#ခင်ဖုန်းသက်ဝေဂယ်လာရီ

❝ ခင်ဖုန်းသက်ဝေဂယ်လာရီ ❞

ဓားဘယ်နှစ်စင်း
အဲဒီလမ်းမှာခင်းထားပါသလဲ
မြစ်ကလက်မခံတော့ရင် ကမ်းမှာတင်မယ်
ဘယ်ကမ်းမှ လက်မခံတော့ရင်ရောတဲ့
တောင်ပင်လယ်ကိုမျှော်လို့
ပန်းသုံးပွင့်သာလှူပေးကွယ်

ကျွန်တော်ကလည်း ကျွန်တော်ပါပဲ
တိမ်မြင်မြင် တောင်မြင်မြင်
ခင်ဖုန်းသက်ဝေကိုပဲ တိုင်ပင်ချင်နေမိတယ်
ကမ်းနားလမ်းကိုပြန်တာပဲ ကောင်းမှာပါ
လှိုင်းစကား လေစကားမှာ
ကျွန်တော်လွမ်းကြောင်း ကြားပါရဲ့လား
ခင်ဖုန်းသက်ဝေ

ကျွန်တော် မဖြူစင်ချင်တော့ဘူး ခင်ဖုန်းသက်ဝေ

လသာလိုက်တာလို့
တယောက်ထဲ ပြောနေရတဲ့ဒုက္ခကိုတော့
မုန်းလှတယ်

သံသရာနဲ့ ကျွန်တော်နဲ့
နှစ်ပေါက်တပေါက်ရိုက်ထားတာပြောပြရဦးမယ်
မပြတ်ပါရစေနဲ့ မပြတ်ပါရစေနဲ့လို့ပေါ့
ကြားရဲ့လား ခင်ဖုန်းသက်ဝေ

ပန်းပေးပြီလား ခင်ဖုန်းသက်ဝေ
ပေးတဲ့ပန်းကိုပေါင်းလိုက်တော့
သုံးပွင့်ပြည့်သွားတာပေါ့နော်
ခင်ဖုန်းသက်ဝေက ပန်းပန်စရာမှ မလိုတာကွယ်

ကျောခိုင်းလို့မှ ခြေဆယ်လှမ်းမပြည့်ခင်
အရင်နေရာက နည်းနည်းနာလာတယ်

“ရော့နှစ်ပက်
ခင်ဖုန်းသက်ဝေ တခွက်ရောပေးပါ ညီလေး
မှိုကန်စွန်းကို ခင်ဖုန်းသက်ဝေစိတ်ကောက်သလို
ဘောက်ဆပ်ဘောက်ဆပ်လေးကြော်ပေးကွာ
ခရုဆီလျှော့ဟေ့
ခင်ဖုန်းသက်ဝေက မချွဲတတ်ဘူး

မင့် ဟင်းရည်ကလည်းကွာ
ခင်ဖုန်းသက်ဝေမျက်စောင်းလို မချိုပါ့လား
နံနံပင်အုပ်ကွညီလေးရဲ့ ကြည်သွန်ဖြူလေးပါထည့်
သွားတက်လေးလေ ဖွေးကနဲပေါ့

သေသေသပ်သပ်ဖိတ်စာမှာ
ပုန်းညက်ပင်ခြေရင်း
အိမ်နံပါတ်က 'ပွတ်သျှကင်' ကွယ်လွန်တဲ့ခုနှစ်
ကဗျာ နှင့် သဲသဲလှုပ်ချစ်တတ်သူများရိပ်သာ
သောကမြို့တော်
မှတ်မိပါတယ်နှော် ခင်ဖုန်းသက်ဝေ

တမြေ့မြေ့ကျွမ်းလောင်ခြင်းမှတ်တိုင်မှာ ဆင်းဖို့
အားလုံးကို ပြောပေးကွယ်

ရက်စက် ယုယစွာ တချက်ထဲပစ်ပါ
ခင်ဖုန်းသက်ဝေရေ...
နတ်ပြည် ဘယ်နှစ်ထပ်မှာတွေ့တွေ့
ကျွန်တော်တို့ မမေ့ကြကြေးလေနော်

ဂွတ်နိုက်ပါ ခင်ဖုန်းသက်ဝေ
ကောင်းသောမနက်ခင်းပါဆိုတာကိုတော့
မနက်ဖြန်မနက်မှာ
မျက်နှာစိမ်း ခိုပြာလေးတကောင်
လာပြောပါလိမ့်မယ်
သူ့ကိုမောင်းမထုတ်လိုက်နဲ့နော် ခင်ဖုန်းသက်ဝေ

ကောင်းရာမွန်ရာ ရောက်ပါစေ
ကျန်းမာပါစေ...
ချမ်းမြေ့ပါစေ...
ကျွန်တော်ကတော့ ငရဲမှာ။ ။

#သန်းတင့်
#ခင်ဖုန်းသက်ဝေဂယ်လာရီ
#thebookbazaar