KBIR GEJTANU

Innu Devozzjonali - mużika Ray Sciberras : versi Anselm Sciberras

Insellmulek O Gejtanu
hawnhekk qribek miġburin,
kif għajnejna jaraw dehrtek
qlubna jgħannu lkoll henjin.
Ibqa’ qribna Patrun tagħna
u għalina kun l-għalliem,
għax f’imġiebtek hemm il-ġenna
għax fi kliemek hemm is-sliem
Kbir Gejtanu li lil Kristu
ħsiebek qalbek kull ħin tajt;
għalik l-anġli trejqa għamlu...
merħba j’tuk fis-sema smajt
Ġieħ u glorja dawn għannewlek
qassis umli tawk tifħir,
hekk kif Alla ħaddnek miegħu
żejnek b’dawl ta’ qaddis kbir.

Int li ridt l’ Ismek jintesa
u li jgħib fit-trab tas-snin
tpoġġejt b’dawl hawnhekk quddiemna
u ssejjaħt mal-Qaddisin.
Alla żejjen l-isem tiegħek
b’dawl għammiex u b’ward ifuħ
għax għemilek għaxxaq qalbu:
ġo fik sab safa ta’ ruħ.
Kbir Gejtanu li lil Kristu,
ħsiebek qalbek kull ħin tajt;
għalik l-anġli trejqa għamlu...
merħba j’tuk fis-sema smajt
Ġieħ u glorja dawn għannewlek
qassis umli tawk tifħir,
hekk kif Alla ħaddnek miegħu
żejnek b’dawl ta’ qaddis kbir.

Klement Għaxra qal lill-knisja
biex fik tara l-virtujiet
b’hekk tinżamm b’mudell quddiemha
fit-tiftixa għall-barkiet.
Għaliex int għal kull Nisrani
urejt triq li twassal żgur
biex jissebbaħ Isem Alla
u jitfaħħar is-Sinjur.
Kbir Gejtanu li lil Kristu,
ħsiebek qalbek kull ħin tajt;
għalik l-anġli trejqa għamlu...
merħba j’tuk fis-sema smajt
Ġieħ u glorja dawn għannewlek
qassis umli tawk tifħir,
hekk kif Alla ħaddnek miegħu
żejnek b’dawl ta’ qaddis kbir.