تباشير الحيا - منير البقمي | 2024 حصرياً

تباشير الحيا

كلمات : يوسف سالم الشلوي
الحان : منير البقمي

الكلمات :

يابن معين المطر جتنا تباشيره
سعود بن عون والزعاق وارصاده
توافقوا ف الخبر والخير والخيره
ضحكت ثناياه في صبحه ومهجاده
حول على صاقب الجفره مزابيره
قامت نواحر مزونه تدهك وهاده
دناق نوه على العرق وعثاميره
سجود عودٍ حياته كلها عباده
بين الوجل والرجاء والياس والحيره
ضير هوى الروح في مصحف وسجاده
والكون في حكم مولانا وتدبيره
مير الحيا ل النفوس علاج وعياده
قامت تهشم عشاياه وقرع زيره
واقصاه عم الجزيره ماقصر ماده
جذب علوي الهوى عجل بتدريره
وحاضا نفيض طفله هزيم رعاده
اظفى كمومه وصدره فك ازاريره
خطامه الريح لا حدر ومستاده
يسحب بشوت الاماره في مؤاخيره
وارخى متونه على كثرة ترداده
شعاني عن الخطا عذره وتبريره
نوٍ مثانيه كنه مصنع حداده
وقامت طروش البدو من ديره ل ديره
تخيل برقة وتبغى الصيف كالعاده
كم طرشٍ افحم على الجره مداويره
على اتجاه الجنوب تقول كداده
مصلاحهم من صباحه ل اخر عصيره
مذهب وينشد ونصف الناس نشاده
ونهار ثالث لقى تالي مصاغيره
وام الجنب شرعت ف الهضب وراده
كني النصي ملعبٍ تومي جماهيره
متعصبين ويبون الفوز بزياده
اكبر معابر هل البل وقفن سيره
ف شفها البدو نزاله وشداده
مشغول عن غاري ولمة فوازيره
ف راي حرن يدور فاقت اذواده
راسٍ تطابخ على القاله سعاطيره
ويمكن ع جالها يفوح براده
ف شف وضحى طويلة جنب وظهيره
نسنوسها مارق وفيها تسناده
اتلهم تلت الدلو بنواعيره
معاد فيها عن الحنوب صداده
قامت تنشق هواه وصابها ذيره
مهما يكثر لها الراعي توداده
يحبها حيل من يومنيها صغيره
وكمل حلاها بتفقاره وبقلاده
نقيض جزو الربيع اقفت مضاهيره
وتصرمت ف نحايا الصيف منقاده
اكبر معابر هل البل ضايقٍ سيره
وذكرني بقصر شيخ عادة اعياده
مدخل مضوفة على زحمة خطاطيره
مثل احتفال الدول ف مبايع القاده
شيخٍ عيال الملوك لهم معه جيره
جوده يحط ل عبيد السيد سياده
هذاك حثلان حي الفعل والسيره
وكلمت ونعمين مركاها على شداده
محدن مجاريه بهاضتن فواتيره
فعله ع المال حرب اخماد واباده
وخلاصة العلم تقليله وتكثيره
ايضاح ف كلمتين اشعار وافاده
وحثلان بن ناصر الامداح ف غيره
ريا وشعارها ل المال عباده
ولا ابو ناصر فرض قدرة وتقديره
مجدٍ يرد المهند داخل غماده
عتق الرقاب ومدى صيته وتاثيره
حنك به العاقل اللي داخل مهاده
يفداه من ضحكته ل الناس تكشيره
ويسير اوضاعهم في غاية مراده
واسلم وسلم ع النقد وجماهيره
ورقابنا دون حد الشعر سداده