Özünüməşğulluq proqramı: biznes planlar əsasən kənd təsərrüfatı sahəsinə aiddir

Əmək və Əhalinin Sosial Müdafiəsi Nazirliyinin özünüməşğulluq proqramı üzrə təşkil olunan təlim kurslarını bitirən işaxtaran və işsiz vətəndaşların hazırladıqları biznes-planların qiymətləndirilməsi prosesi başa çatıb. Qiymətləndirmə prosesi Dövlət Məşğulluq Xidmətinin Bakı Regional Peşə Tədris Mərkəzində aparılıb.
Mətin Kərimli əmək və əhalinin sosial müdafiəsi nazirinin müavini: “Bu layihələrin böyük əksəriyyəti, təxminən 85 faizi kənd təsərrüfatı sektorunu əhatə edir. Bundan başqa, 9 faiz və ondan bir az yuxarı xidmət sektorunu əhatə edən layihələr var. Eyni zamanda ticarət sektoru və digər sektorlara aid layihələr də mövcuddur. Həmin insanların özünüməşğulluq layihələrinin icrasına nazirlik tərəfindən mal və avadanlıqlarla yardım ediləcək və bu təmin olunacaq”.
İki gün davam edən ilk qiymətləndirmədə təlimdə iştirak edən 271 nəfərdən 153-ü biznes-planını müdafiə edib. Biznes-planlar biznes ideyasının reallaşdırılmasına hazırlıq, peşəkarlıq və təcrübə, motivasiya meyarları əsasında qiymətləndirilib.
Elşad Cəbiyev, Laçın sakini: “2012-ci ildən Məşğulluq idarəsində qeydiyyatda idim. Cənab Prezidentimizin işsizlərin işlə təmin olunması haqqında sərəncamına əsasən mən də inanıram ki, işlə təmin olunacam və bu sahədə uğur qazanacam. İdeyam xırda buynuzlu heyvandarlıqdır, mənim bu sahədə təcrübəm var, gəlirli bir sahə olduğu üçün seçmişəm. İnanıram ki, bundan uğurlu nailiyyətlər əldə edəcəm və özümə qazanc yolu əldə edəcəm.
Sədayə Abdullayeva, Tərtər sakini: “Mənim biznesimin adı dərzilik sexidir. Mən bu sənəti sevdiyim üçün bu layihəyə qoşuldum, rayonumuzda bu sahəyə ehtiyac var. Bu layihədən də gəldim, imtahan verdim, keçdim”.
Sədi Əhədov, Bərdə sakini: “Burada südçülük, ətçilik və heyvandarlıq biznesini fikrim var ki, o ideyayla öz biznesimi inkişaf etdirirəm. Buna inamım var. Şəraitimiz var, lakin buna imkanım yoxdur. Lakin bu gözəl layihə əgər baş tutarsa, çox əminəm ki, çox gözəl biznesimi inkişaf etdirəcəyəm və maddi rifahımı yaxşılaşdıracağam”.
Ailə bizneslərini təşkil etdikdən sonrakı dövrdə də vətəndaşların özünüməşğulluq fəaliyyəti mütəmadi monitorinqlər vasitəsilə izləniləcək. Onlara öz təsərrüfatlarını inkişaf etdirmələri, uğurlu biznes qura bilmələri üçün müvafiq məsləhətlər, tövsiyələr veriləcək. Təlim kurslarını bitirmiş digər şəxslərin də biznes-planlarının müəyyən olunmuş vaxtlarda qiymətləndirilməsi təmin olunacaq.

Qeyd edək ki, özünüməşğulluq proqramıında iştirak etmək istəyən vətəndaşlar ikiaylıq təlim kurslarında iştirak edirlər. Təlim kursu müddətində iştirakçılar özünüməşğulluq fəaliyyəti üçün seçdikləri sahələr üzrə biznes-plan hazırlamalıdırlar. İndiyədək 52 rayon və şəhər üzrə 71 qrup tərkibində 997 nəfər bu kurslara cəlb olunub. İndi müsahibə əsasında növbəti təlim kurslarına cəlb ediləcək şəxslərin seçilməsi və onlar üçün təlimlərin təşkili işləri aparılır.