خطة ترامب لإضعاف الدولار واتفاق مار ايه لاجو

هل تخفيض ترامب لقيمة الدولار في مصلحتنا والجنيه يتحسن وكده؟؟ الرئيس الأميركي دونالد ترامب بينقلب على مبادئ الرأسمالية وعلى رأسها حرية التجارة. ومن اهم الأهداف المحتملة الي الاقتصاديين بيتكلموا فيها دلوقتي خفض متعمد لقيمة الدولار الأميركي.

ترامب شايف ان الدولار اقوى مما ينبغي وده بيخلي الاستيراد ارخص من التصنيع الامريكي بغض النظر عن ان الدولار ده عملة امريكا الداخلية وعملة الاحتياطي والتجارة الدولية في العالم قام ابتدى يحط خطة انه يضعف الدولار الامريكي عن عمد علشان يخليه اكثر تنافسية ويقدر ينتج بقيمة اقل ويصدر للعالم بقوة.

الفكرة ده مش جديدة، بالفعل امريكا عملتها في 1985 في اتفاقية اسمها اتفاقية بلازا، اتفقوا فيها مع (اليابان، ألمانيا الغربية، فرنسا، المملكة المتحدة) على تقليص قيمة الدولار بشكل منظم، وبطريقة معلنة مسبقًا، وعلشان مايحصلش حالة من الذعر المالي في الأسواق العالمية ... والدول ده طبعا حتستفيد بانها تشتري المزيد من السلع والخدمات الأمريكية بقيمة اقل. لكن الحقيقة الي حصلت ان كان في كبش فدا مش واخد باله، اليابان الي كانت بتهيمن على الأسواق العالمية بالتصدير، لبسوا ارتفاع مبالغ فيه لقيمة الين الياباني، و دخل الاقتصاد الياباني مرحلة الركود المعروفة بـ"العقد الضائع" خلال التسعينيات. طيب ايه التأثير علينا احنا في الدول العربية والناشئة ..

مش ده معناه برضه ان ديونها قيمتها حتقل وكده؟ لو الراجل ده عمل الي في دماغه حيحصل الآتي:

◀️غلاء الأسعار وارتفاع تكلفة الواردات: انخفاض الدولار يعني ارتفاع أسعار السلع المستوردة غير الأميركية، لان دولار ضعيف معناه مثلا يوان قوي وانت بتستورد من الصين يبقى معاليك حيزيد عندك معدلات التضخم وحتحرق الاحتياطي بتاعك.
◀️انخفاض القدرة التنافسية للصادرات: لما معاليك تصدر حاجه ب 10 دولار .. لو قيمة الدولار قلت يبقى كده مثلا نفس الي انت بتصدره قيمته اصبحت 5 دولار مش 10 زي الاول يعني تأثير سلبي على عائدات صادرات الدول النامية، ومنها الدول العربية.
◀️ارتفاع أعباء الديون: في حال كانت الديون مقوّمة بعملات أخرى يعني مثلا واخد قرض باليورو زي حالتنا، القروض ده تكلفة سدادها حتزيد بسبب ضعف الدولار.
◀️ده غير ارتفاع أسعار السلع الأساسية: مثل النفط والغاز وبقية المحروقات بس ترامب لسه عامل تعريفات جمركية وكده ...

وايه كمان اتفاقية مار ايه لاغو ده كمان؟ الاتفاقية ده غالبا هي الاتفاقية السرية الجديدة الي شبه اتفاق بلازا الي اتكلمنا عليه، و اللعبه كالآتي والله اعلم:

◀️ إصدار سندات حكومية أميركية من دون فوائد تستحق بعد 100 عام.
◀️ تُلزم الدول الحليفة بشراء السندات ده مقابل ضمانات أمنية أميركية.
◀️ تواجه الدول الرافضة فرض رسوم جمركية مرتفعة أو تعليق الحماية العسكرية. وبكده الخطة ده حتساعد في خفض أسعار الفائدة وتقليص العجز المالي في امريكا ... وترامب بالفعل طلع قال انه منفتح على خفض الرسوم .... بس مقالش ايه المقابل.

#حكاوي_في_البيزنس