ATË STAVRO REXHO, KLERIKU ORTHODHOKS QË VDIQ NË BURGUN E BURRELIT, VITI 1966

At Stavro Rexho, prifti që ndërroi jetë në burgun e Burrelit (1903- 1966)

At Stavro Rexho u lind më 1903 në Dhivër të Sarandës prej prindërve, Panajoti dhe Stamatos nga një shtresë e varfër.

Arsimin fillor e kreu në fshatin e lindjes.
U martua me Dhimitrullën dhe bënë 5 fëmijë.

Më 1928 emërohet mësues në fshatin Gravë për shkollën fillore në gjuhën greke, ku shërben pak vite.

Në 1932 u vesh prift dhe caktohet me detyrë në fshatrat Llazat dhe Kallcat të Sarandës ku shërbeu për dy vite tek secili prej tyre.
Një vit ai shërbeu në Dhivër dhe më pas si prift në Nivicë, Bubar ku qëndroi për 13 vite.

Në kohën e luftës nga vitet 1943 - 1944 ndihmoi materialisht Frontin Popullor Antifashist.

Në vitin 1949 shërben si prift në Dhivër, Aliko dhe Mursi dhe në Mesopotam për pak kohë.

At Stavro Rexho fillimisht u burgos në vitet 1946-1949 në burgun e Gjirokastrës dhe më pas u burgos sërish në 1963 dhe deri sa ndërroi jetë në vitin 1966 në burgun e Burrelit.

Familjarët dyshojnë se atë e helmuan në burg, kërkuan trupin e tij por përgjigjja ishte negative. Akoma rezulton person i zhdukur dhe trupi nuk dihet se ku është varrosur.

Akuza

U arrestua në Gjirokastër më 20 janar të vitit 1946 u gjykua dhe u dënua me tre vite burgim për tradhëti të lalrë së bashku me 18 persona të tjerë. Ndër ta ishin dhe dy priftërinj të tjerë Papa Jani Dashi nga Çuka e Sarandës dhe Papa Kristo Papa nga Sopiku, të cilët u dënuan secili me 30 vite heqje lirie, më 20 maj 1963.

Akuza ndaj tij - Agjitacion dhe Propagandë kundër pushtetit popullor.

Radio Ngjallja fton të gjithë të afërmit e klerikëve të persekutuar apo të burgosur gjatë periudhës së Komunizmit të na kontaktojnë për të na ofruar informacione që do të hedhin dritë mbi të vërtetën.

Mund të kontaktoni në nr tel:
+355682005524

Ose mund të na shkruani në Emailin e Radio Ngjallja:
[email protected]