ho ibwami bari batuye. Ingabo z'ibwami zimaze gusumbirizwa, zikabamo umugabo w' umushakamba, Rukeramihigo rwa Sentimbo ya Kazenga ka Ndabarasa, aragagaza yihagararaho agarukana Abagereka, ingabo z'bwami nazo zibakubita inshuro, zibageza ku Rwesero. Aho hose n’ubundi ni muri Nyanza. Na none Abagereka barongera babakubita inshuro y'indi; Rukeramihigo aranamiza aragaruka arashega.

Ubwo Rukeramihigo yagarukaga Murorunkwere amureba, yicaranye n'umugabo witwaga Gashambayita, abwira Gashambayita, ati: «Jyana imyambi uyihe uriya mugabo ukunda kugaruka cyane, kandi umwitegereze umenye n'izina rye ataza gupfa ntamumenye.
Nuko Gashambayita ajyana imyambi Murorunkwere amuhaye. Ageze hagati y'ingamba zombie urw’ibwami n’Abagereka, ayijugunya imbere ya Rukeramihigo. Maze Abagereka barekurira imyambi icyarimwe bayihamya Gashambayita ku kuboko kw' iburyo; agaruka yiruka imyambi ikimurarazemo.

Abashakamba babwira Gashambayita byo kumuseka, bati: «Tubwire igiciro cy'iyo myambi tuyigure! Bamaze kumuseka, bayimushinguzamo; asanga nyirabuja aho atetse, Aho yicaye mu nteko. Murorunkwere araterura abaza Gashambayita, ati: «Nubwo wakomeretse bwose wa mugabo ugaruka cyane ni nde?»

Gashambayita arasubiza ati: «Ni Rukeramihigo!» ubwo Murorunkwere biramushimisha, ahera ko yogeza Rukeramihigo; Ashyira ejuru, ati: «Nabonye ahorera I Nyarubuga (Rwogera) nk' aho bava inda imwe koko! Mu gihe bakibivuga, babona Rukeramihigo arataguza imbere y'Abashakamba, n'isuri irimo iminega mu muharuro kwa Rugereka. Ingabo z'ibwami ziruha inkongi rurakongoka; Rugereka arapfa n'umuryango we n' Abagereka be. Ingabo z'ibwami zirakomeza zitera n'urundi rugo rwa Rugereka rw'i Gishike na rwo ziraruhereza; ibyo zihasanze birakongoka.

Nuko amazimwe yari ahanze mu Gihugu arangira ubwo; ashirira aho i Gishike mu rugo rwa Rugereka. Inkomoko y'uwo mugani rero, ngo: « Amazimwe yashiriye gishike, iva kuri urwo rupfu rwa Rugereka n'ikongoka ry'ibye byashiraniye n'amazimwe i Gishike.

Ubwo Kumarira amazimwe i Gishike, biba guhangamura intandaro y'amahane."
Tugarutse inyuma kuri rubanda bageze aho bakanga Rugereka, kugeza ubwo na we afashe ikemezo cyo kuguma iwe, kuko ubundi yashinjwaga kuba yararoze abantu benshi ndetse n’umwami kandi nta gihamya, bituma agira uburakari bwo kwihagararaho ku ngabo z’I Bwami kandi atari kuzitsinda, byatumye ahasiga ubuzima n’ibye biribagirana, umusozi usigara wera. Burya guhimbira abantu kuko bamerewe neza si byiza. Si umuco w’ubupfura dutozwa n’ababyeyi n’urwatubyeye.
Kwanga umuntu kuko amerewe neza ntacyo bimara mu mibereho y’abaturanyi, uwo wanga ejo ni we wakugoboka, akakumenyera abana ndetse n’umuryango igihe udahari. Abaturage banze Rugereka nta cyo basigaranye kitari amazimwe ataragize icyo abasha I bwami. Nk’abakunzi bacu ku Ntsinzi Tv, dukwiye kwiga kubana n’abandi mu bumwe bw’Abanyarwanda...