15 04 25 Տեղի ունեցավ Սևան համայնքի ավագանու 7-րդ նստաշրջանի 3-րդ նիստը:

Սևան համայնքի ավագանու 7-րդ նստաշրջանի 3-րդ նիստի օրակարգային հարցերը հաստատելուց հետո Սևանի համայնքապետարանի աշխատակազմի ֆինանսատնտեսագիտական, եկամուտների հաշվառման և հավաքագրման բաժնի պետի ժ/պ Մարիանա Ռաֆայելյանը ներկայացրեց հաղորդագրություն 2025թվականի բյուջեի առաջին եռամսյակի կատարման հաշվետվության վերաբերյալ:
Համաձայն ներկայացված հաղորդագրության՝ վարչական բյուջեում սեփական եկամուտները կատարվել են 106.2 %-ով / պլան` 140357.5 հազ. դրամ, փաստացի` 149090.1 հազ. դրամ/,գերակատարումը կազմել է 8732.6 հազ. դրամ կամ 6.2 %:
Եկամտատեսակներից գերակատարվել է հողի հարկը՝ 165.9 %, տեղական տուրքերը՝ 8 անգամ, վարձակալության վճարը՝ 3 անգամ, ինքնակամ կառույցների օրինականացման վճարների պլանը՝ շուրջ 3 անգամ։ Թերակատարվել է ԱԳՀ-ն, հավաքագրումը կազմել է 36.6%, տրանսպորտային միջոցների գույքահարկի հավաքագրումը կազմել է 97.5 % , աղբահանության վճարը՝ 79.7%:
Զեկուցողը ներկայացրեց կատարողականը՝ ըստ եկամտային և ծախսային բաղադրիչների:
Օրակարգային հաջորդ հարցը վերաբերում էր 2024 թվականի դեկտեմբերի 17-ի՝ «Սևան համայնքի 2025 թվականի բյուջեն հաստատելու մասին» 170-Ն որոշման մեջ փոփոխություն կատարելուն, որի վերաբերյալ ընդունվեց համապատասխան որոշում:
Համայնքի ավագանու քննարկմանը ներկայացված մյուս հարցերը ներկայացրին աշխատակազմի քաղաքաշինության և հողաշինության բաժնի պետ Մեսրոպ Մկրտչյանը և աշխատակազմի քարտուղար Արմենուհի Ղուկասյանը:
Ավագանին հաստատեց 2025թվականի 1-ին եռամսյակում Սևան համայնքի կողմից սեփականության իրավունքով ձեռքբերված և օտարված գույքի գույքագրման փաստաթղթերը:
Ավագանու որոշմամբ Սևան համայնքի տեղական ինքնակառավարման մարմնում և համայնքի աշխատակազմում ստեղծվեց կոռուպցիոն ռիսկերի ինքնագնահատման աշխատանքային հանձնաժողով և սահմանվեց գործունեության կարգը:
Սևան համայնքի ավագանու մեկ այլ որոշմամբ Ծաղկունք բնակավայրում անվանակոչվեցին փողոցներ:
Քննարկմանը ներկայացված մի շարք դիմումներ ստացան սպառիչ պատասխաններ՝ համապատասխան որոշումների ընդունմամբ, որոշ դիմումներ էլ խմբակցություններում լրացուցիչ քննարկումներից հետո կներկայացվեն ավագանու հաջորդ նիստին:
Հերթական նիստն ամփոփելիս Սևան համայնքի ղեկավար Սարգիս Մուրադյանն անդրադարձ կատարեց Սևան համայնքում մեկնարկած սուբվենցիոն և ընթացիկ ծրագրերին, մասնավորապես նշեց, որ համայնքային բյուջեի միջոցներով մեկնարկել են Սևանի ճանապարհների նորոգման և ճաքալցման աշխատանքները: Գործընթացում ընդգրկված են Նաիրյան, Սայաթ-Նովա, Շինարարների, Գրիբոյեդով, Սարգիս Սևանեցի, Հովհ. Թումանյան, Չարենց, Հրազդան, Շահումյան փողոցները:
«Սևան համայնքի փողոցների հիմնանորոգման աշխատանքներ» սուբվենցիոն ծրագրի 1-ին փուլով անցյալ տարի հիմնանորոգվել է Սևան քաղաքի Էներգետիկների փողոցը:
Այս տարի արդեն մեկնարկել են հիշյալ սուբվենցիոն ծրագրի ենթածրագրերը, որոնք ներառում են Սևան քաղաքի շուրջ մեկտասնյակ փողոցների՝ Իսահակյան, Օրբելի, Կարմիր բանակի, Սպանդարյան Գեղամա, Ռուսական, Աբովյան, Սայաթ-Նովա, Սյունյաց, հիմնանորոգում:
Այս տարվա համար էլ նախատեսված են սուբվենցիոն ծրագրեր, որոնք ներառում են ճանապարհաշինարարություն, ոռոգման համակարգերի կառուցում և մշակույթի տան հիմնանորոգում:
Համայնքի ավագանու 7-րդ նստաշրջանի 4-րդ նիստը տեղի կունենա մայիսի 15-ին: