RAS Morogoro ashauri kuanzisha kilimo cha Mchikichi zanzibar.

RAS Morogoro ashauri kuanzisha kilimo cha Mchikichi zanzibar.

Katibu Tawala wa Mkoa wa Morogoro Kamishna Mstaafu wa Jeshi la Polisi Alhaji Dkt. Mussa Ali Mussa ameishauri Timu ya Mipango kutoka Visiwani Zanzibar kuanzisha kilimo cha zao la Mchikichi visiwani humo ili kuongeza ajira kwa vijana na kuongeza Uchumi kwa wananchi wake.

Dkt. Mussa ametoa ushauri huo Oktoba 24, 2025 wakati akiongea na timu hiyo ya Mipango kutoka Visiwani Zanzibar iliyofika ofisini kwake kutoa shukrani baada ya kufanya ziara ya siku tano katika Halmashauri za Ifakara, Malinyi na Mlimba Mkoani humo.

Amesema, mazingira ya Mkoa wa Morogoro na Zanzibar havitofautiani sana, hivyo kwa kuwa Mkoa wa Morogoro umeanzisha kilimo cha mazao ya kimkakati likiwemo zao la mchikichi na linastawi bila shida basi,  ni wakati mzuri pia kwa Zanzibar kulima zao hilo kwa kuwahamasisha wananchi ili kuongeza ajira kwa vijana na Uchumi kwa mtu mmoja mmoja.

“... ina create Job oppotunities (nafasi za ajira), kwa hiyo kama mnaweza hiyo Kwenda kushauri, tuanzishe hiyo programu ya kupanda michikichi....tukilifanya hilo tutakwenda kuisaidia Zanzibar” amesema Dkt. Mussa.

Kwa upande wake Kamishna wa Uchumi kutoka Tume ya Mipango Zanzibar, Dkt. Ameir Sheha ambaye alikuwa kiongozi wa timu hiyo, Pamoja na kutoa shukrani kwa wenyeji wake, ameupongeza Mkoa wa Morogoro kwa programu zilizopo hususan za Sekta ya Kilimo na kwamba programu hizo zikitekelezwa ipasavyo, Mkoa wa Morogoro unakwenda kuwa miongoni mwa mikoa mitano ya uzalishaji Chakula (The Big Five).

Aidha, amesema amependezwa na shamba linaloendeshwa na SUMA JKT lenye Hekta zaidi ya 5000 ambalo awali lilijulikana kama KPL yaani Kilombero Plantations Limited, na kubainisha kuwa anakwenda kuishauri wizara husika kule Zanzibar ili kufanya makubaliano na Wizara inayohusika na shamba hilo na kuingia makubaliano yoyote kuhusu uzalishaji wa zao la mpunga kupitia shamba hilo.

Naye Afisa uhakika Chakula kutoka Wizara ya Kilimo Zanzibar Bi. Zainab Moyo amesema, Wilaya mbili za Malinyi na Kilombero katika Halmashauri ya Mlimba zina uwezo wa kutoa chakula cha mwaka mzima kwa ajili ya Zanzibar huku akipendekeza kuanza kukusanya mpunga ama mchele kutoka Halmashauri ya Mlimba kwa sababu ya urahisi wa usafirishaji bidhaa hiyo kupitia Reli ya TAZARA.

Timu hiyo kutoka Tume ya Mipango Zanzibar iliyokuwa na wataalamu kutoka Taasisi mbalimbali  na kufanya ziara ya siku tano Mkoani Morogoro katika Halmashauri za Malinyi, Mlimba na Ifakara ilikuwa na lengo la kutekeleza maelekezo ya Rais wa Serikali ya Mapinduzi ya Zanzibar Mhe. Dkt. Hussein Ali Mwinyi ya kuhakikisha Zanzibar inapata chakula kwa bei nafuu kutoka Tanzania Bara.

Wataalam walioshiriki ziara hiyo kutoka Zanzibar  ni kutoka sekta mbalimbali za Serikali ya mapinduzi Zanzibar ikiwemo Tume ya Mipango, Benki ya Watu wa Zanzibar (PBZ), Taasisi ya chakula na Dawa, Wizara ya Kilimo, Wizara ya Biashara na Viwanda Zanzibar na shirika la Taifa Zanzibar.


MWISHO