ARSAနဲ့ RSOအဖွဲ့ကို ဘင်္ဂလားဒေ့ရှ်နယ်ခြားစောင့်တပ်အချို့စစ်ရေးကူညီနေတယ်လို့ AAပြော | People's Spring

ARSA နဲ့ RSO အဖွဲ့ကို ဘင်္ဂလားဒေ့ရှ်နယ်ခြားစောင့်တပ်အချို့ စစ်ရေးကူညီနေတယ်လို့ AA ပြော

အောက်တိုဘာ - ၁၂ ၊၂၀၂၅ /People's Spring

ဘင်္ဂလားဒေ့ရှ် - ရခိုင်ပြည်နယ် နယ်စပ်တလျှောက်မှာ ရိုဟင်ဂျာ လက်နက်ကိုင်တပ်ဖွဲ့တွေ နယ်စပ်ဖြတ်ကျော်ပြီး စစ်ရေး လှုပ်ရှားတာ ၊ စစ်ဆင်ရေး ဖော်ဆောင်တာတွေ မှာ ဘင်္ဂလားဒေ့ရှ် နယ်ခြားစာင့်တပ်ဖွဲ့ (BGB) နဲ့ စစ်ဘက် က အရာရှိ အချို့ရဲ့ ကူညီပံ့ပိုးမှုတွေ ပါနေတယ် လို့ အာရက္ခတပ်တော် (AA) က အောက်တိုဘာလ ၁၁ ရက်မှာ ထုတ်ပြန်ချက်တစ်စောင်ထုတ်ပြန်လိုက်ပါတယ်။

ဘင်္ဂလားဒေ့ရှ် - ရခိုင် နယ်စပ်မှာ ARSA ၊ RSO အဖွဲ့တွေရဲ့ နယ်စပ်ဖြတ်ကျော် စစ်ရေးလှုပ်ရှားတာ ၊ အကြမ်းဖက်မှုလုပ်ဆောင် တာတွေဟာ မြန်မာစစ်ကောင်စီ နဲ့ လက်ဝါးချင်းရိုက်ကာဟန်ချက်ညီ ဆောင်ရွက်နေတဲ့အပေးအယူတစ်ခု ဖြစ်နိုင်တယ်လို့ AA က သုံးသပ်ထားပါတယ်။

ဒါအပြင် ဘင်္ဂလားဒေ့ရှ် နယ်ခြားစာင့်တပ်ဖွဲ့ (BGB) အချို့ နဲ့ စစ်ဘက်က အရာရှိအချို့ရဲ့ ကူညီပံ့ပိုးပေးမှုတွေလည်းပါဝင်နေပြီး သုံးပွင့်ဆိုင် တိုက်ခိုက်မှု ဖြစ်နိုင်တယ်လို့ AA က ထုတ်ပြန်ချက်မှာ ထည့်သွင်းဖော်ပြပါတယ်။

ဘင်္ဂလားဒေ့ရှ် နယ်ခြားစာင့်တပ်ဖွဲ့ (BGB) အချို့ နဲ့ အရာရှိအချို့ဟာ AA နဲ့တိုက်ပွဲဖြစ်လို့ ဒဏ်ရာရ ၊ ကျဆုံးသွားတဲ့ ARSA တပ်ဖွဲ့ ဝင်အလောင်းတွေကို ဝိုင်းကူထမ်းပို့တာ ၊ ဆေးဝါးကုသပေးတာ ၊ ရိက္ခာနဲ့လက်နက်ခဲယမ်း ထောက်ပံ့တာတွေ အပြင် လုံခြုံရေးယူပေးတာ ၊ဝေဟင်ကင်းထောက်ပေးတာ ၊ ရေဒါစနစ်ကိုအသုံးပြုပြီး စစ်ရေးဆိုင်ရာအချက်အလက်တွေ ပံ့ပိုးကူညီတာတွေ ပြုလုပ်နေတယ်လို့ AA က ဆိုပါတယ်။

ဒါဟာ ARSA ၊ RSO အဖွဲ့တွေ နဲ့အတူသွယ်ဝိုက် တိုက်ပွဲနေတာလို့လည်း AA က မှတ်ချက်ပြုထားပါတယ်။

ဒီလို အားပေးအားမြှောက်ပြုနေတဲ့ ဘင်္ဂလားဒေ့ရှ် နယ်ခြားစာင့်တပ်ဖွဲ့ (BGB) အရာရှိတွေကို အမြန်ဆုံးဖော်ထုတ် အရေးယူပေးဖို့ ဘင်္ဂလားဒေ့ရှ် ကြားဖြတ်အစိုးရ ကို အသိပေး ထုတ်ပြန်ပြောဆိုထားပြီးဖြစ်တယ်လို့လည်း AA ကဆိုပါတယ်။

အရေးယူထိန်းကျောင်းမှုမရှိဘဲ ဆက်လက်လွှတ်ပေးထားမယ်ဆိုရင်တော့ နှစ်ဖက်နယ်စပ်တည်ငြိမ်ရေး ၊ လုံခြုံရေး ၊ ဆက်ဆံရေးနဲ့ နှစ်ဖက် ယုံကြည်မှုကို ထိခိုက်လာစေနိုင်တယ်လို့လည်း AA က အသိပေးထားပါတယ်။

ဒါကြောင့် ARSA ၊ RSO အဖွဲ့တွေကို ဘင်္ဂလားဒေ့ရှ် နိုင်ငံကနေ ရခိုင်ပြည်နယ်ထဲ ဝင်ရောက် စစ်ရေးလှုပ်ရှားနေတာတွေကို အမြန်ဆုံးဟန့်တားပေး ဖို့ကိုလည်း ဘင်္ဂလားဒေ့ရှ် ကြားဖြတ်အစိုးရကို AA က တောင်းဆိုလိုက်ပါတယ်။

ARSA ၊ RSO အဖွဲ့တွေဟာ နယ်စပ်ကို ဖြတ်ပြီး မောင်တောမြို့နယ်ထဲမှာ အရပ်သားတွေကို သတ်ဖြတ်တာ ၊ AA တပ်စခန်းတွေကို ဝင်ရောက်တိုက်ခိုက်တာတွေပြုလုပ်ခဲ့တယ်လို့ AA က သတင်းထုတ်ပြန်ထားပါတယ်။

ဘင်္ဂလားဒေ့ရှ် နယ်ခြားစောင့်တပ်ဘက်ကလည်း ARSA နဲ့ RSO ကို ထောက်ပံ့ကူညီတယ်ဆိုတဲ့ AA ရဲ့စွပ်စွဲချက် ကို ငြင်းဆိုထားပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring