Маевкадагы жерлерди мыйзамсыз берүү боюнча 4 адам кармалды

Айыл чарба багытындагы жерлерди мыйзамсыз трансформация кылган Аламүдүн райондук мамлекеттик администрациясынын кызматкерлери кармалды. Бул тууралуу УКМК билдирди.

Тактап айтканда Бишкек шаарынын Биринчи аай районунун Маевка муниципалдык аймактык башкармалыгынын айыл чарба багытындагы жер тилкелерин турак жай куруу үчүн мыйзамсыз берүү менен байланышкан коррупциялык схема аныкталды.

«2022-жылдын орто ченинен 2024-жылдын январь айына чейин «жер мафиясы» деп аталган айрым жарандар муниципалдык кызмат адамдары менен тил табышып, айыл чарба багытындагы жер тилкелерин (кийин капиталдык курулуштар башаламандык менен курулган) бөлүп, сатып жибергени аныкталган.

Өз кезегинде Аламүдүн райондук мамлекеттик администрациясынын кызмат адамдарынын ичинен түзүлгөн жумушчу комиссия кызматтык ыйгарым укуктарынан кыянаттык менен пайдаланып, мамлекеттин кызыкчылыгына каршы жер амнистиясына жамынып, №378 контурдагы 5,5 га жер тилкесин амнистиянын талаптарына туура келбесе да мыйзамсыз трансформациялаган.

Көрүлгөн чаралардын жыйынтыгында кАламүдүн райондук мамлекеттик администрациясынын башчысынын биринчи орун басары Т.О.А., Маевка айыл аймагынын мурдагы башчысы К.Б.Т. жана жер тилкелерин мыйзамсыз сатууну ишке ашырган Д.Н.К. жана А.М.Ч. кармалып, №21 тергөө абагына камалды», - деп айтылат расмий маалыматта.