តើណាពីអាដាំបានធ្វើអ្វីខ្លះបន្ទាប់ពីបានក្លាយជាមនុស្ស?

ពេលនេះម៉ាឡាអ៊ីកាត់ទាំងអស់កំពុងតែងរង់ចាំ។ វេលានៃការទន្ទឹងរង់ចាំក៏បានមកដល់ ការបញ្ចូលព្រលឹងទៅក្នុងភាវៈថ្មីក៏បានចាប់ផ្តើម។ តើចាប់ផ្តើមពីត្រង់ណាមុន? គឺចាប់ផ្តើមពីត្រង់ក្បាលអាដាំ ព្រលឹងចាប់ផ្តើមចូលតាមក្បាលរបស់គាត់។ ដីដែលស្ថិតក្រោមកំដៅថ្ងៃក៏ស្ងួត ពេលគោះវាក៏បន្លឺសំឡេងនោះ រាល់ពេលដែលវិញ្ញាណចូលដល់ត្រង់ណាវាក៏ប្រែទៅជាមានសាច់ មានឈាម មានញើស ក្លាយជាមនុស្ស ដោយចាប់ផ្តើមពីត្រង់ក្បាលមុនគេ។ ពេលព្រលឹងចូលដល់ក្បាលអាដាំភ្លាមគាត់ក៏កណ្តាស ម៉ាឡាអ៊ីកាត់នាំគ្នាស្តាប់ មើលដោយយកចិត្តទុកដាក់បំផុត គ្រាន់តែឮនិងឃើញអាដាំកណ្តាស ម៉ាឡាអ៊ីកាត់ក៏បានប្រាប់អាដាំថា សូមអ្នកស្រដីថា الحمد لله អល់ឡោះក៏បានតបចំពោះអាដាំវិញថា يرحمُك ربُّك ម្ចាស់របស់ឯងបានអាណិតស្រលាញ់ចំពោះឯងហើយ។ បន្ទាប់ពីវិញ្ញាណបានចូលពេញក្បាលអាដាំ គាត់ក៏បានឃើញឋានសួគ៌នៅពីមុខគាត់។ ក្នុងឋានសួគ៌នោះសម្បូរទៅដោយផល្លានុផលយ៉ាងច្រើនឥតឧបមា គាត់ឃើញទាំងម៉ាឡាអ៊ីកាត់ ទាំងអ៊ីពលីស ទាំងអល់ឡោះដ៏មហាអស្ចារ្យ រហូតវិញ្ញាណបានចូលទៅដល់ពោះរបស់គាត់ ដល់ពាក់កណ្តាលខ្លួនរបស់គាត់ៗក៏មានអារម្មណ៍ឃ្លាន ក៏ចង់ស្ទុះទៅរកអាហារទាំងនោះដើម្បីបរិភោគទាំងដែលព្រលឹងមិនទាន់បានចូលដល់ជើងនៅឡើយទេ។ ហេតុដូច្នេះហើយទើប អល់ឡោះមាននបន្ទូលថាៈ
خُلِقَ الْإِنسَانُ مِنْ عَجَلٍ ۚ سَأُرِيكُمْ آيَاتِي فَلَا تَسْتَعْجِلُونِ (37)سورة الأنبياء : 37
មានន័យថាៈ « គេបានបង្កើតមនុស្សលោកមកគឺមានលក្ខណៈអន្ទះសា។ យើងនឹងបង្ហាញពួកអ្នកនូវ ភស្តុតាង(ទារុណកម្ម)របស់យើង។ ដូច្នេះ ចូរពួកអ្នកកុំអន្ទះសាសុំពីយើងពេក »។
កំណកំណើតរបស់មនុស្សគឺប្រញាប់ប្រញាល់។ រហូតដំណើរវិញ្ញាណចូលក្នុងខ្លួនរបស់ណាពីអាដាំក៏បានចប់សព្វគ្រប់ដោយរលូនដែលមានលក្ខណៈល្អប្រសើរ ស្រស់ស្អាតបំផុត។ ភ្លាមនោះអាដាំក៏បានក្រោកឈរឡើងនៅពីមុខម៉ាឡាអ៊ីកាត់ ពួកគេមិនធ្លាប់បានឃើញភាវៈបែបនេះពីមុនមកទេ រួចក៏នាំគ្នាឱនស៊ូជូតចំពោះណាពីអាដាំតាមបទបញ្ជារបស់អល់ឡោះ ហើយក៏ជាការផ្តល់តម្លៃលើកសរសើរចំពោះគាត់ផងដែរ។
( وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ أَبَىٰ وَاسْتَكْبَرَ وَكَانَ مِنَ الْكَافِرِينَ ) سورة البقرة : 34
មានន័យថាៈ « ហើយ(ចូរចងចាំ) នៅពេលដែលយើងបានមានបន្ទូលទៅកាន់បណ្តាម៉ាឡាអ៊ីកាត់ថាៈ ចូរពួកអ្នកស៊ូជូតចំពោះអាដាំ។ ពេលនោះពួកគេបានស៊ូជូតទាំងអស់គ្នា លើកលែងតែអ៊ីព្លីសប៉ុណ្ណោះដែលវាបានប្រកែកនិងមានអំនួត ហើយវាក៏បានស្ថិតក្នុងចំណោមពួកដែលប្រឆាំង »។
អល់ឡោះជាអ្នកដឹងនូវចំនួនរបស់របស់ពួកគេ រាប់ពាន់ រាប់លាន ចំនួនផុតកន្ទុយភ្នែក មានតែអល់ឡោះទេដែលដឹងពីចំនួនរបស់ពួកគេ។ ប៉ុន្តែពួកគេទាំងអស់មិនមានអ្នកណាម្នាក់ប្រកែកប្រឆាំងនឹងបទបញ្ជារបស់អល់ឡោះក្នុងការស៊ូជូតគោរពចំពោះណាពីអាដាំដែលជាភាវៈថ្មីនៅលើភពផែនដីនេះឡើយ។ ដោយទ្រង់មានបន្ទូលបញ្ជាក់ថាៈ
( فَسَجَدَ الْمَلَائِكَةُ كُلُّهُمْ أَجْمَعُونَ (سورة ص : 73
មានន័យថាៈ « ដូច្នេះម៉ាឡាអ៊ីកាត់ក៏បានស៊ូជូតទាំងអស់គ្នា »។
លើកលែងតែភាវៈមួយប៉ុណ្ណោះដែលមិនគោរពតាមបទបញ្ជានេះ។ រូបគេមិនមែនជាម៉ាឡាអ៊ីកាត់ឡើយគឺជាជីនដែលអល់ឡោះបានលើកតម្កើងគេឱ្យស្មើនឹងម៉ាឡាអ៊ីកាត់។ ការធ្វើយ៉ាងនេះដូចជាសម្លាប់ខ្លួនឯងដែរ ហើយនេះគឺជាការប្រឆាំងនឹងអល់ឡោះដំបូងគេបង្អស់នៅលើមេឃ ដោយសារតែភាពក្រអឺតក្រទម ក្អេងក្អាង។ ខុសគេម្នាក់ឯង ម៉ាឡាអ៊ីកាត់ទាំងអស់នាំគ្នាស៊ូជូតតែអ៊ីពលីសនៅឈរម្នាក់ឯង។
فَسَجَدَ الْمَلَائِكَةُ كُلُّهُمْ أَجْمَعُونَ (73) إِلَّا إِبْلِيسَ اسْتَكْبَرَ وَكَانَ مِنَ الْكَافِرِينَ (74) سورة ص
មានន័យថាៈ « ដូច្នេះម៉ាឡាអ៊ីកាត់ក៏បានស៊ូជូតទាំងអស់គ្នា(73)។ លើកលែងតែអ៊ីព្លីសប៉ុណ្ណោះដែលបានក្រអឺតក្រទម។ ហើយវាបានស្ថិតក្នុងចំណោមពួកដែលប្រឆាំង(74) »។
នេះជាលើកទីមួយនៅលើមេឃ ដែលមានការប្រឆាំងនឹងអល់ឡោះពីភាវៈដែលអល់ឡោះបានលើកតម្កើងដល់រូបគេ។ ប៉ុន្តែគេបែរជាមិនពេញចិត្តនឹងឋានៈមួយនេះទាល់តែសោះ។ អល់ឡោះបានបន្ទូលសួរអ៊ីពលីសដោយទ្រង់ជាអ្នកដឹងនូវរឿងរ៉ាវទាំអស់នេះថាៈ
قَالَ يَا إِبْلِيسُ مَا مَنَعَكَ أَن تَسْجُدَ لِمَا خَلَقْتُ بِيَدَيَّ ۖ أَسْتَكْبَرْتَ أَمْ كُنتَ مِنَ الْعَالِينَ (75) سورة ص : 75
មានន័យថាៈ អល់ឡោះបានមានបន្ទូលថាៈឱអ៊ីព្លីស! តើអ្វីដែលរារាំងអ្នកមិនឱ្យស៊ូជូតចំពោះអ្វីដែលយើងបានបង្កើតដោយដៃទាំងពីររបស់យើង? តើឯងក្រអឺតក្រទម ឬក៏ឯងស្ថិតក្នុងចំណោមអ្នកដែលមានអំនួតក្អេងក្អាង »។
អ្នកឯងក្រអឺតក្រទមនឹងបទញ្ជារបស់យើងឬ? យើងពិចារណាថា តើអ៊ីពលីសនឹងឆ្លើយតបបន្ទូលរបស់ អល់ឡោះយ៉ាងណា? គេតបថាៈ
قَالَ أَنَا خَيْرٌ مِّنْهُ ۖ خَلَقْتَنِي مِن نَّارٍ وَخَلَقْتَهُ مِن طِينٍ (76) سورة ص
មានន័យថាៈ « វាបានតបវិញថាៈ ខ្ញុំល្អជាងគេ(ណាពីអាដាំ) ព្រោះទ្រង់បានបង្កើតខ្ញុំអំពីភ្លើង ហើយទ្រង់បានបង្កើតគេអំពីដីស្អិត »។
ពេលអាដាំបើកភ្នែកមកភ្លាមក៏ឃើញម៉ាឡាអ៊ីកាត់ស៊ូជូតចពោះខ្លួន ហើយអល់ឡោះនិយាយទៅកាន់អ៊ីពលីសដែលប្រឆាំងនឹងបទបញ្ជារបស់ទ្រង់។ នេះគឺជាទិដ្ឋភាពដ៏គួរឱ្យខ្លាចមួយគឺជាការប្រឆាំងនឹងអល់ឡោះដំបូងគេបង្អស់នៅលើមេឃ។
ពេលនេះ អ៊ីពលីសបានបើកបង្ហាញពីអ្វីដែលមាននៅក្នុងទ្រូងរបស់គេអំពីភាពក្អេងក្អាង ក្រអឺតក្រទម ច្រនែន ឈ្នានីស ក្តៅក្រហាយ ពីបទបញ្ជាអល់ឡោះ។ បណ្តាសាក៏ត្រូវបានចាប់ផ្តើមទៅលើអ៊ីពលីសចាប់ពីពេលនោះមក។
قَالَ فَاخْرُجْ مِنْهَا فَإِنَّكَ رَجِيمٌ (77) وَإِنَّ عَلَيْكَ لَعْنَتِي إِلَىٰ يَوْمِ الدِّينِ (78) سورة ص
មានន័យថាៈ « ហើយអល់ឡោះបានមានបន្ទូលថាៈ ដូច្នេះចូរឯងចាកចេញពីវា(ឋានសួគ៌)ចុះ ហើយពិតប្រាកដណាស់ ឯងគឺជាអ្នកដែលត្រូវគេដាក់បណ្តាសា(77)។ ហើយពិតប្រាកដណាស់ ឯងត្រូវបណ្តាសារបស់យើងរហូតដល់ថ្ងៃបរលោក »។
ឱអ៊ីពលីស! តើឯងក្រអឺតក្រទមចំពោះអល់ឡោះបានយ៉ាងដូចម្តេច? នេះជាមូលហេតុមួយដែលធ្វើឱ្យ អល់ឡោះខឹងចំពោះរូបគេយ៉ាងខ្លាំង។ ចាប់ពីពេលនោះមករូបគេក៏ក្លាយជាស្ហៃតនដែលត្រូវបណ្តាសា ត្រូវបានគេស្អប់ខ្ពើម។ អល់ឡោះក៏បានបណ្តេញគេចេញពីក្រុមម៉ាឡាអ៊ីកាត់ដែលមានឋានៈខ្ពង់ខ្ពស់ ដោយបន្ទាបឋានៈគេទាបបំផុត។