မြန်မာကို ICJ မှာ တရားစွဲထားတဲ့ ဂမ်ဘီယာ ရှေ့နေအဖွဲ့ခေါင်းဆောင်နဲ့ မေးမြန်းခန်း- BBC News မြန်မာ

ဒီတစ်ပတ် သတင်းမြင်ကွင်း အစီအစဥ် မှာတော့ ရိုဟင်ဂျာတွေ အပေါ် လူမျိုးတုန်းသတ်ဖြတ်မှု ဂျီနိုဆိုက် စွဲချက်နဲ့ အပြည်ပြည်ဆိုင်ရာ တရားရုံး ICJ မှာ မြန်မာအပေါ် တရားစွဲထားတဲ့ ဂမ်ဘီယာ နိုင်ငံရဲ့ ICJ အမှု ရှေ့နေအဖွဲ့ကို ဦးဆောင်သူ အမ် အာဆလန် ဆူလေမန် M. Arsalan Suleman နဲ့ ဘီဘီစီ သီးသန့် မေးမြန်းထားတာကို အထူး အစီအစဥ် အဖြစ် တင်ဆက် ပေးမှာ ဖြစ်ပါတယ်။

ဂမ်ဘီယာဟာ ICJ အမှု အတွက် ဝါရှင်တန်ဒီစီမြို့တော် အခြေစိုက် ဖိုလီဟို့ဂ်ဆိုတဲ့ နိုင်ငံတကာ အငြင်းပွားမှု အမှုခင်းတွေကို အထူးပြု ကိုင်တွယ်တဲ့ ရှေ့နေ အဖွဲ့ကို ငှားရမ်းထားတာ ဖြစ်ပြီး မစ္စတာ ဆူလေမန်ဟာ ဖိုလီဟို့ဂ်က အတွေ့အကြုံရင့် ရှေ့နေတစ်ဦး ဖြစ်ပါတယ်။ မစ္စတာ ဆူလေမန် ဟာ အချုပ်အခြာ အာဏာပိုင် နိုင်ငံတွေကြား ပေါ်ပေါက်တဲ့ နိုင်ငံတကာ အငြင်းပွားမှုတွေမှာ အထူးကျွမ်းကျင်ပြီး၊ ICJ တရားရုံး အပါအဝင် တခြား နိုင်ငံတကာ ရုံးတော်တွေမှာ အမှုလိုက်ထားသူ တစ်ဦး ဖြစ်ပါတယ်။

အခု ကာလ အပိုင်းအခြားဟာ ရိုဟင်ဂျာတွေ အစုလိုက် အပြုံလိုက် ထွက်ပြေးခဲ့ရတဲ့ ၂၀၁၇ ဖြစ်ရပ်ရဲ့ ၆ နှစ်ပြည့်မြောက်တဲ့ ကာလ ဖြစ်သလို၊ မြန်မာစစ်ကောင်စီ အနေနဲ့ ICJ ရုံးတော်ထံ counter-memorial လို့ ခေါ်တဲ့ ချေပလွှာ တင်သွင်းဖို့ ရက်ချိန်းပြည့်တဲ့ ကာလ အပိုင်းအခြားလည်းပဲ ဖြစ်ပါတယ်။

ဒီတော့ .... မြန်မာ စစ်ကောင်စီ ဘက်က ချေလွှာက ဘယ်လို ပုံစံမျိုးလဲ .... ဘယ် အကြောင်းအရာမျိုးတွေ ပါဝင်ပြီး ... ဘယ်လို ငြင်းခုံမှုတွေ ပြုလုပ်ထားပါလဲ ... ဒီ အချက်တွေကို အခု အစီအစဥ်ထဲမှာ ကြားကြရဖို့ ရှိသလို ... ဂမ်ဘီယာရဲ့ ရှေ့နေအဖွဲ့ အနေနဲ့ အမှုအတွက် ဘာတွေ ပြင်ဆင်နေလဲ ... ဒီသီတင်းပတ်တွေ အတွင်း ICJ မှာ ဘာတွေ မြင်တွေ့ လာဖွယ် ရှိလဲ ဆိုတာတွေကိုလည်း ဂမ်ဘီယာ ရှေ့နေ အဖွဲ့ကို ဦးဆောင်နေသူ ကိုယ်တိုင်ရဲ့ ပြောဆိုချက်တွေကို ကြားကြရမှာ ဖြစ်ပါတယ်။

ဂမ်ဘီယာ ရှေ့နေအဖွဲ့ ခေါင်းဆောင် အာဆလန် ဆူလေမန်ကို ဘီဘီစီသတင်းထောက် ကိုဝေဖြိုး ဆက်သွယ် မေးမြန်းထားပါတယ်။ #ဘီဘီစီမြန်မာပိုင်း #သတင်းမြင်ကွင်း