Tv Klan - Plehrat në bregdet, bashkitë nuk ndërhyjnë

Destinacioni kryesor i bregdetit të Adriatikut në veri vijon të ketë pamjen e një landfilli. Mbetjet që i sollën lumenjtë e rrëmbyeshëm kanë mbetur prej ditësh aty dhe askush s’i lëviz.

“Tonaleta me mbeturina kanë mbushur bregdetin e Velipojës, ndërkohë që nuk ka akoma një aksion pastrimi. Ndërhyrja këtu mbetet emergjente”, thotë gazetarja Emi Kalaja.

Edhe pse situata është alarmante prej ditësh dhe plehrat e Shqipërisë kanë pushtuar gjithë Adriatikun sa kanë përfunduar deri në Kroaci, autoritetet në Shkodër njoftuan se do të nisin një aksion vetëm këtë javë për t’i mbledhur dhe depozituar mbetjet në Landfillin e Bushatit.

Por situata nuk është e rëndë vetëm në Velipojë. I gjithë bregu i Adriatikut është mbushur me mbetje, pasi lumenjtë mblodhën çdo gjë që gjetën të hedhur kudo nga papërgjegjshmëria qytetare.

“Ndotja e bregdetit të Adriatikut në qarkun e Fierit ka marrë përmasa alarmante. Në këto plazhe lumi ka sjellë me vete mbetje plastike, industriale, që prej dy javësh nuk janë larguar nga plazhet”, thotë gazetarja Anila Sefa.

Bregu i Semanit është mbuluar nga tonelata mbetje plastike. Ndotja ka marrë përmasa të mëdha, duke shkaktuar dëm në habitatin natyror të zonës, shëndetin dhe zhvillimin e turizmit.

“Kjo bëhet gjithnjë sa herë që vjen lumi, kjo punë është. Largohet peshku. Kjo zonë këtu nuk është pastruar asnjëherë, vetëm ajo andej nga plazhi”, shprehet një peshkatar.

Gjendja është problematike edhe në bregdetin e Durrësit. Në shumë zona buzë detit gjen mbetje të shumëllojshme. Më e rëndë situata është pranë Hamallajt dhe Ishmit, si pasojë e hedhjes pa kriter të mbeturinave përgjatë shtratit të lumenjve Ishëm dhe Erzen.

“Edhe pse situata e ndotjes është e rëndë, asnjë nga institucionet përgjegjëse në terren nuk kanë nisur punën për pastrimin e vijës bregdetare. Plazhet e Durrësit ndoten çdo vit dhe çdo vit mungon një plan konkret për pastrimin dhe menaxhimin e tyre”, thotë gazetarja Enkeleda Arapi.

Situata katastrofike kaloi përtej Shqipërisë. Një pjesë të konsiderueshme të mbetjeve deti Adriatik i mori me vete nga vendi ynë dhe i çoi në Dubrovnik. Mediat kroate raportuan se kjo është një situatë e përsëritur thuajse çdo vit. Por ndryshe nga këtu, teksa tonelata mbetjesh vijojnë të qëndrojnë përgjatë bregut të Adriatikut, Dubrovniku u pastrua brenda tre ditëve.

Për ekspertët e mjedisit kjo situatë ndodh për shkak të keqmenaxhimit.

“Problematika e mjedisit ka ardhur duke u përkeqësuar. Ajo që ka ndodhur është një shprehje e përsëritur e keqmenaxhimit të mbetjeve në territor që pasi kalojnë në lumenj dhe në det rikthehen përmes dallgëve në breg”, tha Mihallaq Qirjo, ekspert mjedisi.

Dëmet që ndotja shkakton në shumicën e rasteve, nëse nuk ndërhyhet për një kohë të gjatë, sikurse po ndodh aktualisht përgjatë Adriatikut, sipas ekspertit janë të parikuperueshme.

“Në tokë degradojnë cilësinë e tokës, mund të shkaktojnë dëmtim të habitateve që nuk mund të rikthehen më apo dëmtim të faunës dhe florës. Më së shumti ne duhet të shohim dëmet që vijnë në shëndetin e njerëzve, për shkak se ndotja e mjedisit sjell ndotje në burimet ushqimore që ne përdorim, ujin e pijshëm. Ka një përpjestim të drejtpërdrejtë në shëndetin e popullatës”, tha Mihallaq Qirjo, ekspert mjedisi.

Situata me ndotjen ka ardhur duke u përkeqësuar. Dhe ndërkohë që Shqipëria ka hapur të gjithë grupkapitujt në kuadër të integrimit, mjedisi konsiderohet ndër më të vështirët, nisur edhe nga situata në të cilën ndodhet vendi.
SUBSCRIBE to “RTV KLAN” on YouTube for more videos!

Email: [email protected]

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow Tvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/