DUTABARE UDUKIZE NYAGASANI Padri André NTUNGIYEHE

Uhoraho ngwino ukize abagutakambira,
Ngwino uduhumurize Mana y'ubuzima.
Turi abana bawe ntudukureho amaboko,
Turakwiringiye Mana Nyirubugingo.
1) Umunsi ni uwawe, ijoro naryo ni iryawe. Ni wowe wahanze ukwezi n'izuba; ni wowe washinze imipaka yose y'isi, icyi n'itumba, ni wowe wabishyizeho
2) Uhoraho, urebe aho twicaye aha, imibabaro myinshi itagira ingano iradutsikamiye; ubuzima bw'abagukunda ntubugabize ibikoko, ntutererane buheriheri ingorwa zawe zagirijwe.
3) Uhoraho, ibuka isezerano ryawe maze wirebere; amikingo yose y'igihugu yabaye indiri y'urugomo. Ntutume urengana atahana ikimwaro, ahubwo umukene n'imbabare bagende bakuramya
4) Uhoraho tabara, urengere abawe; reba imibabaro dutewe n'amakuba atwugarije. Ntiwirengagize imiborogo y'abagutakira, n'ibyago byiyongera mu bana bawe.

R2/ DUTABARE, DUTABARE, DUTABARE, DUTABARE TURABABAYE UDUKIZE NYAGASANI MANA Y'UBUZIMA

5) Uhoraho, ubuvunyi bwawe nibwo dutegereje, amiringiro yacu yose ni wowe gusa twayarunduriye. Nta wundi twahungiraho tugusize inyuma; nta wundi tuzirukira mu makuba atwugarije
6) Uhoraho, turibuka ko ari wowe ukutubeshejeho, buri munsi utugaragariza impuhwe zawe n'urukundo rwawe. Manan turagushima kandi tugusaba: kuzwa Mwami, shimwa Mana itabara abayitakambira