غم ذاك العمر من ينگضي تعلعل 💔 | الشاعر عريان السيد خلف | قصيدة حلال الخِل

الشاعر المرحوم عريان السيد خلف
قصيدة حلال الخل
.
.

ضمني بليل ثاني وحل حلال الخل

شحيحة افراحنة ودكانهة معزل

البسمة نبوكهة من الاه والياويل

وصياد الهموم بدفترة يسجل

يا كلبي شبعد ؟ ومعكرات الطيف

زمن توزهن ما اظن بعد تحمل

يولنك ظواري امهذبات الناب

لا مخلص يعينك لو ردت تجفل

يمشاجج زمانك حد كطاع النيط

تتردجة الشفة رجواك سل السل

لا عاد الصبر يلجم مصب العين

ولا مثل الخلك بدموعنة نمثل

ولا ذيج المضايف عاجدة الديوان

ولا سربة وذن برياضهن تصهل

ولا شارب يرف لو مطكت ام عرف

ولا شكرة جعد بوجوهنة تهلهل

ولا مدرع فشك ينحر صدور الخيل

ومابين اللميض ايحول تحول

ولا صاحب ذرب ويوجد الماذيك

يبسط خاطرة وفوك الجرح ينزل

مصخت والضماير مصخاهة الغيظ

وامتد الدرب وام الفرح مثجل

وطالت والعمر كلما بي يطول

غم ذاك العمر من ينكضي تعلعل

شي عاشت لفو وتروم هذا وذاك

وشي كضت عمرهة بنعم وتوسل

وشي حربة مواسم تنبت ابكل كيف

اشما بدل وكتها لحلها تبدل

وشي تلث عمر تجمع ورق وارقام

لحد كطع النفس وبمالها تنعثل

امناحر والخلك ما تعرف المعروف

ماخذها البطر وبلا سبب تكتل

ماني من ارد اسولف واكشف المغلوك

يغدي الحك صبر وحجايتي تزعل

يلشعرك مليل حل حلال الخل

وطول واهسك للواهسة مخيل

اسلم من عذاب الاه والياول

وعللني ابهواك العافية اتعلل

كل بوسة غفو تطرز حياتي نجوم

وكل شمة نحر جبرة خليل الخل

يا تالي المزن جل العمر عيسوب

وفوك امروز روحي الزور صاير جل

مدنف فوك وكري ابطارف الصعبات

وصكور الروابي العالية اتزبل

مشكلتي الفرح ما عرف بابة منين

وبلون الحزن من زغري متمشكل

ناورني الدمع باول مدب علكاع

وناغمني الحزن وي رنة الجنجل

ضميت الصداقة لساعة الوكفات

واحزرت الذخر لن جودها موشل

حل شعرك حبيبي الليل بلكي يطول

لا خيط الفجر يستعجل من ايهل