Բացվեց Արմենակ Ուրֆանյանի անվան հրաձգարան. Armenak Urfanyan

Ապրիլի 3-ին, Երևանի Նիկոլայ Գոգոլի անվան թիվ 35 դպրոցում տեղի ունեցավ ապրիլյան պատերազմի մերօրյա հերոս կապիտան Արմենակ Ուրֆանյանի անունը կրող հրաձգարանի բացման արարողությունը: Հենց այս դպրոցում է սովորել հերոսը:

Միջոցառմանը ներկա էին հերոս հրամանատարի հարազատները, մայրը՝ Համեստ Ներսիսյանը, եղբայրը՝ Ֆրանց Ուրֆանյանը, ապրիլյան պատերազմի հերոսներ Անդրանիկ Զոհրաբյանի եւ Գրիգոր Հարությունյանի ծնողները, ապրիլյան պատերազմի մասնակից Հայկ Թորոսյանը, Արցախի հերոս Արկադի Տեր-Թադեւոսյանը, ՀՀ պաշտպանության փոխնախարար Արտակ Զաքարյանը, Ազգային ժողովի պատգամավորներ Տաճատ Վարդապետյանը, Շիրակ Թորոսյանը, Երեւանի փոխքաղաքապետ Դավիթ Օհանյանը, քաղաքապետարանի աշխատակազմի հանրակրթության վարչության պետ Աննա Ստեփանյանը եւ այլք:

«Արմենակ Ուրֆանյանն այն սպաներից էր, ով իր զինվորների հետ միասին արյան վերջին կաթիլը տվեց հայրենիքին, անկախությանը: Մեր խոնարհումը՝ բոլոր զոհված ազատամարտիկներին եւ շնորհակալությունը՝ այն ընտանիքներին, որոնք ծնել են նման հերոս տղաների»,- ասաց Երեւանի փոխքաղաքապետ Դավիթ Օհանյանը:

Պաշտպանության նախարարության կողմից Արմենակ Ուրֆանյանի մայրը՝ Համեստ Ներսիսյանը, պարգեւատրվեց հայրենիքին անմնացորդ նվիրված, անձնազոհ զավակ դաստիարակելու համար։ Իսկ Թալիշի վետերանների միության կողմից տիկին Համեստը պարգևատրվեց "Թալիշի պաշտպան" հուշամեդալով։