Aksyon Laban sa Kahirapan - Season 2 – Episode 41

Tampok sa ika-41 na episode ng Aksyon Laban sa Kahirapan (AKSYON) ang panayam kay National Youth Commission (NYC) Chairperson Joseph Francisco “Jeff” Ortega sa programang Rise and Shine Pilipinas ng PTV-4, Agosto 5.

Inilahad ni Chairperson Ortega ang kahalagahan ng makabuluhang partisipasyon ng kabataan sa pamahalaan at sa mga hakbangin laban sa kahirapan. Aniya, kadalasan nahuhuli sa konsultasyon ang mga kabataan pagdating sa pagbuo ng mga desisyon sa pamahalaan, kaya’t layunin ng NYC at National Anti-Poverty Commission (NAPC) na bigyan sila ng boses at kapangyarihan lalo na sa antas ng barangay.

Binigyang-diin niya ang papel ng Sangguniang Kabataan (SK) bilang plataporma kung saan maaaring magplano at magtalaga ng pondo ang kabataan para sa mga programang tutugon sa mga isyung panlipunan tulad ng teenage pregnancy na isa sa mga pangunahing sanhi ng kahirapan dahil sa kawalan ng sapat na paghahanda.

Ibinahagi rin niya na bumaba ang youth poverty incidence mula 16% noong 2021 patungong 14% noong 2023, at layunin ng komisyon na lalo pa itong mapababa pagsapit ng 2028. Ayon sa NYC, saklaw ng youth sector ang mga indibidwal na may edad 15 hanggang 30.

Kabilang sa mga itinutulak ng komisyon ang Philippine Youth Development Plan na nakatuon sa mga haligi gaya ng edukasyon at social inclusion. Isa sa mga pangunahing adbokasiya nito ang mandatory at continuing training para sa mga opisyal ng SK. Ayon kay Chairperson Ortega, bago pa man maipatupad ng mga SK official ang kani-kanilang mga programa, kailangan muna silang sanayin ng NYC sa loob ng isa hanggang isa’t kalahating taon upang matiyak ang kanilang kahandaan at epektibong pamumuno.
Inilahad din niya ang kahalagahan ng Youth and Students Sectoral Council na bahagi ng NAPC, kung saan ipinaparating at pinapakinggan ang boses ng kabataan mula sa iba’t ibang pananaw. Binanggit din niya ang pahayag ni Pangulong Ferdinand “Bongbong” Marcos Jr. sa kanyang ikaapat na SONA na kailangang pakinggan ang lahat ng sektor — konserbatibo man o progresibo — upang maunawaan ang tunay na kalagayan sa mga komunidad, hindi lamang batay sa mga ulat.

Binigyang diin rin niya ang pahayag ng Pangulo sa SONA na kailangang mag-invest ang mga ahensya ng pamahalaan sa kabataan at sa mga lingkod-bayan upang matiyak na tunay na umaabot sa mamamayan ang serbisyong pampubliko.

Tinalakay din ni Chairperson Ortega, ang layunin ng komisyon na magbigay ng mga kinakailangang pagsasanay at oportunidad para sa pag-unlad ng mga kabataang hindi nakatapos ng pormal na edukasyon. Sa pakikipagtulungan sa mga ahensya tulad ng Technical Education and Skills Development Authority, Commission on Population and Development, Commission on Higher Education, at Department of Education, nilalayon ng Komisyon na muling maibalik ang mga out-of-school youth sa loob ng mga institusyong pang-edukasyon.

Ibinahagi rin ni Chairperson Ortega na marami sa mga kabataang Pilipino ang nagsisilbing breadwinner ng kanilang pamilya — matatalino at may kakayahan, ngunit napipilitang magtrabaho sa murang edad. Umaasa siya na magkaroon ng mga mekanismo na magpapahintulot sa kanila na makapagpatuloy sa pag-aaral habang kumikita upang matulungan ang kanilang pamilya.

#NAPC26
#AksyonLabanSaKahirapan
#BagongPilipinas