လက်ပံတန်းကစစ်တပ်ဂိတ် တိုက်ခိုက်ခံရလို့ ၅ ဦးသေဆုံးပြီး သေနတ် ၂ လက်သိမ်းဆည်း

လက်ပံတန်းကစစ်တပ်ဂိတ် တိုက်ခိုက်ခံရလို့ ၅ ဦးသေဆုံးပြီး သေနတ် ၂ လက်သိမ်းဆည်း

မြေလတ်အသံ၊ ဒီဇင်ဘာ ၂၊ ၂၀၂၅။

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်ရှိ စစ်ကော်မရှင်တပ်စခန်းတခုကို ဝင်ရောက်တိုက်ခိုက်ခဲ့ရာ ၅ ဦးသေဆုံးပြီး သေနတ် ၂ လက်သိမ်းဆည်းရရှိခဲ့တယ်လို့ ပဲခူးရိုးမ PDF ဗျူဟာ ၂၂ က ပြောပါတယ်။

လိပ်ဥကုန်းလမ်း၊ မဒေါ့၊ သရက်ကုန်း၊ ပြည်တော်သာအာရှလမ်းမရဲ့လမ်းဆုံရှိ ကျောက်တွင်းရွာမှာ အင်အား ၂၀ ဝန်းကျင်အထိုင်ချထားတဲ့ စစ်ကော်မရှင်ဂိတ်စခန်းကို ဗျူဟာ ၂၂ ကွပ်ကဲမှုအောက်ရှိ အမှတ် ၃၈၀၂ တပ်ရင်း တပ်ခွဲ ၂၊ ရွှေတန်းမြေ ပကဖ၊ လက်ပံတန်းမြို့နယ်ပကဖ အထူးတိုက်ခိုက်ရေးအဖွဲ့တို့က နိုဝင်ဘာ ၃၀ ရက်မနက်ပိုင်းမှာ တိုက်ခိုက်ခဲ့တာပါ။

"စခန်းမှာ ရန်သူက ၁၀‌ ယောက်၊ ၁၅ ယောက်ဝန်းကျင်ရှိပါတယ်။ တခြားလက်နက်တွေက ရန်သူက ပြန်ဆွဲပြီး ပြေးကြတာပေါ့။ တိုက်ပွဲကြာချိန်က ခန့်မှန်း နာရီဝက် ၁ နာရီနီးပါးကြာမြင့်ပါတယ်" လို့ ပဲခူးရိုးမ PDF ဗျူဟာ၂၂ တာဝန်ခံက ပြောပါတယ်။

တိုက်ပွဲအတွင်း စစ်ကော်မရှင်တပ်သားအလောင်း ၅ လောင်း၊ ကာဘိုင် ၁ လက်၊ MA 1 ၁ လက်၊ 5.56 ကျည် ၁၅၀ တောင့်နဲ့ မိုဘိုင်းဖုန်း ၂ လုံးတို့ကို သိမ်းဆည်းရရှိခဲ့ပြီး တော်လှန်ရေးပူးပေါင်းတပ်ဖွဲ့တွေဘက်ကတော့ ထိခိုက်မှုမရှိခဲ့ဘူးလို့ သာယာဝတီခရိုင် တပ်ရင်း ၃၈ဝ၂ တပ်ခွဲ ၂ တာဝန်ရှိသူက ပြောပါတယ်။

"ဂိတ်စခန်းမှာတော့ အင်အားက ၂၀ ကျော် ၃၀ လောက်ရှိမယ်ဗျ။ မနက်စောစောစီးစီးဆိုတော့ ပြန့်ကျဲနေတာပေါ့။ ကျနော်တို့လည်း ဝင်ရောက်စီးနင်းတဲ့အချိန်ကျရော အကုန်ပြေးကြတာပေါ့ဗျာ။ ပြေးတာကိုလည်း ကျနော်တို့တော်တော်လှမ်းလှမ်းကို လိုက်ရတယ်ဗျ။ သေဆုံးတဲ့ကောင်တွေက လယ်ကွင်းအစပ်တွေမှာက ၄ ကောင်ဗျ။ ဂိတ်ထဲမှာက ၁ ကောင်ဗျ။ စုစုပေါင်း ၅ ကောင်ပေါ့"လို့ တပ်ရင်း ၃၈ဝ၂ တပ်ခွဲ ၂တာဝန်ရှိသူက ပြောပါတယ်။

တိုက်ပွဲဖြစ်ပွားချိန် ၁ နာရီနီးပါးအကြာမှာ ဂိတ်စခန်းရှိကျန်ရှိနေသေးတဲ့ စစ်ကော်မရှင်တပ်သားတွေက ၎င်းစခန်းနဲ့အနီးဝန်းကျင်မှာရှိတဲ့ မှော်အင်းနဲ့ သာယာကုန်းရွာစခန်းတွေဆီကို ထွက်ပြေးသွားခဲ့ကြတယ်လို့ သူက ဆိုပါတယ်။

ပဲခူးရိုးမ PDF ဗျူဟာ ၂၂ ကွပ်ကဲမှုအောက်ရှိ တပ်ရင်း၊ တပ်ခွဲတွေ၊ ပကဖတပ်ဖွဲ့တွေအနေနဲ့ အခုလိုမျိုး စစ်ကောင်စီတပ်စခန်းတွေကို ထပ်မံပြီးတိုက်ခိုက်နိုင်ဖို့အတွက် လက်နက်နဲ့ကျည်ဆန်တွေ လိုအပ်လျှက်ရှိနေတာကြောင့် ပြည်သူတွေအနေနဲ့ ဗျူဟာ ၂၂ တဆင့် ထောက်ကူပေးနိုင်တယ်လို့လည်း တောင်းဆိုထားပါတယ်။

ပြီးခဲ့တဲ့နိုဝင်ဘာ ၂၃ ရက်မနက်ပိုင်းကလည်း ကြို့ပင်ကောက်မြို့နယ်၊ ကြည်စုရွာအနီးရှိ စစ်ကော်မရှင်တပ်ရဲ့စစ်ဆေးရေးဂိတ်ကို တော်လှန်ရေးပူးပေါင်းတပ်ဖွဲ့တွေက ဝင်ရောက်တိုက်ခိုက်ခဲ့ရာ ရဲ ၁ ဦးနဲ့ ပြည်သူ့စစ် ၄ ဦး စုစုပေါင်း ၅ ဦးသေဆုံးသွားပြီး သူတို့ကိုင်ဆောင်တဲ့ BA 63 ၁ လက်၊ BA 64 ၁ လက်၊ MA 13 ၁ လက်တို့ကိုပါသိမ်းဆည်းရရှိခဲ့တယ်လို့ သိရပါတယ်။

သတင်း - အောင်စိုး၊ စာတည်း - လင်း၊ တည်းဖြတ် - M

#မြေလတ်အသံ
#ပဲခူး #လက်ပံတန်း #စစ်တပ်ဂိတ် #တိုက်ခိုက် #သေဆုံး #လက်နက်သိမ်းဆည်း⁩⁩