راس من روس الهواجر كلمات مشعل بن سابر اهداء للسيد ناصر بن سعيد بن مرسان الهاجري اداء جفران بن هضبان

قصيده مهداه من الشاعر / مشعل بن سابر
الى
السيد / ناصر بن سعد بن مرسان الهاجري
اداء / جفران بن هضبان

الكلمات :

بين زلزال الرعود وبين صلفات الهبايب
والجبال الشامخات اللي وعورتها تشابه

لاح برق وشفت فرق وبان في نوره عجايب
والتمع يوم ارتفع ويزيح نوه من ضبابه

وانهمل وانهل وبل الغيث من غر السحايب
وارتوت منه الديار وحولت منه الشعابه

وازهرت منه الفياض وكوسرت فيه الرعايب
باللحون اللي تخلي العود يرجع له شبابه

وصهلت قحص المهار وزرفلت عوص النجايب
وانتحت بي صوب منهو فاتح للضيف بابه

ناصر بن سعيد بن مرسان زيزوم النوايب
راس من روس الهواجر لابة ياوي لابه

دام عز اللي فعوله للبعيد وللقرايب
وسمعته نور على درب المراجل يقتدابه

تزدحم عنده وفود وتنعقل عنده ركايب
وتسفهل وجيه ضيفانه ويلقون الرحابه

ارزق الكمبود فايح واشقر الفنجال رايب
والشحم فوق الصواني والكرم مابه غرابه

الحشيم اللي بجاهه تصغر كبار الطلايب
الحكيم الصادق اللي لاهرج ثمن جوابه

كلمته عدل وصواب اليا حصل مخطي وصايب
حد سيف لاضرب يقطع قبل يظهر صوابه

معتق رقاب الرجال اللي شكو جور المصايب
ينسف هموم الدريك اللي عناله وانتخابه

وقفته تبهج صدور ومدته تفرج كرايب
متعب حاله وماله وان وقف للعسر جابه

ماتزعزعه الظروف اللي مضاربها عطايب
شامخ مثل الجبال النايفه عز ومهابه

وان عصب راسه وعودنا على شد العصايب
فاشهد انه عصابة اللي مالقا راسه عصابه

فزته فزة حصان وفزعته تطفي لهايب
للدريك اللي لجابه والدخيل اليا التوابه

وان ثنى رجله على درب التحدي والصعايب
جاب علم نفتخربه ماحداً غيره هقابه

عاش راس مايهاب ويتقي به كل هايب
وان تقدم ماتندم وان تزمجر ليث غابه

وان حضر وقت التحدي عند زاهية الجنايب
ثم تعزوا خيل البل ناصر وراحت مجابه

قال انا حفيد منهو يومها خيل وحرايب
في اول الحثلوم الاول والجنب نحمي عقابه

مارضينا بالقليل وماضرينا بالغلايب
والدلايل بالفعايل والصمايل بالصلابه

يرتفع مثل العقاب اللي جعله الله عقايب
ولمحة ضلاله تغط اصوات هاوين الطلابه

جايزة عبد العزيز احتلها طرق وغصايب
وجاب الاول في ابو ظبي وفي الكويت الفوز جابه

فايز في كل طيب ورايته فوق الجذايب
لابس بيض الفعايل مثل مايلبس ثيابه

نحتفل به في حضوره نفتخر حاضر وغايب
نحتزم به في الشدايد نحترم حضرة جنابه

عاش كساب المراجل يوم كل وله كسايب
والوفا صافي شرابه والفخر غالي زهابه

فياسلام الله عدد ماهب نسناس الهبايب
والجبال الشامخه ماهيب في عيني تشابه

.