𝗔𝗟𝗢𝗟𝗔 𝗦𝗘𝗡𝗦𝗜𝗕𝗜𝗟𝗜𝗭𝗔 𝗟𝗞𝗩𝗗, 𝗧𝗥𝗔́𝗙𝗜𝗞𝗨 𝗨𝗠𝗔𝗡𝗨 𝗡𝗢 𝗙𝗢𝗥𝗨𝗠 𝗦𝗜𝗗𝗔𝗗𝗔𝗡𝗜𝗔 𝗜𝗛𝗔 𝗣𝗢𝗦𝗧𝗨 𝗢𝗘𝗦𝗜𝗟𝗢, 𝗥𝗔𝗘𝗢𝗔.

(𝗔𝗹𝗼𝗹𝗮 𝗠𝗲𝗱𝗶𝗮/𝗥𝗔𝗘𝗢𝗔) Durante loron ida, iha loron 24 fulan-Junhu tinan 2025, Fundasaun Alola liu husi ekipa programa Advokasia kontinua sosializa enkuadramentu legal kona-ba " Lei Kontra Violensia Domestika ( LKDV), Trafiku Umanu, Plano Asaun Nasional (PAN) VBJ nomos Forum Sidadania" hodi haforte liu-tán komunidade, lideransa komunitarian, konsellu suku, grupu feto inklui feto potensial sira nia kuiñesementu kona-ba asuntu refere. Atividade ne’e rasik hetan apoio husi Gabinete Apoio Sosiedade Sivíl (GASC sigla portugés) no hili Suku Bobometo, Postu Administrativu Oesilo, RAEOA sai hanesan fatin implementasaun.
Koordenador Sentru Rekursu ba Feto (SRF) Alola, Sra. Apolonia da Costa, reprezenta Fundasaun Alola ne’ebe marka presenza iha sosializasaun ne’e esplika katak atividade refere realiza hodi haforte konesementu komunidade kona-ba Lei Kontra Violensia Domestika ( LKDV), Trafiku Umanu, Plano Asaun Nasional (PAN) VBJ no iha tempo hanesan identifika problema ka nesesidade feto no labarik ne’ebe komunidade suku Bobometo hasoru liu husi Forum Sidadania.
"Enkuadramentu legal sira ne'e sai instrumentu atu fó protesaun ba feto no labarik-feto inklui iha areas rural inklui iha suku Bobometo no liu husi atividade sosializsaun ne’e sira mos buka hatene problema ka nesesidade feto no labarik iha sira nia suku atu nune’e halo advokasia”, Sra. Apolonia da Costa esplika klean liu-tan.
Iha Salaun Parokia Sagrado Coracao de Jesus, Oesilo-RAEOA, Koordenador SRF Alola mos reforsa katak liu husi sosializasaun ne’e Fundasaun Alola hakarak kria relasaun diak ho parte interesante iha RAEOA nomós hasa’e feto nian partisipasaun iha nivél suku no Póstu. Iha fatin hanesan Sra. Apolonia da Costa reprezenta Fundasaun Alola hato’o agradesementu ba lider komunitarian nomos feto potensial suku Bobometo bele partisipa iha sosializasaun ne'e hodi nune'e bele lori mudansa ba moris komunidade nian, prevene violensia antes akontese.
Suku Bobometo hanesan suku tarjeitu ida husi projetu “Haforsa no hasa’e Kapasidade Joventude no komunidade konaba Prevensaun no responde violensia bazeia ba Jeneru ho Kria Espasu Amigavel no Respeitozu” ne’ebe suporta husi Gabinete Apoio Sosiedade Sivíl (GASC sigla portugés) liu husi fundus subvensaun publika ba tinan 2025. Hanesan suku ida ne’ebé lokaliza iha parte sudeste RAEOA nian, Suku Bobometo, suku ne'ebé ho area boot liu iha postu iha postu administrativu Oesilo ho total área 52.65 km² infrenta númeru kazu violénsia bazeia ba jéneru ne’ebé ás. Ho aldeia hamutuk 9, suku Bobometo hetan risku ba atividade trafiku umanu tanba lokaliza besik area fronteira.
Sr. Agustinho Siqueira, Apoio Suku Bobometo, Posto Oesilo apresia tebes ho inisiativu Fundasaun Alola bele organiza sosializasaun ba Lei Kontra Violensia Domestika ( LKDV), Trafiku Umanu, Plano Asaun Nasional (PAN) VBJ iha nia suku. Tuir Apoio Suku ne’e, programa refere diak ba dezenvolvementu suku Bobometo.
“Husi ami nia haree ne’e, atividade ne’e diak ba dezenvolvimentu ita nian no husu ita bele pasa informasaun ba maluk sira ne’ebe la marka presenza iha ne’e”, hato’o Sr. Agustinho Siqueira iha sesaun abertura.
Entertantu, apresiasaun diak mos hato’o husi Sekretaria ba Assosiasaun Feto RAEOA, Sra. Maria Tapu ne’ebe partisipa iha kolokiu refere. Nu’udar feto potensial ida iha RAEOA, Maria Tapu hato’o ninia agradesementu ba Fundasaun Alola bele kontinua sira nia apoio atu bele lori feto RAEOA ba oin liu husi sira nia programa.
“Hau nu’udar grupu benefisaria Alola no feto potensial haree katak atividade ne’ebe Fundasaun Alola halo fo benifisiu diak teb-tebes atu bele haforsa ekonomia familia nian tanba liu husi grupu iha base, ita nu’udar inan bele apoio ita nia laen ho atividade ne’ebe diak hodi ajuda ita nia familia”, hato’o Sra. Maria Tapu.
Sekretaria ba Assosiasaun Feto RAEOA ne’e rekonese katak bainhira akontese violensia ruma, feto mak sai vitima bebeik no nia tau espera katak futuru bele hetan situasaun ne’ebe diak liu-tan.
“Husi Asosiasaun Feto hakarak serbisu diak liu tan ho suku sira atu bele promove diak liu tan atividade diak liu tan liu-liu kona-ba atividade feto nian”, Sra. Maria Tapu haktuir.
Iha Salaun Parokia Sagrado Coracao de Jesus, Oesilo-RAEOA, komunidade hamutuk besik 50 partisipa ativu hodi rona apresentasaun ekipa programa Advokasia-Alola kona-ba Lei Kontra Violensia Domestika ( LKDV), Trafiku Umanu no seluk tan. Atividade ne’ebe loke ofisialmente husi reprezentante Xefe Suku Bobometo, Sr. Agustinho Siqueira mos sai ponte atu responde perkupasaun komunidade nian liu-liu liga ba implementasaun LKDV no Lei Kombate Trafiku Umanu. Pergunta lubuk ida mos komunidade sira hato’o liga ba problema uma laran, situasaun labarik abandonado sira no nesesidade injeral komunidade nian.