ဥကရစ်ထတိုက်ပွဲ ၅ ရက်အတွင်း စစ်ကောင်စီမှ လေကြောင်းတိုက်ခိုက်မှု ၁၂၅ ကြိမ်ပြုလုပ်ခဲ့

ဥကရစ်ထတိုက်ပွဲ ၅ ရက်အတွင်း စစ်ကောင်စီမှ လေကြောင်းတိုက်ခိုက်မှု ၁၂၅ ကြိမ်ပြုလုပ်ခဲ့
=====================
ကရင်ပြည်နယ် မြဝတီခရိုင် KNUတပ်မဟာ(၆)ထိန်းချုပ်နယ်မြေ ဝေါလေမြိုင်ဒေသ ဥကရစ်ထတိုက်ပွဲတွင် စစ်ကောင်စီမှ လေကြောင်းတိုက်ခိုက်မှု ၁၂၅ကြိမ်ပြုလုပ်ခဲ့ကြောင်း KNLA(cobra စစ်ကြောင်း)မှ ထုတ်ပြန်ထားသည်။

ဥကရစ်ထ စစ်ကောင်စီတပ်စခန်းကို ဇွန်လ၂၆ရက်နေ့မှ စတင်ကာ KNDO, KNLA, PDFပူးပေါင်းတပ်ဖွဲ့မှ ခြောက်ရက်ကြာ စခန်းသိမ်းတိုက်ပွဲ တိုက်ခိုက်ခဲ့ခြင်း ဖြစ်သည်။ အဆိုပါတိုက်ပွဲတွင် စစ်ကောင်စီတပ်မှ ဇွန်လ ၂၇ ရက်နေ့၌ အကြမ်းဖက် စစ်ကောင်စီ၏ မှော်ဘီလေတပ်စခန်း (HBI-AFB-VYHB) မှ Yak-130 အမောင်းသင်တိုက်ခိုက်ရေးလေယာဉ် လေးစီး ဖြင့် လေကြောင်းတိုက်ခိုက်မှု စုစုပေါင်း ရှစ်ကြိမ်၊ ဇွန်လ ၂၈ ရက် နေ့တွင် အကြမ်းဖက် စစ်ကောင်စီ၏ မှော်ဘီလေတပ်စခန်း (HBI-AFB-VYHB) မှ Yak-130 Glob Turbo တိုက်ခိုက်ရေးလေယာဉ် ငါးစီးဖြင့် လေးခေါက်၊ လေကြောင်းတိုက်ခိုက်မှုပေါင်း ၁၅ကြိမ်၊ Mi - 17 အမျိုးအစား သယ်ယူပို့ဆောင်ရေး ရဟတ်ယာဉ်ဖြင့် အရှေ့တောင်တိုင်း စစ်ဌာနချုပ် (မော်လမြိုင်) မှ ဝေါ်လေဗျူဟာကုန်းသို့ တစ်စီးလျှင် ချပ်ဝတ်တန်ဆာနှင့် အပို ခဲယမ်းများတပ်ဆင်ထားသော အကြမ်းဖက် စစ်ကောင်စီ တပ်ဖွဲ့ဝင် ၂၀ ဦးစီ တင်ဆောင်ကာ စစ်ကူ နှစ်ကြိမ် ပေးပို့ခဲ့ကြောင်း ထုတ်ပြန်ချက်တွင်ဖော်ပြထားသည်။

ဇွန်လ ၂၉ ရက်နေ့တွင်လည်း Mi - 17 အမျိုးအစား သယ်ယူပို့ဆောင်ရေး ရဟတ်ယာဉ် နှစ်စီးဖြင့် အရှေ့တောင်တိုင်း စစ်ဌာနချုပ် (မော်လမြိုင်) မှ ဝေါ်လေဗျူဟာကုန်းသို့ တစ်စီးလျှင် ချပ်ဝတ်တန်ဆာနှင့် အပို ခဲယမ်းများတပ်ဆင်ထားသော အကြမ်းဖက် စစ်ကောင်စီ၏ တပ်မ (၄၄) လက်အောက်ခံ အကြမ်းဖက် စစ်ကောင်စီ တပ်ဖွဲ့ဝင် ၂၀ဦးစီ တင်ဆောင်ကာ စစ်ကူ ငါးကြိမ် ပေးပို့ခဲ့ခြင်း၊ ထို့အပြင် မှော်ဘီလေတပ်စခန်း (HBI-AFB-VYHB) နှင့် မင်္ဂလာဒုံ လေတပ်စခန်း (RGN-AFB-VYYY) မှ Yak-130 အမျိုးအစား အမောင်းသင်တိုက်ခိုက်ရေးလေယာဉ် ခြောက်စီး ဖြင့် လည်းကောင်း၊ MiG - 29 ဘက်စုံသုံး တိုက်လေယာဉ် နှစ်စီးဖြင့် လေကြောင်းတိုက်ခိုက်မှုပေါင်း ၄၉ ကြိမ် ပြုလုပ်ခဲ့သည်။ အကြမ်းဖက် စစ်ကောင်စီ၏ မင်္ဂလာဒုံ လေတပ်စခန်း (RGN-AFB-VYYY) မှ MPA အမျိုးအစား ATR-42 ကင်းထောက်လေယာဉ်ဖြင့် နှစ်ခေါက်၊ နေ့-ည ဝဲပျံ၍ ပစ်မှတ်အကဲခတ်ကြည့်ခဲ့သည်။

ဇွန်လ ၃၀ ရက်နေ့တွင် အကြမ်းဖက် စစ်ကောင်စီ၏ မှော်ဘီလေတပ်စခန်း (HBI-AFB-VYHB) မှ Yak-130 အမောင်းသင်တိုက်ခိုက်ရေးလေယာဉ် လေးစီး၊ MiG - 29 အမျိုးအစား ဘက်စုံသုံး တိုက်ခိုက်ရေး လေယာဉ် နှစ်စီး၊ MPA (ATR - 42) ကင်းထောက် လေယာဉ် တစ်စီး အသုံးပြုကာ လေကြောင်းတိုက်ခိုက်မှုပေါင်း ၂၂ ကြိမ် ပြုလုပ်ခဲ့ကြောင်း၊ Mi - 17 အမျိုးအစား သယ်ယူပို့ဆောင်ရေး ရဟတ်ယာဉ် နှစ်စီးဖြင့် အရှေ့တောင်တိုင်း စစ်ဌာနချုပ် (မော်လမြိုင်) မှ ဝေါ်လေဗျူဟာကုန်းသို့ စစ်ကူ သုံး ကြိမ် ပေးပို့ခဲ့ပြီး၊ MiG - 29 တိုက်လေယာဉ်သည် ထိုင်းနိုင်ငံဘက်အခြမ်းသို့ ဝင်ရောက်ပျံသန်းခဲ့ပြီး လေကြောင်းတိုက်ခိုက်မှု လုပ်ဆောင်ခဲ့သည်။

ဇူလိုင်လ ၁ ရက်နေ့တွင် အကြမ်းဖက် စစ်ကောင်စီ၏ မှော်ဘီလေတပ်စခန်း (HBI-AFB-VYHB) မှ Yak-130 အမောင်းသင်တိုက်ခိုက်ရေးလေယာဉ် နှစ်စီး၊ MiG - 29 အမျိုးအစား ဘက်စုံသုံး တိုက်ခိုက်ရေး လေယာဉ် တစ်စီး၊ MPA (ATR - 42) ကင်းထောက် လေယာဉ် တစ်စီး အသုံးပြုကာ လေကြောင်းတိုက်ခိုက်မှုပေါင်း ၃‌၁ ကြိမ် ပြုလုပ်ခဲ့ကြောင်း၊ Mi - 17 ရဟတ်ယာဉ် တစ်စီးဖြင့် ဝေါ်လေဗျူဟာကုန်းသို့ စစ်ကူ နှစ်ကြိမ် ပေးပို့ခဲ့ကြောင်း ထုတ်ပြန်ချက်တွင်ဖော်ပြထားသည်။

အကြမ်းဖက်စစ်ကောင်စီ လေတပ်မှ မင်္ဂလာဒုံလေတပ်စခန်း၊ မှော်ဘီလေတပ်စခန်း၊ မော်လမြိုင် (ရတခ) တို့မှ MiG - 29 ဘက်စုံသုံး တိုက်ခိုက်ရေးလေယာဉ် နှစ်စီး၊ Yak - 130 အမောင်းသင်တိုက်ခိုက်ရေး လေယာဉ် ခြောက်စီး၊ Mi - 17 သယ်ယူပို့ဆောင်ရေး ရဟတ်ယာဉ် နှစ်စီး၊ MPA ATR-42 ကင်းထောက်လေယာဉ် နှစ်စီး အသုံးပြုကာ Cluster Bomb များ၊ မီးလောင်ဗုံးများ၊ ပေါင် ၂၀၀နှင့် ၅၀၀ ဗုံးများ ၊ ဝေဟင်မှ မြေပြင်ပစ် ဒုံးများ၊ စက်လတ်များ အသုံးပြုတိုက်ခိုက်ခဲ့ပြီး Cobra စစ်ကြောင်းမှ တိုက်ပွဲအတွင်း ထိခိုက်၊ကျဆုံးခဲ့ခြင်း မရှိကြောင်း ထုတ်ပြန်ထားသည်။

ဥကရစ်ထ တိုက်ပွဲသို့ အကြမ်းဖက်စစ်ကောင်စီ၏ လေကြောင်းတိုက်ခိုက်မှု စတင်သည့် ဇွန်လ ၂၇ ရက်နေ့မှ ဇူလိုင် ၁ ရက်အထိ လေကြောင်းတိုက်ခိုက်မှု စုစုပေါင်း ၁၂၅ ကြိမ် ပြုလုပ်ခဲ့ခြင်းဖြစ်သည်။ ၎င်းတိုက်ပွဲတွင် စစ်ကောင်စီတပ်မှ ၂၀၀နီးပါး သေဆုံးခဲ့ပြီး အများအပြားဒဏ်ရာရရှိခဲ့သည်။ အလားတူ KNUဘက်မှလည်း ၁၃ဦးကျဆုံးခဲ့ကာ ရဲဘော်အချို့ဒဏ်ရာရရှိခဲ့သည်။

ဥကရစ်ထစစ်ကောင်စီစခန်းသည် ဝေါလေ၊စုကလိနှင့်ဖလူးလမ်းဆုံတွင် ရှိသည့် စစ်ရေးအရအရေးပါသော နေရာတစ်ခုဖြစ်ပြီး စစ်ကောင်စီမှ ၎င်းစခန်းကို လက်မလွတ်ရေး အသည်းအသန် ခုခံကာကွယ်နေရသည်။

စစ်တပ်မှ အာဏာသိမ်းပြီးနောက် KNUတပ်မဟာ(၆)နယ်မြေအတွင်း စစ်ကောင်စီနှင့် KNUတို့အကြား ဖြစ်ပွါးခဲ့သည့် တိုက်ပွဲများထဲတွင် ဥကရစ်ထတိုက်ပွဲသည် စစ်ကောင်စီမှ လေကြောင်းအသုံးပြုမှုအများဆုံး ဖြစ်ခဲ့သည်။
------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်လီုက်ပါရစေ.လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

About Us :
Mizzima TV is an Online TV content provider that is run by Burmese journalists who are based in neighboring countries of Burma (Myanmar).We strive to produce world-class contents for Burmese as well as those who care about Burma affairs.
......................................................

WARNING:
This video contains graphic violence contents
which may not be suitable for all audiences .

Copyright Disclaimer under section 107 of the Copyright Act 1976, allowance is made for “fair use” for purposes such as criticism, comment, news reporting, teaching, scholarship, education and research. Fair use is a use permitted by copyright statute that might otherwise be infringing.