زحول

للتواصل والاستفسارات :
الحسابات الرسمية
​
‏Official WhatsApp :
https://api.whatsapp.com/send?phone=5...



_____________
__


الليل لا سدّل جناحه قاد سرب الذكريات
واعيش لحظات ما فال الدالهين بفالها

تضيق الارض الواسعة مع كامل الاربع جهات
واسلم امري للإله وحالتي يرثى لها

احيان اقول الموت فعلاً صار اخير من الحيات
واحيان تجذبني مفاتنها وحبة خالها

حصير هاجوسي حصير الشايب اللي في غمات
سويت مثله يوم ساد الاندلس واطلالها

مافيه شيء ما تبينه الليال اللافيات
يا الله بصبر ينقض الحجه على فتالها

فالمجتمع ما عاد اعين لا ثقال ولا ثقات
بعض العرب عقالها راحوا مثل جهالها

والادمي لا ارضى ضميره واتمم فروض الصلات
لو تعترض قدمه جبال الهيملايا شالها

الناس ماخلقت سواء فالمرجلة والطايلات
من خلقت الدنيا نعرف سمانها وهزالها

والطيب واهل الطيب واللي لا اندعى الداعي دهات
يستاهلون من البيوت جزالها وطوالها

منجوبة المبدع مرابعها الديار الخاليات
ولا ارتاح لين اثور العلياء وافك عقالها

قريحة الشاعر ليا منها دعتها الواجبات
تلفح ظفايرها من الدجرة وترمي شالها

مركاضها فالطيب ياخذ من صفون العاديات
فيها من الخيل العتاق رّهيمها وجفالها

ترفع لك البيضاء يا ذخر هلال فوق النايفات
هليل بن هلال والطالة لها خيالها

زحل من زحول الجياشه كاسبين الاولات
من روس بلحارث هل الناموس ومن ابطالها

الاسم ينحت فالصخر ماهوب في ظل العبات
أبرز من اللي يقسم القلة ليا ساوى لها

في عالم الخيل الأصايل منفرد نظره وذات
في كل مربط خيل تلقى بصمته وافعالها

اليا لقى اللي تنزوي مع وسع منخرها الحصاة
من خفها يسبق جسدها فالسباق ظلالها

راهن على ناموسها و ألجم فواه اهل الشمات
لا حط معدال التحدي ماوخذ معدالها

راعي وفاء ومجمل بكل المعاني والصفات
له سمعة بالطيب كلمة والنعم تبرالها

ولد هلال بن علي والاسم والسيماء ثبات
الشايب اللي كل طالة للعلا يسعى لها

الشيخ ابو نادر ليا جات الأمور الكايدات
يحلها وكبود عدوانه يزيد غلالها

الحارثي لا ثارت الهيجاء نهار النايبات
عز الفتاه اللي من الراعة رمت سلسالها

يتبع هواء وضح بسم جده و وسمه شامخات
عنها يخزم القوم ويعشى الضيوف عيالها

ما ردها عن شفها ومدلهة ومشيخات
مثل الجواهر والحلي من يوم هم بحالها

يرتع بها في قافر توه جديد من النبات
في ديرة يصعب على بعض البدو منزالها

اليا انتوى يكرب حزامه دونها لو ما يبات
اما على مسنادها ولا على محوالها

ذولا بني الحارث عزاز الجاه عون الموجبات
قبيلةً ما تخطي الحق النقي عقالها

تزهاكم الامجاد يا صفوة رجال المعجزات
وتشهد لكم شبه الجزيرة برها وجبالها