بنك الفعول المصرفي | شيلة مُهداة للشيخ زيد ال حريول | كلمات : عبدالمجيد العزّة | اداء : خالد ال بريك

شيلة بعنوان “ بنك الفعول المصرفي “ مُهداة للشيخ : زيد بن علي ال حريول العزّة السبيعي | كلمات : عبدالمجيد بن صقر العزّة | اداء المنشد : خالد ال بريك

..

،
جتني عقب غيبة و انا شفقٍ عليها من زمان
افكار شعرٍ فاتنة فيها الجمال اليوسفي
،
جت كنّها صبح الرياض و زحمة الساعة ثمان
دامي دليل دروبها مانيب بلش بموقفي
،
قلت ارحبي دام المدى .. لابعد سما حد العنان
من ما يجول بخاطري يا الله نجول و نصطفي
،
بالله و امانه ما بعد امنه و امانه من امان
ان قاله الله ما يجي غير الجزيل امن اْطرفي
،
ماهوب حي الله اسم و لا هو حي الله لسان
بين الفرايد وقّفي واتبختري و اْتغطرفي
،
الشعر لا منّي نويت اكتبه خذت الصولجان
مالي و مال اللي جَهدهم بالكلام الصفصفي
،
بين التعالي و العلو ، الله يجنبني الطمان
الا خضوعي له .. على سجادتي .. او مصحفي
،
لا ما يجي بعد العجاف من السنين الا السمان
و اليا نقص صبري تحاودته و زوّدت اْشغفي
،
احيان احقق لي هدف من قبل احس الوقت حان
و احيان احسّ ان العمر ما هوب كافي لهدفي
،
احدٍ ليا منّه وقع ، ينهض و يطمر كالحصان
و احدٍ ليا منّه نهض ،، عوّد يطيح و يختفي
،
يا كم بعيدٍ ودّك انّه مْعك من نفس البطان
و يا كم قريبٍ مْعه يكفيك السلام المعرفي
،
الطيّب إليا طاب في مدحه يكفّيني فلان
و ان كان من اطيّب بني عمي فـ لاني مكتفي
،
لا يا سلام الله على اللي ذكره ان مرّ فـ مكان
عن اجود انواع البخور الزاكية .. ذكره يفي
،
مثله مثل نجم الجدي واضح وثابت للعيان
ماهو مثل شمعه على ادنى الهبايب تنطفي
،
الشيخ زيد ابن علي .. صيته يشنّف للاذان
زيد الحريول .. ما على طيبه و لا مدحه نفي
،
وقت الفعول اللي اذا وجه الزمن كشّر و شان
ما كنّه الا وقتها .. بنك الفعول المصرفي
،
يا كم قضية حلّها خفيه و لا كنّ شي كان
و اللي ظهر له من دعم جزءً من الدعم الخفي
،
يفرق مثل ما يفرق بكل السنة شهر رمضان
إليا حضر ما غاب احد و الكل بأسمه يحتفي
،
و إليا تكلّم يدهشك بايجازه و حسن البيان
و إليا سمع لك قلت : يا راية سروري رفرفي
،
من ماكر احرارن لهم في ساحة الطولات شان
ادروبهم عسرة على اللي في أثرهم يقتفي
،
اعيال عودٍ يا عسى مثواه في خير الجنان
ميّت و صيته بيننا .. باقي مثل طبعه وفي
،
من ربعي اللي قدرهم فوق الثريا ما يهان
لـ الاد عازي بالفخر .. فعلٍ يشرّف موقفي ..
،
الشخص منّا يشّر المجد لحضوره بالبنان
عين العقل وقت العقل .. وقت الملاقى عجرفي
،
ناطا على خدّ الردي .. وطية وسيعين البطان
و للي حربنا نجمةٍ فالقايله ما تختفي

،