“Suksesi i prokurorit nuk matet me numra, por me...", vizioni i Adnan Xholit për SPAK

Në mbledhjen që po zhvillohet këtë të enjte, më 11 dhjetor, në Këshillin e Lartë të Prokurorisë, kandidati Adnan Xholi prezantoi platformën e tij për zgjedhjen e kreut të ri të SPAK-ut.

Gjatë fjalës së tij, Xholi theksoi angazhimin personal në goditjen e krimit dhe nevojën për hetime të mëtejshme cilësore për konfiskimin e aseteve kriminale dhe për përforcimin e luftës kundër pandëshkueshmërisë.

“Falë angazhimit personal kam realizuar rezultate konkrete në goditjen e krimit. Do t’i mbështes në çdo situatë. Punën e kemi me njëri-tjetrin. Më shumë qëndrojmë me ta se me familjen biologjike.
Ka ardhur koha të vijojmë me hetime të mëtejshme cilësore për të goditur kriminalitetin, me qëllim konfiskimin e aseteve të krimit, për të çrrënjosur kulturën e antindëshkueshmërisë.”, tha Xholi.

Ai theksoi rëndësinë e prokurorisë së decentralizuar dhe rolin e drejtuesve në udhëheqjen dhe mbështetjen e hetimeve në çdo fazë: “Falë reformës në sistemin e drejtësisë, prokuroria është organ i decentralizuar.
Kjo trupë prokurorësh duhet të bëjë gjithçka që, në përballjen me opinionin publik, të jetë e sigurt se po bën sa duhet, me hetime të shpejta, rezultate konkrete dhe do ta bëjmë me patjetër.”

Xholi foli mbi përvojën e tij mbi 27-vjeçare në sistemin e drejtësisë, duke përfshirë punën në Prokurorinë e Përgjithshme, drejtimin e hetimeve sensitive, pjesëmarrjen në vendime të Gjykatës së Lartë, si dhe udhëheqjen e skuadrave të përbashkëta hetimore me vende të BE-së si Franca, Mbretëria e Bashkuar dhe Italia.

“Vijoj sot para jush me një eksperiencë mbi 27 vite pa shkëputje në sistemin e drejtësisë. E kam nisur nga roli bazë deri në hierarkinë më të lartë, si drejtues në struktura të ndryshme, periudhë e cila më ka dhënë mundësinë të menaxhoj situata të ndryshme dhe të zgjidh problematika. Kam udhëhequr disa hetime për një gamë të gjerë çështjesh sensitive. Kam punuar 8 vite në Prokurorinë e Përgjithshme. Ka pasur të bënte si me hetimin në juridiksionin fillestar, ashtu edhe me kontrollin e mëtejshëm. Kam qenë pjesë përbërëse e të gjitha vendimeve që do merreshin nga Gjykata e Lartë, vendime vlerësuese dhe unifikuese. Qenia ime si drejtues në disa zyra prokurorie më ka bërë të mundur të jem i aftë në prodhimin e akteve administrative e rregulloreve. Kam patur konsideratë të njihem me të gjitha problematikat, me të gjithë kolegët.

Kam udhëhequr hetime të rëndësishme, me një gamë të gjerë dhe sensitive.
Jam drejtues i 5 skuadrave të përbashkëta hetimore me disa vende të BE-së: Francë, Mbretërinë e Bashkuar, Itali.
Kam patur hetime paralele sa i përket çështjeve të trafikut të lëndëve narkotike dhe pastrimit të parave. Kam bashkëpunuar për të goditur disa prej grupeve kriminale shqiptare me shtrirje ndërkombëtare. Jam përballur me disa subjekte dhe është bërë i mundur identifikimi i autorëve, shoqërimi, dënimi dhe sekuestrimi i aseteve.”, tha Xholi.

Ai theksoi gjithashtu rëndësinë e përfaqësimit të akuzës në të gjitha shkallët dhe angazhimin për të vendosur njohuritë e tij dhe përvojën në dispozicion të skuadrave të përbashkëta hetimore, duke përfshirë edhe aktivitetet akademike: “Drejtuesi, krahas rolit menaxherial, duhet të japë shembullin e tij profesional, jo të presë fazat finale, por që në fazat fillestare të një ngjarjeje të jetë pranë prokurorëve dhe hetuesve të trajnuar, duke u përfshirë edhe vetë në seancat pikante. Për një periudhë të gjatë, përfaqësimi i akuzës që kam bërë në të gjitha shkallët, qenia si lektor, më ka dhënë mundësinë që nga pikëpamja e ligjit të thelloj njohuritë e mia. Nuk është sukses i prokurorit numri i çështjeve në hetim apo i të hetuarve; suksesi i prokurorit matet në gjykatë, nëse ka dënime. Nëse zgjidhem, jam i gatshëm të vendos në dispozicion aftësitë që kam në drejtimin e skuadrave të përbashkëta hetimore dhe angazhimin e plotë, përfshirë edhe në fushën akademike.”


SUBSCRIBE to "RTV KLAN" on YouTube for more videos!
Për më shumë informacione vizitoni faqen tonë web https://tvklan.al/kategoria/klan-news/
Follow Klan News on Facebook:   / klannews  
Follow @klannews on Instagram:   / tvklannews  
#KlanNews #KlanNewsLajme #TvKlan