Монгол хэл, хэл шинжлэлийн тэнхим байгуулагдсаны 80 жилийн ойд зориулсан мэндчилгээ

Монгол хэл, хэл шинжлэлийн тэнхим байгуулагдсаны 80 жилийн ойд зориулсан мэндчилгээ

Данкүүк Их Сургуулийн Монгол судлалын тэнхимийн профессор багш нар

Монгол Улсын Их Сургуулийн Монгол хэлний тэнхимийн эрхэм хүндэт профессор багш нар, оюутан, төгсөгчид өө! Монгол хэлний тэнхим үүсгэн байгуулагдсаны 80 жилийн ойд чин сэтгэлийн баяр хүргэе.

Энэ жил Монгол, Солонгос хоёр орны хооронд дипломат харилцаа тогтоосны 35 жилийн ой тохиож буй онцгой жил бөгөөд хоёр орны эрдэм шинжилгээ, соёлын хамтын ажиллагаа улам бүр өргөжин бэхжиж буй цаг үед МУИС-ийн Монгол хэл шинжлэлийн тэнхимийн 80 жилийн ойг хамтдаа тэмдэглэж буйдаа маш их баяртай байна.

1990 онд хоёр улс дипломат харилцаа тогтоосны дараа Дангүүк Их Сургууль, МУИС хоёр их сургууль ах дүүгийн харилцаа тогтоож, нягт хамтын ажиллагааг тасралтгүй хөгжүүлж ирсэн билээ. Энэ хугацаанд хоёр сургуулийн сургалт боловсролын суурин дээр олон шилдэг боловсон хүчин төрөн гарч, хоёр орны харилцаа, хамтын ажиллагааны гүүр болж ирсэн юм. Энэ бол хоёр их сургуулийн олон жилийн турш хуримтлуулсан итгэлцэл, найрамдал, хамтын ажиллагааны үр дүн гэж хэлж болох юм.

МУИС-ийн МХШТ-ээс профессор Ч.Шагдарсүрэн, Ц.Сувд, Л.Ганчимэг, Г.Ариунжаргал, Д.Заяабаатар, О.Дэмчигмаа, Э.Мөнх-Учрал нар Дангүүк Их Сургуулийн Монгол судлалын тэнхимд зочин багшаар ажиллаж, монгол хэлний хичээл сургалтыг удирдан зааж, Монгол судлалын хөгжилд үнэтэй хувь нэмэр оруулсан. Мөн Батхишиг багш Дангүүк Их Сургуульд докторын зэрэг хамгаалсан. Мөн манай тэнхимийн профессор Сон Бёнгү (2011 онд докторын зэрэг хамгаалсан) одоо Дангүүк Их Сургуулийн Сургалтын албаны дарга бөгөөд БНСУ-ын Монгол судлалын нийгэмлэгийн Ерөнхийлөгчөөр ажиллаж, Солонгос дахь Монгол судлалыг хөгжүүлж, залуу судлаачдыг бэлтгэн гаргах их үйлсэд хүчин чармайлтаа гарган ажиллаж байна. Мөн Чой Юнсо (2023 онд докторын зэрэг хамгаалсан) багш энэ жил тус тэнхимийн үндсэн багш болж, монгол хэлний хэлзүй болон орчин үеийн заах арга зүйн чиглэлээр судалгаа хийж, мэргэжлийн мэдлэг туршлагадаа тулгуурлан БНСУ-д монгол хэлний боловсролын чанарыг дээшлүүлэхэд хувь нэмрээ оруулж байна.

Сүүлийн жилүүдэд БНСУ-ын иргэд монгол хэл болон монгол соёлыг ихэд сонирхох болсон нь Солонгосын Монгол судлалыг тэргүүлж байгаа Дангүүк Их Сургуулийн багш нарт ихээхэн үүрэг хариуцлага хүлээлгэж байна. Цаашид бид зөвхөн мэргэжлийн оюутнуудыг бэлтгэн гаргах бус монгол хэл сонирхогч болон энгийн иргэдэд чиглэсэн монгол хэлний боловсролын өргөн хүрээтэй хөтөлбөрүүдийг хэрэгжүүлэхэд тэргүүлэх үүргийг гүйцэтгэхийг зорьж байна.

Дангүүк Их Сургууль цаашид МУИС-ийн МХШТ-тэй хамтын ажиллагаагаа улам бэхжүүлж, сургалт, судалгаа болон багш нар, оюутнууд хоорондын солилцоо зэрэг олон чиглэлд тогтвортой хамтын ажиллагааны жишиг загварыг бий болгон ажиллах болно. Хоёр их сургуулийн хамтын хүчин чармайлтын үр дүнд илүү өргөн хүрээтэй, гүнзгийрүүлсэн эрдэм шинжилгээ судалгааны амжилт гарна гэдэгт итгэлтэй байна.

Дахин Монгол Улсын Их Сургуулийн Монгол хэлний тэнхимийн байгуулагдсаны 80 жилийн ойд халуун баяр хүргэе. Хоёр их сургуулийн бат бөх найрамдал, хамтын хөгжил цэцэглэлтийг чин сэтгэлээсээ хүсэн ерөөе.

Баярлалаа
2025 оны 11-р сарын 29-ны өдөр
Данкүүк Их Сургуулийн Монгол судлалын тэнхимийн профессор багш нар