Шалғайдағы Шәкен ауылына тіршілік нәрі тартылды

#qyzylordatv
Қазалы ауданына қарасты Шәкен ауылына ауыз су желісі тартылып, тұрғындардың тұрмысы жеңілдеді. Ал, Майдакөл ауылында жаңа клуб пайдалануға берілді. Сондай-ақ, Әйтеке би кентінде жаңа қонақ үй өз жұмысын бастады. Салтанатты шараға облыстық мәслихат төрағасы Мұрат Тлеуметов пен облыс әкімінің орынбасары Қайрат Нұртай қатысты.

Тұрмысы жеңілдеп, өркениет игілігіне ілескендердің бірі - Рәзия Тасмағамбетова. Ауылға келін болып түскеннен тіршілік нәрінен таршылық көрген оның қуанышында жек жоқ. Себебі, есік алдындағы ұңғымадан шелектеп су тасу машақатынан біржола құтылмақ.

Аудан орталығынан 120 шақырым қашықта жатқан ауылда бүгінде жетпіске жуық үй тұрады. Оның әрқайсысына арнайы су желісі жеткізіліп, тіршілік нәрімен толықтай қамтылды. Облыстық мәслихат төрағасы мен облыс әкімінің орынбасары ауылға арнайы барып, тұрғындардың қуанышына ортақтасты.

Жалпы, ауылда ішкі орамдық желілерді орталықтандырылған жүйеге қосу үшін 8 шақырым құбыр тартылған. Бір ұңғыма қазылып, су жинағыш резеруар салынған. Бұл жұмыстарға әртүрлі қаржы көздерінен 389 млн теңге бөлінген. Айта кету керек, осылайша аудан халқының орталықтандырылған ауыз суға қосылу көрсеткіші 100 пайызға жетіп отыр. Бұл мемлекет тарапынан жасалған қолдаудың нәтижесі, дейді мамандар.

МАЙДАКӨЛДЕ КЛУБ ПАЙДАЛАНУҒА БЕРІЛДІ
Ақжона ауылдық округіне қарасты Майдакөл ауылында жаңа клуб пайдалануға берілді. Екі қабаттан тұратын ғимарат заманауи талаптарға сай салынған. 100 орындық клубта арнайы сахна, кабинеттер мен кітапхана бар. Сондай-ақ, балалардың шығармашылығын дамытатын ән, домбыра, би, көркем сөз, қолөнер үйірмелері жұмыс істейді.

Жаңа мәдениет ошағында жеткіншектердің шығармашылығын дамыту үшін барлық мүмкіндік қарастырылған. Мәселен, 50-ге жуық ауыл баласы бес бағыт бойынша тәрбиеленіп, кәсіби мамандардан дәріс алуда. Солардың бірі – Сахи Сәмет. Жас өрен көркөм сөз үйірмесіне қатысып, ақындыққа машықтанып келеді. Енді, ол жаңа ғимараттағы домбыра үйірмесіне келіп, айтысқа шығуды армандайды.

Сондай-ақ, Әйтеке би кентінде жаңа қонақ үй ашылды. Кәсіпкер жобаны жүзеге асыруға жеке қаражаты есебінен 500 млн теңге салған. Ғимарат заман талаптарына сай, келушілерді күту аймағынан бастап қонаққа жайлы етіп жасақталған. Кездесулерге арналған конференция залы мен лаундж аймағы бар.

Сайт - https://qyzylordatv.kz/ru/live
Facebook -   / qyzylordatv  
Instagram -   / qyzylordatv  
Telegram - https://t.me/qyzylorda_tv
Tiktok -  / qyzylorda_tv