Փաշինյանը ամոթանք տվեց, Սամվել Կարապետյանից ներողություն կխնդրեն, տիրադավների կոչը. Ամփոփ լուրեր

Oragir.News-ը ներկայացնում է հունվարի 21-ի ամփոփ լուրերը՝ լրագրող Արփինե Նավասարդյանի մեկնաբանությամբ:

Նիկոլ Փաշինյանն այսօր Ազգային ժողովում հայտարարել է, որ Հայաստանի և Ադրբեջանի էներգետիկ համակարգերը միանալու են իրար։ Նրա խոսքով՝ երկու համակարգերի փոխադարձաբար նույն պայմաններով օգտվելու են և՛ արտահանման, և՛ ներմուծման հնարավոր պայմաններից: «ԹՐԻՓՓ-ի իրականացման շրջանակը չունի իրավական պարտադիր ուժ, որովհետև դա հայտարարություն է երկու կառավարությունների: Դա ընթացակարգ է, հռչակագիրը եղավ, իրավական ընթացակարգը, որից հետո արդեն իրավական պարտադիր ուժ ունեցող համաձայնագրի նախագծերը կգրվեն, կգան խորհրդարան և կհաստատվեն»,- ասել է Փաշինյանը՝ Կառավարության հետ հարցուպատասխանի ժամանակ, ապա շարունակել․ «Դուք հիմա ստիպում եք, որ ես հարցին այլ դիտանկյունից նայեմ: Ամոթ է, որ մենք դա չենք նկատում, բայց հարգելիներս, Հայաստանի Հանրապետությունը արդեն ստացել է փոխադարձ առավելությունների մի մասը: Բենզինի գինը 20 տոկոսով ընկել է, ցորեն է ներկրվում Հայաստանի Հանրապետություն՝ Ղազախստանի ու Ռուսաստանի կողմից, դա առավելություն չէ՞: Փոխադարձ առավելության մի մասն արդեն ստացվել է»։


Ամենայն հայոց կաթողիկոս Գարեգին 2-րդի հրաժարականը պահանջող «Տիրադավների խորհուրդը», որի կազմում է նաև Նիկոլ Փաշինյանը, կոչ է արել չեղարկել արտերկրում Եպիսկոպոսաց ժողով գումարելու Մայր Աթոռի որոշումը: Խորհուրդը հայտարարել է, որ Փաշինյանին միացած բարձրաստիճան հոգևորականներից որևէ մեկը չի մասնակցելու Ավստրիայում նախատեսված ժողովին, մյուս եպիսկոպոսներին էլ հորդորել է հետևել նրանց օրինակին: Վերջիններս պնդել են, թե իբր արտերկրում ժողով անցկացնելու որոշումը կայացրած Գերագույն հոգևոր խորհուրդն անվավեր կառույց է, քանի որ դրա լիազորությունների ժամկետն ավարտված է։ Բացի այդ, վերջիններս կարծում են, որ չի պատճառաբանվել, թե ինչու է եպիսկոպոսների հավաքն անցկացվում արտերկրում, այլ ոչ թե իր անկախությունն ամրապնդող Հայաստանի Հանրապետությունում։ Մայր Աթոռից երեկ բացատրել էին, որ «եկեղեցու դեմ սանձազերծած արշավն ու եկեղեցականների նկատմամբ հնարավոր ճնշումները նկատի առնելով են որոշել հավաքն Ավստրիայում անցկացնել»: Եպիսկոպոսաց ժողովը նախագահում է Ամենայն Հայոց կաթողիկոսը, դրան մասնակցում են Հայ Առաքելական եկեղեցու բոլոր եպիսկոպոսները: «Տիրադավների խորհրդի» անդամներից Վայոց ձորի թեմի դեռևս գործող առաջնորդ Աբրահամ արքեպիսկոպոս Մկրտչյանն այսօր ավելի վաղ իր մասնակցությունը չէր բացառել Եպիսկոպոսաց ժողովին՝ ասելով, որ մտածում է:


«Հանրապետություն» կուսակցության անդամ Հարություն Մկրտչյանը, ով Վաղարշապատի ՏԻՄ ընտրություններում այս կուսակցության համայնքապետի թեկնածուն էր, սակայն 4 տոկոսանոց անցողիկ շեմը չհաղթահարեց, պետք է հրապարակային ներողություն խնդրի Սամվել Կարապետյանից վիրավորական արտահայտությունների համար։ «Դատալեքս» դատական տեղեկատվական համակարգից, հունվարի 20-ին նման որոշում է կայացրել Լոռու մարզի առաջին ատյանի ընդհանուր իրավասության դատարանը՝ դատավոր Ելենա Առաքելյանի նախագահությամբ։ Դատարանը վճռել է Սամվել Կարապետյանի հայցն ընդդեմ Հարություն Մկրտչյանի` վիրավորական արտահայտությունների համար հրապարակայնորեն ներողություն խնդրելու, զրպարտություն հանդիսացող փաստացի տվյալները հրապարակային հերքելու և փոխհատուցում վճարելու պահանջների մասին, բավարարել մասնակի։ «Պատասխանող Հարություն Տիգրանի Մկրտչյանին պարտավորեցնել հայցվոր Սամվել Սարգսի Կարապետյանից հրապարակայնորեն ներողություն խնդրել հետևյալ ձևով․ տեղադրել հայտարարություն պատասխանողին պատկանող «Հարություն Մկրտչյան» օգտատիրոջ ֆեյսբուքյան էջում բոլորի համար հասանելի և տեսանելի եղանակով կամ առնվազն հինգ հազար տպաքանակ ունեցող տպագիր մամուլում, և հայտարարության վերնագիրը շարադրել հետևյալ կերպ. «Ես՝ Հարություն Տիգրանի Մկրտչյանս, ներողություն եմ խնդրում Սամվել Սարգսի Կարապետյանից», իսկ բովանդակությունը շարադրել հետևյալ կերպ․ «Հարություն Մկրտչյան» օգտատիրոջ ֆեյսբուքյան էջում 24.06.2025թ. կատարված՝ «Թերուս քնձխների գծած պլանը հազիվ էլ էդքան էլի ... Վայ մե, վույ մե ... Պեսկով` ալոոոոոո...» հրապարակումը Սամվել Սարգսի Կարապետյանի վերաբերյալ պարունակում է վիրավորական արտահայտություններ, ինչի համար ներողություն եմ խնդրում»»,- նշված է դատարանի որոշման մեջ։ Հարություն Մկրտչյանից նաև հօգուտ Սամվել Կարապետյանի պետք է բռնագանձվի 100 հազար դրամ՝ որպես վիրավորանքի համար փոխհատուցում և 23 000 ՀՀ դրամ՝ որպես հայցադիմումի համար վճարված պետական տուրքի գումար։


Մանրամասները՝ https://oragir.news/hy/material/2026/...

Oragir.News-ին կարող եք հետևել նաև.

Telegram - https://t.me/oragir_news
Facebook -   / oragir1  
Facebook -   / oragir.am  
Instagram -   / oragir.news  
Tiktok -   / oragir.news