ذئب همدان | زامل جديد من اضخم الزوامل 2025

يامــــأرخ جـــــروح الوقت قبل المواجع
شل من ذيـب همدان ذي تعنّاك عنوه ؟!

شل من واقع أحمد بن عـــوض يامتابع
شل ابيــات عظمى واقعيــات قوه

شل من خافقه ذي صوّر أحساس واقع
باسم قلبه ومن هــو عايشين نفس جوه

صاغ من وضع عاشه في جميع المواقع
وادرجه في قصيدة تنتقي الف نقوه

بو ربُيــد قال ياشرح الزمن لاتراجع !!
قد فهمنا دروس البعض خطوة بخطوة

قـد اخــذنا دروس الكل في صف رابع
ابتـدائي وعـاد القــط راقــد بغفوه

بعض الاصحاب فيهم مايزيدك تدافع
نحو كسب الرجاجيل هم لنا خير اسوه

وبعض الاصحاب ياغبني على وقت ضايع
سار في معرفتهم وانتهت دون جدوه

بعض الاصحاب ياقهرى على قد طبايع
مانفعهم نصايحنا ولا الف ندوه

في طريق المصالح كل من هو مسارع
البطل من لقف له عندنا اي زوه

ذا مجامل ومتملق وذا شخص بارع
في فنون الموسيقى يعزفك بالف غنوه

وذا وفي تبسره عن قرب لكن مخادع
نعرفه لو يموه بايش ما كان موه

وذا جدير الحيل دكتور له فكر واسع
برفسفور في النذاله اشترا الغدر شروه

وذا يقلد وهو مفضوح وانسان ناجع
لاسبر يوم يومين يتضح بعد غدوه

صحبه اليوم تعييك بين شامخ وخاضع
ياتوقف مسارك ياتواصل بقسوه

وان تقول باتصيح يقهرك شخص جازع
حين يقول للبقيه بايسدوا هم اخوه

صاحب اليوم مثل المنتجات المقاطع
قاطعه قبل ما يوَصل حياتك لبلوه

ذي ينافق ينافق وذي يلاوع يلاوع
وقبح الله وجيه من قال هذا مخوه

حال وضع الصحب مفجع وكله فجايع
تزوب الروح تهلك بين فجوه وفجوه

وبن عوض قالها من قلب منهد قانع
لاتساير في الدنيا سوا شخص قدوه

ساير الجيد واترك صحبه اهل الشوارع
لو صفى لك سوا صاحب ملانه مروه

الوفي من تمسك بالقيم والتواضع
وثروة العز والناموس لنا اعز ثروه
#الشعرالشعبي #اكسبلور #جديد