မသေခင်ဖတ်ကြည့်သင့်တဲ့စာအုပ်လို့ပြောရင်တောင် လွန်မယ်မထင်ပါဘူး‼️

မသေခင်ဖတ်ကြည့်သင့်တဲ့စာအုပ်လို့ပြောရင်တောင်
လွန်မယ်မထင်ပါဘူး❗🚦
✅လူတို့ကိုးကွယ်ရာ ဘာသာကြီးများ- ဆန်းလွင် (ဘာသာပြန်)

🔹▫️▫️▫️🔹▫️▫️▫️🔹▫️▫️▫️🔹▫️▫️▫️🔹

(၁)
လူတို့ကိုးကွယ်ရာ ဘာသာကြီးများ စာအုပ်ကို စာအုပ်ထွက်စ (၂၀၁၆)ကတည်းက ဝယ်ထားပေမယ့် စိတ်ဝင်စားရာ တစ်ချို့ဘာသာတွေကိုပဲ အရင်က ဖတ်ဖြစ်ခဲ့ပါတယ်။ ခုရက်ပိုင်းမှ အလုပ်လည်း အားနေလို့ စဆုံးဖတ်ဖြစ်သွားတာပါ။ မသိသေးတာလေးတွေ၊ သဘောကျတာလေးတွေကိုလည်း ဘေးလိုင်းတား၊အောက်လိုင်းတား၊ အမှတ်အသားလုပ်ပြီး ဖတ်ဖြစ်ခဲ့ပါတယ်။တစ်မျက်နှာကို ၃မိနစ်လောက် ကြာအောင်ဖတ်ရပါတယ်။ကျွန်တော်စာဖတ်နှေးတာရယ် သိခက်နက်နဲတဲ့ ဒဿတွေ ပါနေတာရယ် ၊စာမျက်နှာ ဆိုဒ်ကြီးပြီး နှစ်ကော်လံခွဲထားတာကို ဖတ်ရတာကြောင့်လည်း ဒီလောက်ကြာနေတာ ဖြစ်မှာပါ။တစ်နေ့ ၅နာရီ ၆နာရီလောက် ဖတ်ခဲ့ရပြီး ၇ ရက်ကြာမှ အစအဆုံး ပြီးသွားတာ အမှတ်တရပါ။

(၂)
လူတိုင်းအတွက် မှီခိုအားထားကိုးကွယ်လောက်တဲ့ ဘာသာတရား အစစ်အမှန်ရှိမယ်ဆိုရင် ဘယ်သူမဆို လိုချင်ကြတာပါပဲ။
ဒါကြောင့်လည်း လူ့သမိုင်းတစ်လျှောက်မှာ ကိုးကွယ်ရာ ဘာသာတရား အမျိုးမျိုးကို စိတ်ကူးကြံဆ ခဲ့ကြတာပေါ့။
သက်ရှိတွေအားလုံးထဲမှာ လူတစ်မျိုးသာပဲ စဉ်းစားတွေးခေါ်တတ်ပြီး အဲ့ဒီစဉ်းစားတွေးခေါ်တတ်မှုကြောင့်ပဲ ဘာသာတရားဆိုတာလည်း ပေါ်လာရတာပေါ့။

ရှေးခေတ်က လူသားတွေဟာ ဘာသာတရားနဲ့ ပတ်သက်ပြီး အခြေအနေအမျိုးမျိုး ကျော်ဖြတ်ခဲ့ကြရတယ်။ ဒီနေ့ခေတ်မှာတော့ ကျွန်တော်တို့အားလုံးနီးပါးဟာ ဘာသာတရားကို အဲ့သလောက် စူးစမ်းလေ့လာနေတာမျိုး သိပ်လုပ်မနေကြတော့ပါဘူး။ ရှေးရိုးစဉ်လာ မိရိုးဖလာကိုးကွယ်ရာဘာသာတရားကိုပဲ ယုံကြည်ကိုးကွယ်လိုက်ကြပါတယ်။ ကိုယ့်ရဲ့ဘာသာတရားဟာ ကိုယ့်အတွက် ဘယ်လောက် အားကိုးနိုင်တယ်။ ကိုယ့်ဘာသာတရားရဲ့ အနှစ်သာရဟာ ဘယ်လိုရှိတယ်တောင် စဉ်းစား မနေတော့တဲ့သူတွေလည်း ဒုနဲ့ဒေးပါပဲ။

မိမိတို့ရဲ့ မိရိုးဖလာဘာသာတရားကို အတွင်းကျကျ လေ့လာရင်း အခြားဘာသာတွေကိုလည်း ဆက်စပ်လေ့လာပြီးတဲ့နောက် ကိုယ့်ဘာသာတရားထက် ကောင်းမွန်တယ်လို့ ထင်တဲ့ အခြားဘာသာကို ပြောင်းသူတွေရှိသလို ဘယ်ဘာသာကိုမှ မယုံကြည် မကိုးကွယ်တော့တဲ့ သူတွေလည်း ရှိပါတယ်။

ဒီစာအုပ်ထဲမှာ
၁။ ဟိန္ဒူဘာသာ (အိန္ဒိယ)
၂။ ဂျိန်းဘာသာ (အိန္ဒိယ)
၃။ ဗုဒ္ဓဘာသာ (အိန္ဒိယ)
၄။ ဆစ်ခ်ဘာသာ (အိန္ဒိယ)
၅။ တောက်(Tao) ဘာသာ (တရုတ်)
၆။ ကွန်ဖြူးရှပ်ဘာသာ (တရုတ်)
၇။ ရှင်တို ဘာသာ (ဂျပန်)
၈။ ဇိုရိုအက်စတာ ဘာသာ (အရှေ့အလယ်ပိုင်း)
၉။ ယုဒဘာသာ (အရှေ့အလယ်ပိုင်း)
၁၀။ ခရစ်ယာန်ဘာသာ(အရှေ့အလယ်ပိုင်း)
၁၁။ အစ္စလာမ် ဘာသာ (အရှေ့အလယ်ပိုင်း)
စတဲ့ ဘာသာကြီး ၁၁မျိုးရဲ့ စတင်ဖြစ်တည်လာပုံ ၊သမိုင်းကြောင်း၊ဘာသာကြီးတစ်ခုခြင်းစီရဲ့ အတွေးအခေါ် ဒဿနနဲ့ အဆုံးအမ ‌စတာတွေ ပါဝင်ပါတယ်။ ရှေးကျတဲ့ နတ်ကိုးကွယ်မှုသမိုင်းကြောင်းတွေကိုလည်း လေ့လာသိရှိခွင့်ရနိုင်ပါသေးတယ်။

ဒီနေရာမှာ ဘာသာပြန်သူရဲ့ အခန်းကဏ္ဍဟာလည်း အတော်အရေးပါတယ်လို့ ထင်ပါတယ်။ ဘာသာပြန်သူ ဆရာဆန်းလွင်ဟာ ငယ်စဉ်က ဘာသာအမျိုးမျိုးရဲ့ အယူဝါဒအမျိုးမျိုးကို ကိုယ်တိုင် လက်တွေ့စမ်းသပ်လေ့လာပြီးတဲ့နောက်ဆုံးမှာ ဗုဒ္ဓဘာသာကို ယုံကြည်ကိုးကွယ်ဆည်းကပ်လာသူတစ်ယောက် ဖြစ်လာသူပါ။ "ဗုဒ္ဓဘာသာကို ယုံကြည်ကိုးကွယ် ဆည်းကပ်လာသူတစ်ယောက် အကြောင်း"ဆိုတဲ့ စာအုပ်ကိုလည်း ရေးသားထုတ်ဝေဖူးပါတယ်။ ဗုဒ္ဓဘာသာ ဖြစ်လာပြီးနောက်ပိုင်း (ကျွန်တော်အမှတ်မမှားဘူးဆိုရင်) ရှင်အာဒိစ္စဝံသ ဆိုတဲ့ ဘွဲ့အမည်ခံပြီး ရဟန်းဝတ်ခဲ့သူဖြစ်ပါတယ်။ ဒါတွေကို ဘာလို့ပြောနေရတာလဲဆိုတော့ ဘာသာပြန်သူက ဒီစာအုပ်ကို ဘာသာမပြန်ခင်က ကြာတောင့်ကြာလှတဲ့ ကာလကတည်းက ဘာသာတရား မျိုးစုံနဲ့ ရင်းနှီးကျွမ်းဝင်ခဲ့တာပါ။ ဒါကြောင့် ဒီစာအုပ်ကို ဘာသာပြန်ရာမှာ သက်ဆိုင်ရာ ဘာသာတစ်ခုချင်းစီရဲ့ စကားလုံးအသုံးအနှုန်းတွေက သက်ဆိုင်ရာ ဘာသာတွေနဲ့ တစ်သားတည်း ကျနေတာပါ။

နောက်တစ်ချက်က နာမည်တွေကို အောက်ခြေမှတ်စုနဲ့ ဖော်ပြပေးတာဟာ အလွန်ကောင်းမွန်တဲ့ လုပ်ရပ်ဖြစ်ပါတယ်။ တကယ်လို့ စာဖတ်သူက ဘာသာပြန်သူရဲ့ အသံဖလှယ်ထားတဲ့ စကားလုံးကို မနှစ်သက်ရင် မူရင်း အင်္ဂလိပ်စကားလုံးကို ကြည့်နိုင်လို့ ဖြစ်ပါတယ်။

စာအုပ်တစ်အုပ်လုံးကို ခြုံငုံမိအောင် အညွန်းရေးဖို့အထိ ကျွန်တော်မစွမ်းသာပါဘူး။ ဘာဖြစ်လို့လည်းဆိုတော့ ကျွန်တော်က သာမန်စာဖတ်သူ အဆင့်မှာပဲ ရှိနေသေးလို့ပါ။ပြီးတော့ ဘာသာတရားတွေရဲ့ ဒဿနတွေကလည်း သိခက်နက်နဲ လွန်းတာလည်း ပါတာပေါ့။

ဒါပေမယ့် လူတိုင်း မိမိတို့ကိုးကွယ်ရာဘာသာအပြင် အခြားဘာသာတရားတွေ အကြောင်းကိုလည်း တီးမိခေါက်မိ လေ့လာသိရှိထားသင့်တာမို့ ဖတ်သင့်တဲ့ စာအုပ်တစ်အုပ်ဖြစ်ကြောင်းတော့ ရဲရဲဝံ့ဝံ့ပြောဝံ့ပါတယ်။ ဒီစာအုပ်ကို ဖတ်ပြီးတဲ့အခါ ဘာသာတရားတွေရဲ့ ရှည်လျားလှတဲ့ သမိုင်းဖြတ်သန်းမှုနဲ့အတူ အဆုံးအမ ဒဿနတွေကို တီးမိခေါက်မိသိရှိသွားနိုင်တဲ့အပြင်
မိမိကိုးကွယ်ရာ မဟုတ်တဲ့ အခြားဘာသာတရားတွေကိုလည်း အရင်ကထက်ပိုပြီး လေးစားလာမိပါလိမ့်မယ်။

ဆရာဆန်းလွင်ရဲ့ အမှာစာမှာ ပါတဲ့အတိုင်း ပြောရရင် ဒီစာအုပ်ထဲမှာ ဟိန္ဒူတိုင်းမသိတဲ့ ဟိန္ဒူဘာသာအကြောင်း၊ ဂျိန်းတိုင်းမသိတဲ့ ဂျိန်းဘာသာအကြောင်း၊ဗုဒ္ဓဘာသာတိုင်းမသိတဲ့ ဗုဒ္ဓဘာသာအကြောင်း၊ ခရစ်ယာန်တိုင်းမသိတဲ့ ခရစ်ယာန်ဘာသာအကြောင်း၊အစ္စလာမ်တိုင်းမသိတဲ့ အစ္စလာမ်ဘာသာအကြောင်း တွေကို သိခွင့်ရပါလိမ့်မယ်။

#ဆန်းလွင်
#လူတို့ကိုးကွယ်ရာဘာသာကြီးများ
#ဘာသာပြန်
#မြန်မာပြန်